Eremiya 2 bob
1 Jaratqan İyeden mag'an so'z tu'sti:
2 – Barıp, mınalardı Erusalim xalqına esittirip ja'riyala: «Jaratqan İye bılay deydi: Senin' jaslıg'ın'da qanday opadar bolg'anın', Kelinshek waqtın'dag'ı su'yispenshiligin', Sho'lde, egin ege almaytug'ın jerde, İzime ergenin' yadımda.
3 İzrail Jaratqan İye ushın muxaddes xalıq, Onın' jemisinin' birinshi miywesi. Onnan jegenlerdin' barlıg'ı jazıqlı bolıp, Baslarına apat jawdı, – deydi Jaratqan İye.
4 Yaqıptın' xalqı, İzrail xalqının' barlıq tiyreleri, Jaratqan İyenin' so'zin tın'lan'!
5 Jaratqan İye bılay deydi: Mennen uzaqlasatug'ınday, Ata-babaların'ız Mennen ne jamanlıq ko'rdi? Jaramsız butlarg'a tabınıp, O'zleri de tu'kke turg'ısız boldı.
6 Olar: „Bizlerdi Mısırdan alıp shıqqan, Sho'l dalada, qumlı ha'm shuqırları bar jerlerde, Suwsız ha'm qaran'g'ı jerde, Hesh kim o'te almaytug'ın ha'm hesh kim jasamaytug'ın jerde, Bizge jol ko'rsetken Jaratqan İye qay jerde?“ – dep soramadı.
7 Miywesinen ha'm jaqsılıg'ınan tatsın dep, Men sizlerdi o'nimdar bir jerge alıp kelgen edim. Biraq ol jerge kirip, iyeligimdi haramladın'ız, Mu'lkimdi jerkenishli orıng'a aylandırdın'ız.
8 Ruwxaniyler: „Jaratqan İye qayda?“ – dep soramadı. Qazılar Meni tanımadı, Xalıq basshıları Mag'an qarsı bas ko'terdi. Payg'ambarlar Baaldın' atınan payg'ambarshılıq qılıp, Paydasız na'rselerdin' izinen quwdı.
9 Sonlıqtan Men sizler menen ja'ne dawlasaman, – deydi Jaratqan İye. – Men sizlerdin' balaların'ızdın' balaları menen de dawlasaman.
10 Kittim jag'alawlarına barıp ko'rin', Kedarg'a adam jollap, dıqqat penen ko'zden o'tkerin'. To'mendegidey waqıya qashan bolsa da, ju'z bergen be eken?
11 Ha'tte, olardın' qudayları Quday bolmasa da, O'z qudaylarınan waz keshken millet bar ma? Biraq Menin' xalqım o'zinin' dan'qlı Qudayın, Paydasız na'rsege almastırdı.
12 Ha'y, ko'kler, bug'an tan'lanıp, Qorqıwdan titiren', – deydi Jaratqan İye. –
13 Menin' xalqım eki jamanlıq isledi: Meni, tiri suw bulag'ın ta'rk etti, O'zlerine suw turmaytug'ın, buzıq suw saqlag'ıshlardı qazıp aldı.
14 İzrail qul ma? Yamasa qul bolıp tuwılg'an ba? Onda nege ol olja boldı?
15 Ku'shli arıslanlar og'an aqırıp, dawısın ko'terdi. Jerin sho'listang'a aylandırdı. Qalası qarabaqanag'a aylanıp, adamsız qaldı.
16 Nof ha'm Taxpanxes xalqı da, En'begin'izdi oyıp tasladı.
17 O'zin'e jol ko'rsetken Qudayın', Jaratqan İyeni ta'rk etkenin' ushın, Bul basın'a tu'spedi me?
18 Endi nege Mısırg'a baratırsan', Shixordın' suwınan ishiw ushın ba? Assiriyag'a ne ushın baratırsan', Evfrat suwınan ishiw ushın ba?
19 Sizlerdi o'z jamanlıg'ın'ız jazalap, Opasızlıg'ın'ız ginalaydı. Qudayın'ız Jaratqan İyeni ta'rk etiwdin', Mennen qorqpawdın' sizler ushın qanday jaman ha'm ashshı ekenin, Ko'rip, bilin', – deydi A'lemnin' İyesi Jaratqan İye.
20 Sen uzaq waqıt aldın moyıntırıg'ın'dı buzıp, Kisenlerin'di u'zip: „Sag'an xızmet etpeymen“, – dedin'. Sen ha'r bir biyik to'beshikte, Ha'r bir qoyıw japıraqlı terektin' astında dize bu'gip buzıqshılıq qıldın'.
21 Men seni hasıl tuqımnan, Saylandı ju'zim ag'ashınan ekken edim. Biraq sen nege aynıp qalıp, Jabayı ju'zim ag'ashına aylandın'?
22 Endi ko'p silti suwı menen juwıp, Sabın menen tazalasan' da, Senin' ayıpdarlıg'ın'nın' tamg'ası aldımda turadı, – deydi Quday İye. –
23 Sen qalayınsha: „Men haram emespen, Baallarg'a da ermedim“, – dep aytasan'? Oypatlıqta qılg'an qılıg'ın'a qarap, Ne islegenin'di oylap ko'r. Sen o'zin ol jaqtan bul jaqqa urg'an, Urg'ashı tu'yege uqsaysan'.
24 Sen sho'lge u'yrengen, Qushtarlıg'ın' qozg'anda, samalg'a pısqırg'an qulansan'. Ku'yge kelgende, onı kim toqtata aladı? Shag'ılısqısı kelgenler izinen quwıp sharshamaydı, Ku'yge kelgen ayında, onı tawıp aladı.
25 Ayag'ın'dı jalan'ayaq juwırıwdan, Tamag'ın'dı sho'llewden saqla. Biraq sen: „U'mit etpe, men jat qudaylardı su'yemen, Onın' izine eremen“, – dedin'.
26 Urı qolg'a tu'skende, shermende bolg'anınday, İzrail xalqı, onın' patshaları, basshıları, Ruwxaniyleri, payg'ambarları masqara boladı.
27 Olar terekke: „Menin' a'kemsen'“, Tasqa: „Sen meni tuwdın'“, – deydi. Olar Mag'an ju'zin emes, al arqasın qarattı. Biraq baslarına apat tu'skende: „Kelip, bizlerdi qutqar“, – deydi.
28 Senin' o'zin' ushın islep alg'an qudayların' qayda? Apatqa ushırag'anın'da, Seni qutqara alatug'ın bolsa, kelsin. Yahuda, qalaların'nın' sanı qansha bolsa, Qudayların'nın' sanı da sonsha.
29 Nege Mag'an dawa qılasız? Ha'mmen'iz Mag'an qarsı bas ko'terdin'iz, – deydi Jaratqan İye. –
30 Xalqın'dı qatal jazaladım, Biraq olar ta'rbiyamdı almadı. Qılıshın'ız jırtqısh arıslan kibi, Payg'ambarların'ızdı qırıp tasladı.
31 Sizler, bul da'wir urpaqları, Jaratqan İyenin' so'zine qulaq tu'rin': Men İzrail ushın bir sho'l, Qara tu'nek bir jer me edim? Sonda ne ushın xalqım: „Bizler erkinbiz, Endi janın'a qaytıp barmaymız“, – deydi.
32 Qız bala tag'ınshaqların, Kelinshek kelin kiyimin esten shıg'ara ma? Al Menin' xalqım Meni umıttı, San-sanaqsız ku'nler o'tti.
33 Oynas tabıwg'a qanshelli ustasan', Ha'tte, buzıq hayalg'a da jolların'nan u'yrenetug'ın na'rse bar.
34 Etegin' de biygu'na paqırdın' qanına bılg'ang'an, Onı sen urlıq u'stinde uslamag'an bolsan' da, Bularg'a qaramastan:
35 „Men ayıpsızban, Jaratqan İyenin' mag'an degen qa'ha'ri anıq so'ndi“, – deysen'. Biraq: „Men gu'nasızban“, – degenin' ushın, U'stin'nen hu'kim shıg'araman.
36 Nege tez-tez jolın'dı o'zgerte beresen'? Assiriyada uyatqa qalg'anın' sıyaqlı, Mısırda da uyatqa qalasan'.
37 Ol jerden de qolın' menen betin'di jawıp shıg'asan'. Sebebi Jaratqan İye sen u'mit etkenlerden ju'z burdı, Endi olar arqalı tabısqa erise almaysan'».
