Eremiya 21 bob
1 Patsha Sedekiya Malkiya ulı Pashxur menen Maaseya ulı ruwxaniy Sefaniyanı Eremiyag'a jibergende, Eremiyag'a Jaratqan İyeden so'z tu'sti. Pashxur menen Sefaniya Eremiyag'a:
2 – Babiloniya patshası Nabuxodonosor bizlerge urıs ashtı. Sol sebepli bizler ushın Jaratqan İyege jalbarın. Ba'lkim, Jaratqan İye bizler ushın burıng'ıday a'jayıp ka'ramatlarınan birin ko'rsetip, Nabuxodonosor elimizden sheginer, – dedi.
3 Eremiya olarg'a Sedekiyag'a mınanı aytıp barıwdı tapsırdı:
4 – İzraildın' Qudayı Jaratqan İye bılay deydi: «Sizlerdin' sırtqı diywalların'ızdı qamal qılg'an Babiloniya patshasına ha'm kaldeylerge qarsı qollanıp atırg'an qolların'ızdag'ı qurallardı o'zlerin'izge qarsı buraman. Olardın' ha'mmesin bul qalanın' ortasına toplayman.
5 Ku'shli bilegim ha'm sozılg'an qolım menin' ashıwg'a, qa'ha'rge ha'm g'a'zepke minip, Menin' O'zim sizlerge qarsı urısaman.
6 Men bul qalada jasawshılardın' ha'mmesin: adamlardı da, haywanlardı da joq qılaman. Olar qorqınıshlı illetten qırıladı.
7 Bunnan keyin, – deydi Jaratqan İye, – Yahuda patshası Sedekiyanı, onın' ha'meldarların, bul qalanın' turg'ınların, yag'nıy illetten, qılıshtan ha'm ashlıqtan aman qalg'anlarının' ha'mmesin Babiloniya patshası Nabuxodonosordın' ha'm janın alıwdı qa'legen dushpanlarının' qolına tapsıraman. Nabuxodonosor olardı qılıshtan o'tkeredi, olarg'a rehim etpeydi, janı ashımaydı, ayamaydı».
8 ul xalıqqa Jaratqan İyenin' bılay dep atırg'anın aytın': «Mine, Men o'mir jolı menen o'lim jolın usınaman.
9 Bul qalada qalg'an ha'r bir adam qılıshtan, ashlıqtan ha'm illetten o'ledi, al qaladan shıg'ıp, o'zlerin qamal qılıp turg'an kaldeylerge ta'slim bolg'an ha'r bir adam bolsa, janın qutqarıp, o'mirin saqlap qaladı.
10 Men bul qalag'a jaqsılıq qılıw ushın emes, – deydi Jaratqan İye, – al apatshılıq keltiriw ushın bet burdım. Qala Babiloniya patshasının' qolına beriledi, Ol qalag'a ot qoyadı».
11 Yahuda patshasının' u'y-ishine ayt: «Jaratqan İyenin' so'zin tın'lan'!
12 Ha'y, Dawıttın' na'sili, Jaratqan İye bılay deydi: Ha'r ku'ni azanda a'dalattı ju'zege asırın', Ja'birlengendi zalımnın' qolınan azat etin'. Bolmasa, qılg'an jawızlıqların'ız sebepli, G'a'zebim ottay lawlap janadı, Onı hesh kim so'ndire almaydı.
13 Ha'y, oypatlıqtag'ı biyik jartas, Tegislik u'stindegi Erusalim! Men sag'an qarsıman! – deydi Jaratqan İye. – Sizler: „Kim joqarıdan asıp tu'sip, bizge qarsı shıg'a aladı? Kim qorg'anımızg'a kire aladı?“ – deysizler.
14 Men sizlerdi is-ha'reketin'izge jarasa jazalayman, – deydi Jaratqan İye. – Tog'ayların'ızg'a ot beremen, Ot a'tirapın'ızdag'ılardın' ha'mmesin jalmaydı».
