Eremiya 25 bob
1 Yahuda patshası İoshiyanın' ulı Ehoyakimnin' patshalıg'ının' to'rtinshi jılı, Babiloniya patshası Nabuxodonosordın' patshalıg'ının' birinshi jılı Eremiyag'a pu'tkil Yahuda xalqı haqqında ayan boldı.
2 Payg'ambar Eremiya bunı pu'tkil Yahuda xalqına ha'm Erusalim turg'ınlarına jetkerip, bılay dedi:
3 – Mine, jigirma u'sh jıldan beri, Yahuda patshası Amon ulı İoshiyanın' patshalıg'ının' on u'shinshi jılınan, usı ku'nge deyin Jaratqan İyenin' so'zi mag'an tu'sti. Men olardı sizlerge qayta-qayta ayttım, biraq sizler tın'lamadın'ız.
4 Jaratqan İye O'z qulları bolg'an payg'ambarlardı sizlerge qayta-qayta jiberse de, olarg'a qulaq salmadın'ız, itibar da bermedin'iz.
5 Olar arqalı sizlerge bılay dedi: «Endi ha'r birin'iz jawız joldan, natuwrı isler qılıwdan bas tartın'. Sonda Men o'zlerin'izge ha'm ata-babaların'ızg'a bergen jerde ma'n'gi-baqıy ma'kan basasız.
6 Basqa qudaylarg'a ermen', xızmet etpen' ha'm tabınban'. Qolların'ız benen islegen butlar menen g'a'zebimdi keltirmen'. Sonda Men de sizlerge zıyan keltirmeymen».
7 – Biraq sizler Meni tın'lamay, – deydi Jaratqan İye, – qolların'ız benen islegen butların'ız sebepli g'a'zebimdi keltirdin'iz ha'm o'zin'izge zıyan jetkizdin'iz.
8 Sonlıqtan A'lemnin' Jaratqan İyesi bılay deydi: «Menin' so'zlerimdi tın'lamag'anın'ız ushın,
9 Men arqadag'ı barlıq xalıqlardı ha'm Babiloniya patshası bolg'an qulım Nabuxodonosordı shaqıraman, – deydi Jaratqan İye. – Olardı bul jerdin' pu'tkil turg'ınlarına ha'm aynalasındag'ı barlıq milletlerge qarsı atlandıraman. Bul xalıqlardı pu'tkilley joq qılaman. Olardı ko'rgenler hu'reyi ushıp, qorqatug'ın qılıp, ma'n'gilik qarabaqanag'a aylandıraman.
10 Olardı quwanısh ha'm shadlıqtan juda qılaman, kelin-ku'yewdin' toyının' sesti esitilmeydi, digirman sesti de tınadı, shırag'ı so'nedi.
11 Pu'tkil el qan'ırap, qarabaqanag'a aylanadı. Bul milletler jetpis jıl Babiloniya patshasına xızmet etedi.
12 Jetpis jıl o'tkennen keyin Men Babiloniya patshasın, onın' xalqın ha'm kaldeylerdin' elin qılg'an qılmısı ushın jazalap, – deydi Jaratqan İye, – jerin ma'n'gilikke sho'l dalag'a aylandıraman.
13 Men sol jerge qarsı aytqanlarımnın' ha'mmesin, bul kitapta jazılg'anlardın' ha'mmesin, yag'nıy Eremiyanın' pu'tkil milletler tuwralı aytqan payg'ambarshılıqların a'melge asıraman.
14 Ko'p milletler ha'm ullı patshalar olardı qul qıladı. Men olarg'a is-ha'reketine ha'm qollarının' isine say qaytaraman».
15 İzraildın' Qudayı Jaratqan İye mag'an bılay dedi: – Mına Menin' qa'ha'rimnin' sharabına tolg'an keseni qolımnan al da, Men seni jiberetug'ın milletlerdin' ha'mmesine onı ishkiz.
16 Olar sol keseden iship, tentirekleydi ha'm aqılın joytadı. Awa, Men olarg'a qılısh jiberemen.
17 Men keseni Jaratqan İyenin' qolınan alıp, Jaratqan İye meni jibergen milletlerdin' ha'mmesine onnan ishkizdim.
18 Bu'gin bolg'anı kibi wayranshılıq, qorqınısh, masqarashılıq ha'm na'let bolsın dep, Erusalimge, Yahuda qalalarına, onın' patshaları menen basshılarına ishkizdim.
19 Sonday-aq Mısır patshası faraong'a, onın' xızmetkerlerine, basshılarına ha'm pu'tkil xalqına,
20 Mısırda jasap atırg'an barlıq kelgindilerge, Us jerinin' barlıq patshalarına, Filist jerindegi: Ashkelon, Gaza, Ekron patshalarına ha'm Ashdodtın' aman qalg'anlarının' patshasına,
21 Edomg'a, Moabqa ha'm ammonlarg'a,
22 Tirdin' barlıq patshalarına, Sidonnın' barlıq patshalarına, ten'iz jag'alawlarındag'ı ha'm atawlardag'ı patshalarg'a,
23 Dedang'a, Temag'a, Buzg'a ha'm tulımshaqların kesip ju'retug'ınlardın' ha'mmesine,
24 barlıq Arabstan patshalarına ha'm sho'lde jasaytug'ın aralas qa'wimlerdin' barlıq patshalarına,
25 Zimriydin', Elamnın' ha'm Midiyanın' barlıq patshalarına,
26 uzaq-jaqın jerdegi barlıq arqa patshalarına ha'm jer betindegi barlıq patshalıqlarg'a na'wbetpe-na'wbet ishkizdim. Bulardın' ha'mmesinen keyin, Babiloniya patshası da ishedi.
27 – Son'ınan olarg'a ayt: «İzraildın' Qudayı A'lemnin' Jaratqan İyesi bılay deydi: İship, ma's bolın', qusın' ha'm o'zlerin'izge jiberetug'ın qılıshımnan qaytıp turmaytug'ınday bolıp qulan'».
28 Eger olar senin' qolın'nan keseni qabıl qılıp, ishiwden bas tartsa, olarg'a ayt: «A'lemnin' Jaratqan İyesi bılay deydi: So'zsiz ishesiz!– Son'ınan olarg'a ayt: «İzraildın' Qudayı A'lemnin' Jaratqan İyesi bılay deydi: İship, ma's bolın', qusın' ha'm o'zlerin'izge jiberetug'ın qılıshımnan qaytıp turmaytug'ınday bolıp qulan'».
29 Mine, Men O'z atım menen atalg'an qalag'a apat jiberiwdi basladım. Sizler jazasız qalaman dep oylaysız ba? Jazasız qalmaysız, sebebi Men jer betinde jasap atırg'an ha'r bir adamg'a qılısh jiberemen, – deydi A'lemnin' Jaratqan İyesi».
30 Sonlıqtan mına so'zlerdin' ha'mmesin olarg'a payg'ambarshılıq etip ayt: «Jaratqan İye joqarıdan gu'rkirep, Muxaddes ma'kanınan saza beredi. O'z jaylawındag'ı xalqına bar dawısı menen gu'rkireydi. Pu'tkil jer beti turg'ınlarına qarsı, Ju'zim basqılag'annın' baqırg'anınday baqıradı.
31 Aqırıwı jer betinin' ushlarına jetedi, Sebebi Jaratqan İyenin' milletlerge dawası bar. Ol pu'tkil adamzatqa hu'kim shıg'arıp, Zalımlardı qılıshtan o'tkeredi, – deydi Jaratqan İye».
32 A'lemnin' Jaratqan İyesi bılay deydi: Qaran'lar, apat xalıqtan xalıqqa o'tpekte. Jer betinin' shetinen, Qorqınıshlı dawıl turmaqta.
33 Sol ku'ni Jaratqan İye o'ltirgenler jerdin' bir shetinen ekinshi shetine deyin jayrap qaladı. Olarg'a joqlaw aytılmaydı, jıynap alınbaydı, jerlenbeydi, tezek sıyaqlı shashılıp jatadı.
34 Shopanlar jılap, dad-pa'riyad qılın'! Su'riwdin' basshıları, ku'lge awnan'! Sizlerdin' bawızlanıp, tarqatılatug'ın ku'nin'iz keldi, Qulatılıp, qımbatbaha ıdıs sıyaqlı sındırılasız.
35 Shopanlar qasha almas, Su'riw basshıları qutılıp ketpes.
36 Shopanlardın' pa'riyad etken dawısı, Su'riw basshılarının' en'irep jılag'anları esitilip tur. Jaratqan İye olardın' jaylawların jaypap taslap atır.
37 Jaratqan İyenin' lawlag'an g'a'zebi sebepli, Tınısh jaylawlar nabıt bolmaqta.
38 Ol arıslanday bolıp ininen shıqtı. Onın' lawlag'an g'a'zebinen, Basqınshılardın' qılıshınan, Olardın' jeri qan'ırap bos qaladı.
