Eremiya 29 bob
1 Payg'ambar Eremiya Erusalimnen Babiloniyag'a Nabuxodonosor ta'repinen tutqın qılıp alıp ketilgen tutqınlar arasında aman qalg'an aqsaqallarg'a, ruwxaniylerge, payg'ambarlarg'a ha'm pu'tkil xalıqqa Erusalimnen xat jolladı.
2 Bul xat Exoniya patsha menen onın' anası, saray xızmetkerleri, Yahuda ha'm Erusalim basshıları, o'nermentshiler ha'm temirshiler Erusalimnen su'rgin etilgennen keyin jazıldı
3 Xat Yahuda patshası Sedekiyanın' Babiloniya patshası Nabuxodonosorg'a jibergen adamları, Shafan ulı Elasa ha'm Xilkiya ulı Gemariya arqalı berip jiberildi. Xatta bılay dep jazılg'an edi:
4 «İzraildın' Qudayı A'lemnin' Jaratqan İyesi O'zi Erusalimnen Babiloniyag'a su'rgin etken ha'r bir adamg'a bılay deydi:
5 U'yler qurıp, ornalasın', bag' egip, onın' jemisin jen'.
6 U'ylenip, ul-qızlı bolın'. Ulların'ızdı u'ylendirip, qızların'ızdı turmısqa berin'. Olardan da ullar ha'm qızlar du'nyag'a kelsin. Ol jerde azayman', qayta ko'beyin'.
7 Men sizlerdi tutqın etip jibergen qalanın' abadanshılıg'ın tilen'. Ol qala ushın Jaratqan İyege duwa etin', sizlerdin' abadan turmıs keshiriwin'iz onın' abadanshılıg'ına baylanıslı.
8 İzraildın' Qudayı A'lemnin' Jaratqan İyesi bılay deydi: Aran'ızdag'ı payg'ambarlar menen palkerlerin'izge o'zin'izdi aldatpan'. Olar ko'rgen tu'slerin aytqanda qulaq salman'.
9 Olar Menin' atım menen sizlerge jalg'an payg'ambarshılıq aytadı. Olardı Men jibermedim, – deydi Jaratqan İye.
10 Jaratqan İye bılay deydi: Babiloniyada bolg'anın'ızg'a jetpis jıl tolg'anda, Men sizlerge na'zer awdarıp, sizlerdi usı jerge qaytarıp alıp kelemen degen iygilikli wa'demdi orınlayman.
11 Men sizler ushın du'zgen jobalarımdı O'zim bilemen, – deydi Jaratqan İye. – Bul jobalarım sizlerge apat emes, al abadanshılıq alıp keledi, keleshekke u'mit bag'ıshlaydı.
12 Sonda sizler Meni shaqırasız, kelip, Mag'an duwa etesiz. Men de sizlerdi esitemen.
13 Sizler Meni izleysiz, eger shın ju'rekten izlesen'iz, tabasız.
14 Awa, Meni tabasız, – deydi Jaratqan İye. – Men sizlerdin' abadanshılıg'ın'ızdı qayta tikleymen. Men sizlerdi quwg'ın qılg'an jerlerimnin' ha'mmesinen, barlıq milletler arasınan jıynap alaman, – deydi Jaratqan İye. – Men sizlerdi qay jerden su'rgin qılg'an bolsam, sol jerge qaytıp alıp kelemen.
15 Biraq sizler: „Jaratqan İye Babiloniyada bizlerge payg'ambarlar berdi“, – deysiz.
16 aratqan İye Dawıttın' taxtında otırg'an patsha haqqında, bul qalada qalg'an pu'tkil xalıq haqqında, sizler menen su'rginge ketpegen tuwısqanların'ız haqqında bildirdi.
17 A'lemnin' Jaratqan İyesi bılay deydi: Men olarg'a qılısh, ashlıq ha'm illet jiberdim. Olardı jewge bolmaytug'ın shirik a'njirdey qılaman.
18 Qılısh, ashlıq ha'm illet penen olardın' izinen quwıp, jer betindegi barlıq patshalıqlardı qorqınıshqa salaman. Men olardı quwıp jibergen milletler arasında olar g'arg'ısqa qalıp, qorqınısh quralına aylanadı, tabalanıp, jek ko'rinshi boladı.
19 Sebebi olar Menin' so'zlerimdi ha'm qayta-qayta o'zlerine jibergen qullarım payg'ambarlardın' so'zlerin tın'lamadı, – deydi Jaratqan İye.
20 Sonlıqtan ha'y, barlıq su'rgindegiler, Erusalimnen Babiloniyag'a su'rgin qılg'anlarım, Jaratqan İyenin' so'zin tın'lan'!
21 Menin' atım menen sizlerge jalg'an payg'ambarshılıq qılg'an Qolaya ulı Axab penen Maaseya ulı Sedekiya haqqında İzraildın' Qudayı A'lemnin' Jaratqan İyesi bılay deydi: Olardı Babiloniya patshası Nabuxodonosorg'a ta'slim etemen. Ol ekewin de sizlerdin' ko'z aldın'ızda o'ltiredi.
22 Solay etip, Yahudadan Babilong'a su'rgin etilgenler arasında: „Jaratqan İye seni Babiloniya patshası tiriley otta jaqqan Sedekiya ha'm Axabtay qılsın“, – degen g'arg'ıs payda boladı.
23 Olar İzrailda jaramas islerdi isledi, qon'sılarının' hayalları menen buzıqshılıq qıldı, Men buyırmasam da, Menin' atımnan jalg'an so'zlerdi ayttı. Men bulardı bilemen ha'm O'zim olarg'a gu'waman, – deydi Jaratqan İye».
24 – Nexelamlı Shemayag'a aytın'lar:
25 «İzraildın' Qudayı A'lemnin' Jaratqan İyesi bılay deydi: Sen Erusalimdegi pu'tkil xalıqqa, Maaseyanın' ulı ruwxaniy Sefaniyag'a ha'm basqa barlıq ruwxaniylerge o'zin'nin' atın'nan bılay dep xatlar jollapsan':
26 „Ruwxaniy Ehoyadanın' ornına Jaratqan İye seni ruwxaniy etip tayınladı. Jaratqan İyenin' İbadatxanasının' qadag'alawshısı sıpatında, o'zin payg'ambar etip ko'rsetken ha'r bir telbeni kisenlep, temir bug'aw menen bug'awlawın' kerek.
27 Solay eken, ne ushın aran'ızda payg'ambarshılıq qılıp ju'rgen anatotlı Eremiyag'a shara ko'rmedin'iz?
28 Sebebi ol bizlerge, Babiloniyag'a xat jollap: „Su'rgin uzaq dawam etedi. O'zlerin'izge u'yler qurıp, olarda jasan'lar. Bag'lar otırg'ızıp, olardın' miywesin jen'ler“, – dep jazıptı“».
29 Ruwxaniy Sefaniya bul xattı payg'ambar Eremiyag'a esittirip oqıdı.
30 Sonda Eremiyag'a Jaratqan İyeden so'z tu'sti:
31 – Su'rgindegilerdin' ha'mmesine mına xattı jiber: «Jaratqan İye nexelamlı Shemaya haqqında bılay deydi: „Men onı jibermegen bolsam da, Menin' atımnan sizlerge payg'ambarshılıq qılıp, jalg'ang'a isendirdi.
32 Men nexelamlı Shemayanı ha'm onın' urpaqların jazalayman. Onın' a'wladınan hesh biri bul xalıq arasında jasamaydı ha'm xalqıma isleytug'ın jaqsılıg'ımdı ko'rmeydi, – deydi Jaratqan İye. – Sebebi ol Mag'an qarsı so'yledi“».
