Eremiya 3 bob
1 «Eger birew hayalı menen ajırassa, Hayal ketip, basqa birewge turmısqa shıqsa, Birinshi ku'yewi onı qayta hayallıqqa alar ma edi? Bul arqalı jer pu'tkilley haramlanbay ma? Sen ko'pler menen oynaslıq qıldın', Endi Mag'an qaytıp kelmekshimisen'? – deydi Jaratqan İye. –
2 Ko'z jiberip, taqır to'belerge na'zer sal, Sen buzıqshılıq qılmag'an orın qalıp pa? Sho'ldegi qaraqshı sıyaqlı, Jol shetinde otırıp, oynasların'dı an'lıdın'. Buzıqshılıg'ın' ha'm jawız islerin' menen, Jerdi haramladın'.
3 Sonlıqtan jawın jawmadı, Ba'ha'rdegi no'ser de quymadı. Sen namıssız jezo'kshege uqsadın', Uyattın' ne ekenin bilmedin'.
4 Endi bolsa: „A'ke, jaslıg'ımnan Sen menin' dostım edin',
5 Qa'ha'rin' ma'n'gige dawam ete bere me?“ – deysen'. Usılay ayta tura, Qolın'nan kelgen jamanlıqlardı isley beresen'.»
6 oshiya patshanın' da'wirinde Jaratqan İye mag'an bılay dedi: – Sen opasız İzraildın' islegen islerin ko'rdin' be? Ol ha'r bir biyik to'beshikte ha'm ha'r bir qoyıw japıraqlı terektin' astında buzıqshılıq qıldı.
7 Bulardı islep bolg'annan keyin, ol mag'an bet burar dep oylag'an edim. Biraq ol qaytpadı, bunı biyopa sin'lisi Yahuda da ko'rdi.
8 İslegen barlıq buzıqshılıg'ı ushın, Men opasız İzrailg'a talaq xat berip, quwıp jibergenimde de, onın' biyopa sin'lisi Yahuda bunnan qorqpastan, buzıqshılıq islegenin ko'rdim.
9 Buzıqshılıq İzrail ushın hesh na'rse emestey bolıp ko'rindi, ol tas ha'm ag'ashlar menen buzg'ınlıq islep, jerdi haramladı.
10 Bulardın' ha'mmesine qaramastan, İzraildın' biyopa sin'lisi Yahuda shın ju'rekten emes, al jalg'annan Mag'an qaytıp keldi, – deydi Jaratqan İye.
11 Jaratqan İye mag'an bılay dedi: – Opasız İzrail biyopa Yahudadan a'dilirek bolıp shıqtı.
12 Barıp, bul so'zlerdi arqag'a ja'riyala: «Opasız İzrail, Mag'an qayt! – deydi Jaratqan İye. – Men miyrimlimen, endi sag'an g'a'zebimdi shashpayman, – deydi Jaratqan İye. – Ma'n'gige qa'ha'rlenip ju'rmeymen.
13 Tek ayıbın'dı moyınla: Sen Qudayın' Jaratqan İyege qarsı bas ko'terdin', ha'r bir qoyıw sayalı terektin' astında basqa qudaylarg'a kewil berdin'. Menin' dawısıma qulaq aspadın', – deydi Jaratqan İye.
14 Ha'y biyopa xalıq, Mag'an qayt! – deydi Jaratqan İye. – Sebebi Men senin' xojayının'man. Men sizlerdi qaladan birewden, urıwdan ekewden alıp shıg'arıp, Siong'a alıp baraman.
15 Sizlerge O'z kewlimdegidey shopanlardı beremen. Olar sizlerdi bilim ha'm tu'sinik penen bag'adı.
16 Sizler bul jerde o'sip-o'nip, san-sanaqsız bolg'anın'ızda, – deydi Jaratqan İye, – xalıq artıq Jaratqan İyenin' Kelisim sandıg'ı tuwralı aytpaydı. Ol tuwralı endi oylamaydı, eske de almaydı, onı ku'semeydi, ja'ne qaytadan onı soqpaydı.
17 Sol waqıtta Erusalim Jaratqan İyenin' taxtı dep ataladı ha'm Jaratqan İyenin' atı hu'rmeti pu'tkil milletler Erusalimge jıynaladı. Bunnan bılay, olar jawız ju'reklerinin' qın'ırlıg'ın qılmaydı.
18 Sol ku'nlerde Yahuda xalqı menen İzrail xalqı birigip, arqadag'ı jerlerden shıg'ıp, Men ata-babalarına mu'lik etip bergen jerge keledi.
19 Men sizlerdi de balalarım qılıp alıp, A'jayıp bir jerdi, Barlıq milletlerdin' go'zzal miyrasların bermekshi edim. Sizler Meni „A'kem“ deysiz, Mennen hesh ju'z burmaysız, dep oylag'an edim.
20 Biraq hayaldın' ku'yewine opasızlıq qılg'anı sıyaqlı, İzrail xalqı, sizler de Mag'an opasızlıq qıldın'ız! – deydi Jaratqan İye.
21 Jalan'ash to'belerden bir dawıs esitiledi, Bul İzrail xalqının' ahıw-nalası menen pa'riyadı. O'ytkeni olar joldan shıqtı, Qudayı Jaratqan İyeni umıttı.
22 Ha'y, biyopa perzentler, keri qaytın'lar, Men sizlerdi opasızlıqtan emleymen. Xalıq bılay deydi: „Mine, Sag'an qaytıp kiyatırmız, Sebebi Qudayımız Jaratqan İye Sensen'.
23 Irasında da, to'belerde tabınıp, Tawlarda salg'an shawqım-su'renler jalg'an. Haqıyqatında, Qudayımız, Jaratqan İye İzraildı qutqaradı.
24 Jaslıg'ımızdan ata-babalarımızdın' mu'lki bolg'an, Mayda ha'm iri malların, Ul ha'm qızların jerkenishli but jalmap juttı.
25 Kelin'ler, shermendeligimizdi bu'rkenip, Masqarashılıqtı jamılıp alayıq. Sebebi Qudayımız Jaratqan İyege qarsı gu'na islep keldik, Ata-babalarımız da, bizler de, Jaslıg'ımızdan usı ku'nge deyin, Qudayımız Jaratqan İyenin' dawısına qulaq salmadıq.“»
