Eremiya 33 bob
1 Eremiya ele saqshılar ha'wlisinde qamaqta saqlanıp atırg'an waqıtta, og'an Jaratqan İyeden ekinshi ret so'z tu'sti:
2 – İsti jobalastırıp, onı isleytug'ın ha'm ju'zege asıratug'ın, atı Jaratqan İye bolg'an Jaratqan İye bılay deydi:
3 Meni shaqır, juwap beremen. Sen bilmegen ullı ha'm jumbaqlı sırlardı sag'an aytaman.
4 Qalag'a taqap u'yilgen topıraqtan ha'm qılıshtan qorg'anıw ushın buzılg'an bul qaladag'ı u'yler ha'm Yahuda patshalarının' sarayları haqqında İzraildın' Qudayı Jaratqan İye bılay deydi:
5 Sizler kaldeyler menen urısasız, biraq olar u'ylerin'izdi Menin' qa'ha'rim ha'm g'a'zebim menen qırıp taslang'an o'li denelerge toltıradı. Olardın' islegen barlıq jawızlıqları ushın, Men bul qaladan ju'zimdi jasırdım.
6 Solay bolsa da, bul qalag'a ja'ne shıpa berip, onı sawaltaman. Men O'z xalqımdı emleymen. Olarg'a sheksiz abadanshılıq ha'm paraxatshılıq beremen.
7 Men Yahudanın' ha'm İzraildın' burıng'ı abadanshılıg'ın qayta tikleymen, olardı burıng'ıday qayta bina qılaman.
8 Olardı aldımda islegen barlıq gu'nalarınan tazalayman ha'm Mag'an qarsı bas ko'terip, islegen barlıq ayıpların keshiremen.
9 Du'nyadag'ı barlıq milletler olarg'a islegen ha'mme jaqsılıqlarımdı esitedi ha'm bul qala jer betindegi barlıq xalıqlar aldında Mag'an quwanısh, alg'ıs, ataq-abıray ha'm dan'q alıp keledi. Erusalimge islegen ha'mme jaqsılıqlarım ha'm bergen paraxatshılıg'ım tuwralı esitip, bul milletler qorqıp titiresedi.
10 Jaratqan İye bılay deydi: Sizler: «Bul orın wayran bolıp, adamsız ha'm haywansız sho'lge aylanadı», – dedin'iz. Biraq adamsız ha'm haywansız bosap qalg'an Yahuda qalalarında ha'm Erusalim ko'shelerinde.
11 shadlıq ha'm quwanısh sesleri, kelin ha'm ku'yew sesti, Jaratqan İyenin' İbadatxanasına minnetdarshılıq qurbanlıqların alıp kelgenlerdin' bılay degen dawısları esitiledi: «A'lemnin' Jaratqan İyesine shu'kirlik bildirin'! Ol iygilikli, sadıqlıg'ı sheksiz». O'ytkeni Men bul jerdin' burıng'ı abadanshılıg'ın qayta tikleymen, – deydi Jaratqan İye.
12 A'lemnin' Jaratqan İyesi bılay deydi: Adamsız ha'm haywansız bosap qalg'an bul jerde, onın' barlıq qalalarında ja'ne shopanlardın' o'z su'riwlerin bag'atug'ın jaylawları boladı.
13 Tawlı u'lkedegi qalalarda, batıstag'ı taw eteklerinde, Negebte, Benyamin jerlerinde, Erusalim a'tirapındag'ı ha'm Yahuda qalalarındag'ı aymaqlarda shopanlar ja'ne qoyların sanaytug'ın boladı, – deydi Jaratqan İye.
14 Sonday ku'nler keledi, – deydi Jaratqan İye, – İzrail ha'm Yahuda xalqı haqqında aytqan qayırlı wa'delerimdi orınlayman.
15 Sol ku'nlerde ha'm sol waqıtta Men Dawıttın' na'silinen bir a'dil shaqanı o'sirip shıg'araman. Ol jer betinde a'dalat ha'm a'dillikti ju'zege asıradı.
16 Sol ku'nlerde Yahuda qutqarıladı, Erusalim qa'wipsizlikte jasaydı. Onı «Jaratqan İye – a'dillik ornatıwshı» dep ataydı.
17 Sebebi Jaratqan İye bılay deydi: Dawıttın' na'silinen İzrail taxtında otıratug'ınlardın' izi u'zilmeydi.
18 Aldımda jandırılatug'ın qurbanlıqlardı beretug'ın, g'a'lle sadaqaların jandıratug'ın ha'm qurbanlıq shalatug'ın Lebiy a'wladınan bolg'an ruwxaniyler hesh qashan joq bolıp qalmaydı.
19 Eremiyag'a Jaratqan İyeden so'z tu'sti:
20 – Jaratqan İye bılay deydi: Eger kim de kim Menin' ku'ndiz ha'm tu'n menen du'zgen kelisimimdi buzıp, olardın' ta'rtibin o'zgerte alsa,
21 onda Men, qulım Dawıt penen du'zgen kelisimimdi buzıp, Dawıttın' na'silin taxttan tu'siremen. Sonday-aq, Mag'an xızmet qılıp atırg'an Lebiy urpaqları menen de du'zgen kelisimim buzılg'an esaplanadı.
22 Men qulım Dawıttın' urpaqların ha'm aldımda xızmet etetug'ın lebiylilerdi aspandag'ı juldızlarday, ten'iz jag'asındag'ı qumlarday san-sanaqsız etip ko'beytemen.
23 Eremiyag'a Jaratqan İyeden ja'ne so'z tu'sti:
24 – Mına xalıqtın': «Jaratqan İye O'zi tan'lap alg'an eki patshalıqtan da waz keshti», – dep aytıp ju'rgenin ko'rmedin' be? Olar endi Menin' xalqımdı kemsitip, ha'tte, onı millet dep atawg'a arlanıp atır.
25 Jaratqan İye bılay deydi: Haqıyqattan da, Men tu'n ha'm ku'n menen kelisim du'zdim, ko'klerdin' ha'm jerdin' ta'rtibin belgilep berdim.
26 Sonday-aq Yaqıptın' ha'm qulım Dawıttın' na'silinen hesh qashan waz keshpeymen. İbrayım, Isaq ha'm Yaqıp na'sili u'stinen Dawıttın' urpaqlarınan birin hu'kimdar etip qoyıwdı dawam etemen. Men xalqımnın' burıng'ı abadanshılıg'ın qayta tikleymen, olarg'a rehim qılaman.
