Eremiya 35 bob
1 Yahuda patshası İoshiyanın' ulı Ehoyakim hu'kimdarlıq qılg'an da'wirde Eremiyag'a Jaratqan İyeden mına so'z tu'sti:
2 – Rexabtın' urpaqlarına barıp, olar menen so'yles. Olardı Jaratqan İyenin' İbadatxanasının' bir bo'lmesine alıp kelip, ishiw ushın sharap ber.
3 Men Xabassiniyanın' aqlıg'ı Eremiyanın' ulı Yazaniyanı, onın' tuwısqanları menen balaların ha'm Rexabtın' urpaqların ertip,
4 Qudaydın' adamı bolg'an İgdaliya ulı Xanannın' ullarının' Jaratqan İyenin' İbadatxanasındag'ı bo'lmesine alıp bardım. Bul bo'lme basshılardın' bo'lmesinin' qaptalında, lawazımlı ruwxaniy Shallum ulı Maaseyanın' bo'lmesinin' joqarısında edi.
5 Keyin Rexabtın' urpaqlarının' aldına sharap tolı gu'zeler menen keselerdi qoyıp, olarg'a: – Sharaptan ishin'ler, – dedim.
6 Biraq olar bılay dep juwap berdi: – Bizler sharap ishpeymiz. Sebebi babamız Rexab ulı İonadab bılay dep buyrıq bergen: «O'zlerin' de sharap ishpen', a'wladların'ız da hesh qashan sharap ishpesin.
7 Hesh qashan u'y qurman', egin ekpen', ju'zim otırg'ızban'. Bulardan hesh biri sizlerde bolmasın. O'ytkeni sizler ba'rqulla shatırlarda jasawın'ız tiyis. Sonda ko'ship-qonıp ju'rgen jerlerin'izde uzaq o'mir ko'resiz».
8 Bizler babamız Rexab ulı İonadabtın' barlıq buyrıqların orınlap kelemiz. O'zlerimiz de, hayallarımız da, ul-qızlarımız da hesh qashan sharap ishpeymiz.
9 Jasaw ushın u'yler qurmadıq. Bizlerde ju'zimzar da, egislik atız da, egin de joq.
10 Bizler shatırlarda jasaymız. Babamız İonadabqa qulaq asıp, onın' buyrıqların orınlap kelemiz.
11 Biraq Babiloniya patshası Nabuxodonosor bul elge hu'jim qılg'anda, bizler «aramlılardın' ha'm kaldeylerdin' la'shkerlerinen qashıp, Erusalimge baramız» – dep sheshtik. Sol sebepli ha'zir de Erusalimde jasap atırmız.
12 Sonda Eremiyag'a Jaratqan İyeden so'z tu'sti:
13 – İzraildın' Qudayı A'lemnin' Jaratqan İyesi bılay deydi: Barıp, Yahuda xalqı menen Erusalim turg'ınlarına bılay dep ayt: «Sizler Menin' so'zlerimdi tın'lawdı qashan u'yrenesiz? – deydi Jaratqan İye.
14 – Rexab ulı İonadab o'z urpaqlarına sharap ishpewdi buyırdı. Olar babasının' buyrıg'ına boysınıp, usı ku'nge deyin sharap ishpeydi. Al Men sizlerge qayta-qayta aytsam da, sizler tın'lamadın'ız.
15 Men qullarım bolg'an payg'ambarlardın' ha'mmesin aldın'ızg'a jiberip: „Ha'r birin'iz jawız jolların'ızdan qaytıp, is-ha'reketin'izdi o'zgertin'. Basqa qudaylarg'a xızmet etiw ushın, olarg'a ermen'. Sonda o'zlerin'izge ha'm atababaların'ızg'a bergen jerimde jasaysızlar“, – dedim. Biraq sizler Meni tın'lamadın'ız, Mag'an qulaq aspadın'ız.
16 Rexab ulı İonadabtın' urpaqları ata-babalarının' o'zlerine bergen buyrıqların orınladı, al bul xalıq bolsa Meni tın'lamadı.
17 Sonlıqtan İzraildın' Qudayı, A'lemnin' Qudayı Jaratqan İye bılay deydi: Men O'zim aytqan ba'lelerdi Yahudada ha'm Erusalimde jasaytug'ın ha'r bir adamnın' basına jawdıraman. Sebebi Men olarg'a ayttım, olar tın'lamadı. Olardı shaqırdım, juwap bermedi».
18 Rexab urpag'ına bolsa, Eremiya bılay dedi: – İzraildın' Qudayı A'lemnin' Jaratqan İyesi bılay deydi: «Sizler baban'ız İonadabtın' buyrıqlarına boysınıp, olarg'a a'mel qılıp, o'zlerin'izge tapsırg'anlarının' ha'mmesin orınladın'ız.
19 Sonlıqtan İzraildın' Qudayı A'lemnin' Jaratqan İyesi bılay deydi: Rexab ulı İonadabtın' urpag'ınan Menin' aldımda xızmet etetug'ın adamnın' izi u'zilmeydi».
