Eremiya 39 bob
1 Yahuda patshası Sedekiyanın' hu'kimdarlıg'ının' tog'ızınshı jılının' onınshı ayında Babiloniya patshası Nabuxodonosor pu'tkil ordası menen Erusalimge ju'ris qılıp, onı qamalg'a aldı.
2 Sedekiyanın' patshalıg'ının' on birinshi jılının' onınshı ayının' tog'ızınshı ku'ni diywal buzıldı.
3 Erusalim qolg'a alıng'anda, Babiloniya patshasının' barlıq ha'meldarları ishke kirip, Ortadag'ı da'rwazada otırdı. Olar: NergalShareser, Samgar-Nebo, a'skeriy wa'kil Sarsexim, bas ma'sla'ha'tshi Nergal-Shareser ha'm patshanın' barlıq ha'meldarları edi.
4 Yahuda patshası Sedekiya ha'm onın' barlıq a'skerleri olardı ko'rgende, tu'nde patshanın' bag'ının' janındag'ı, eki diywal arasındag'ı da'rwaza arqalı shıg'ıp, İordan tegisligine qaray qashıp ketti.
5 Biraq kaldey la'shkerleri olardı quwıp, Erixo tegisliginde izinen jetti ha'm Sedekiyanı uslap, tutqıng'a aldı da, Xamat u'lkesinin' Ribla qalasındag'ı Babiloniya patshası Nabuxodonosorg'a alıp bardı. Sol jerde patsha Sedekiyanın' u'stinen hu'kim shıg'ardı.
6 Babiloniya patshası Riblada Sedekiyanın' ulların ko'z aldında bawızlattı. Ja'ne de, ol Yahudanın' barlıq aqsu'yeklerin de bawızlattı.
7 Bunnan keyin, Sedekiyanın' ko'zlerin oydırdı, Babilong'a alıp ketiw ushın onı qola shınjır menen baylattı.
8 Kaldeyler patshanın' sarayın, xalıqtın' u'ylerin o'rtep, Erusalim diywalların qulattı.
9 Qalada aman qalg'an adamlardı ha'm Babiloniya patshası ta'repke o'tken qashqınlardı qalg'an xalıq penen birge saqshılar baslıg'ı Nabuzaradan Babilong'a tutqın qılıp alıp ketti.
10 Biraq Nabuzaradan hesh na'rsesiz ju'da' jarlı biysharalardı Yahuda jerinde qaldırıp, sol waqıtta olarg'a ju'zimzarlar ha'm atızlar berdi.
11 Babiloniya patshası Nabuxodonosor saqshılar baslıg'ı Nabuzaradang'a Eremiya tuwralı mınaday buyrıq berdi:
12 «Onı uslap alıp, ko'zqulaq bol. Og'an hesh qanday zıyan keltirme, ne sorasa, sonı isle».
13 Patsha saqshılarının' baslıg'ı Nabuzaradan, a'skeriy wa'kil Nabushazban, bas ma'sla'ha'tshi Nergal-Shareser ha'm Babiloniya patshasının' barlıq ha'meldarları
14 adam jollap, Eremiyanı saqshılar ha'wlisinen aldırttı. Olar Shafannın' aqlıg'ı Axiqamnın' ulı Gedaliyag'a Eremiyanı u'yine alıp ketiwdi tapsırdı. Solay etip, Eremiya o'z xalqı arasında qaldı.
15 Qarawıllar ha'wlisinde qamaqta bolg'an waqtında, Eremiyag'a Jaratqan İyeden mınaday so'z tu'sken edi:
16 – Barıp, xabashstanlı Ebed-Melexke ayt, İzraildın' Qudayı A'lemnin' Jaratqan İyesi bılay deydi: «Men bul qala tuwralı aytqan so'zlerimdi jaqsılıq penen emes, al jamanlıq penen ju'zege asıraman. Bular senin' ko'z aldın'da a'melge asadı.
17 Biraq sol ku'ni Men seni qutqaraman, – deydi Jaratqan İye. – Sen o'zin' qorqıp ju'rgen adamların'nın' qolına tu'speysen'.
18 Men seni qutqaraman. Sen qılıshtan qaza tappaysan', Mag'an u'mit artqanın' ushın, janın' o'zin'e olja boladı, – deydi Jaratqan İye».
