Eremiya 4 bob
1 «Ha'y, İzrail! Eger qaytpaqshı bolsan', – deydi Jaratqan İye, – Eger Mag'an qaytpaqshı bolsan', Jerkenishli butların'dı Menin' ko'zimnen jog'altsan', Joldan azg'ırılmay ju'rsen',
2 Haqıyqat, a'dalat ha'm tuwrılıq penen: „Tiri Jaratqan İye haqı ant ishemen“, – desen', Onda milletler Men arqalı jarılqanıp, Menin' menen maqtanadı.
3 Jaratqan İye Yahuda xalqına ha'm Erusalim turg'ınlarına bılay deydi: Su'rilmegen jerin'izdi su'rin', Tikenler arasına tuqım seppen'.
4 Yahuda xalqı ha'm Erusalim turg'ınları, Ju'regin'izdegi jamanlıqlardı alıp taslap, Mag'an, Jaratqan İyege o'zin'izdi bag'ıshlan'. Bolmasa, jawız islerin'iz sebepli, G'a'zebimdi ot kibi lawlataman, Onı hesh kim so'ndire almas».
5 Yahudada ja'riyalap, Erusalimde jar salıp, bılay den'ler: „El boylap ka'rnay shalın'!“ Baqırıp bılay dep aytın': „Jıynalıp, qorg'anlı qalalarg'a qashayıq!“
6 Siong'a qashın' dep, bayraq ko'terin'! Sızılmay, tezirek qashıp qutılın'! O'ytkeni Men arqa ta'repten apat, Ullı qırg'ın alıp kelemen.
7 Arıslan ininen shıqtı, Milletlerdi joq qılıw ushın jolg'a shıqtı. Jerin'di wayran etiw ushın, Ol o'z ornın ta'rk etti. Yahuda, senin' qalaların' qarabaqanag'a aylanadı, Adamsız hu'wlep qaladı.
8 Sonın' ushın aza kiyimin kiyip, zarlap jılan', Sebebi Jaratqan İyenin' lawlag'an g'a'zebi bizdi shetlep o'tpedi.
9 Sol ku'ni, – deydi Jaratqan İye, – Patshanın' ha'm ha'meldarlardın' ju'rekleri suwlaydı, Ruwxaniylerdi qorqınısh biylep alıp, Payg'ambarlar an'-tan' boladı».
10 Sonda men bılay dedim: – Wah, Quday İye! «Sizlerge tınıshlıq boladı», – dep, bul xalıqtı ha'm Erusalimdi pu'tkilley aldadın'. Qılısh alqımına taqalıp tur-g'o!
11 «Sol waqıtta bul xalıqqa ha'm Erusalimge bılay dep aytıladı: „Sho'ldegi jalan'ash to'belerden esken ıssı samal Menin' xalqım ta'repke espekte. Biraq ol qırman suwırıw yaki da'ndi tazalaw ushın emes.
12 Mennen keletug'ın samal ju'da' ku'shli boladı. Olardın' u'stinen hu'kim shıg'aratug'ın waqıt keldi. Bunı Men aytaman“.
13 A'ne, dushpan bult kibi jaqınlap kiyatır, Sawash arbaları quyıng'a megzer. Atları bu'rkitten de shaqqan. Sorımız qurısın, sorlap qaldıq!
14 Ha'y, Erusalim! Ju'regin'di jamanlıqtan tazala, qutqarılasan'. Jawız niyetlerin'di qashang'a deyin ishin'de saqlamaqshısan'?
15 Dannan bir dawıs esitiledi, Efrayım tawınan apatshılıq xabarı kelmekte.
16 Milletlerge ja'riyalap, Erusalimge xabarlan': Alıslardan basqınshılar kiyatır, Yahuda qalalarına qarsı sawash su'renin aytıp baqırmaqta.
17 Olar atızdag'ı saqshılarg'a uqsap, Erusalimdi qorshap aladı. Sebebi Erusalim Mag'an qarsı bas ko'terdi, – deydi Jaratqan İye. –
18 Bulardın' ha'mmesin basın'a salg'an, Senin' jolların' ha'm islerin' boladı. Bul jawızlıg'ın'nın' kesapatı. Qanday ashshı! Bul senin' ju'regin'nin' to'rine jetti!»
19 Way, janım! Way, janım! Azarına shıday almayman! Wah, ju'regim! Ju'regim ha'siret shegip atır! U'ndemey tura almayman, Sebebi ka'rnay sestin, sawash shawqımın esittim.
20 Apatshılıq izinen apatshılıq keldi, Pu'tkil jurt was-wayran boldı. Ko'zdi ashıp-jumg'ansha, shatırlarım, Bir demde perdelerim jırtılıp ketti.
21 Qashang'a deyin, men sawash bayraqların ko'rip, Ka'rnay seslerin esite beremen?
22 «Menin' xalqım aqmaq, Olar Meni tanımaydı. Olar nadan balalar, olarda tu'sinik joq. Olar jamanlıq qılıwg'a sheber, Jaqsılıq qılıwdı bilmeydi».
23 Men, Eremiya jerge qaradım, Ol bos ha'm tu'ssiz edi. Aspang'a qaradım, onda nur joq edi.
24 Tawlarg'a qaradım, olar qaltırasar, Pu'tkil to'beler terbelip turar edi.
25 Qaradım, wah, hesh kim joq, Ko'ktegi barlıq quslar ushıp ketken edi.
26 Qaradım, wah, hesh kim joq, Ko'ktegi barlıq quslar ushıp ketken edi.
27 Jaratqan İye bılay deydi: «Men bul jerdi pu'tkilley joq qılmasam da, Onın' ha'mmesi qan'ırap, bosap qaladı.
28 Sonlıqtan jer aza tutıp, aspan tu'neredi. Men ayttım, Men qarar qıldım, O'kinbeymen, pikirimnen qaytpayman.
29 Barlıq qala xalqı, Atlılardın' ha'm sadaqshılardın' shawqımınan qashadı. Kimisi qalın' putalarg'a tıg'ıladı, Kimisi jartaslarg'a o'rmeleydi. Ha'mme qalalar qan'ırap qaladı, Olarda jasaytug'ın hesh kim bolmaydı.
30 Ha'y, wayran bolg'an sen! Nege qırmızı kiyim kiyip aldın'? Ne ushın altın tag'ınshaqlar tag'ıp, Ko'zlerin'di baqıraytıp boyap aldın'? Biykarg'a bezenip alıpsan'. Oynasların' seni jek ko'redi, Olar senin' janın'dı almaqshı.
31 Men tolg'atıp atırg'an hayaldın' baqırg'an dawısına, Birinshi balasın tuwıp atırg'an hayaldın', In'qıldısına uqsag'an dawıstı esitip turman. Men qız Sionnın' entikken dawısın esitip turman. Ol qolların sozıp bılay demekte: „Sorım qurısın! Janımdı almaqshı bolg'anlar aldında dimarım qurıdı“».
