Eremiya 40 bob
1 Babiloniyag'a su'rgin etilgen pu'tkil Erusalim ha'm Yahuda tutqınları menen birge Eremiya da shınjır menen baylanıp, Ramag'a alıp barıldı. Ol jerde saqshılar baslıg'ı Nabuzaradan Eremiyanı tawıp, onı bosattı. Sonda Eremiyag'a Jaratqan İyeden so'z tu'sti.
2 Saqshılar baslıg'ı Eremiyanı qasına shaqırıp alıp, og'an bılay dedi: – Qudayın' Jaratqan İye bul elge apatshılıq jawdırajag'ın aytqan eken.
3 Mine, onı jawdırıp, aytqanınday qıldı. Bulardın' ha'mmesi Jaratqan İyege qarsı gu'na islegenin'iz ha'm Og'an qulaq salmag'anın'ız sebepli bolıp otır.
4 Bu'gin men seni qolın'dag'ı shınjırlardan azat etemen. Eger menin' menen Babilong'a ketiwdi qa'lesen', ju'r, men sag'an ko'zqulaq bolaman. Eger ketiwdi qa'lemesen', onda qal. Mine, pu'tkil el aldın'da jatır! Qay jaqqa ketiwdi qa'lesen', yaki qay jaqqa ketiwdi na'zerin'de tuwrı dep tapsan', sol jerge kete ber.
5 Eremiya juwap berip u'lgermey-aq, Nabuzaradan so'zin dawam etti: – Babiloniya patshası ta'repinen Yahuda qalalarına ha'kim etip qoyılg'an Shafannın' aqlıg'ı Axiqam ulı Gedaliyanın' janına bar. Onın' menen birge xalıq arasında jasay ber. Yamasa qay jaqqa ketiwdi qa'lesen', sol jaqqa ket. Saqshılar baslıg'ı og'an azıq-awqat ha'm sawg'alar berip, bosatıp jiberdi.
6 Eremiya Mispadag'ı Axiqamnın' ulı Gedaliyanın' janına ketti. Mispag'a barıp, onın' menen birge elde qalg'an xalıqtın' arasında jasadı.
7 Dalalarda boy tasalap qalg'an barlıq a'skerbasılar ha'm olardın' adamları Babiloniya patshasının' Axiqam ulı Gedaliyanı ha'kim qılıp qoyg'anın ha'm su'rginge alıp ketilmegen jarlı erkeklerdi, hayallardı ha'm balalardı og'an tapsırg'anın esitti.
8 Sonda Nataniya ulı İsmayıl, Qareax ulları Yuxanan menen İonatan, netofalı Tanxumet ulı Seraya, netofalı Efay ulları, maaxalı Ezaniya ha'm olardın' a'skerleri Mispag'a Gedaliyag'a keldi.
9 Shafannın' aqlıg'ı Axiqam ulı Gedaliya olarg'a ha'm olardın' a'skerlerine ant iship, bılay dedi: – Kaldeylerge xızmet etiwden qorqpan'. Elge ornalasıp alıp, Babiloniya patshasına xızmet etin', sonda abadan turmısqa erisesiz.
10 Men bul jerge keletug'ın kaldeylerge wa'killik qılıw ushın Mispada jasap qalaman. Sizler sharap, jazg'ı miyweler ha'm za'ytu'n mayın jıynap, saqlap qoyın'lar da, o'zlerin'iz ornalasıp alg'an qalalarda jasay berin'ler.
11 Moabta, ammonlardın' arasında, Edomda ha'm basqa ellerde jasap atırg'an yahudiylerdin' ha'mmesi Babiloniya patshası Yahudada bir topar adamlardı qaldırg'anın, olarg'a Shafannın' aqlıg'ı Axiqamnın' ulı Gedaliyanı ha'kim qılıp qoyg'anın esitti.
12 Olardın' ha'mmesi su'rgin qılıng'an jerlerdin' ba'rinen Yahuda jerine, Mispag'a, Gedaliyanın' aldına qaytıp keldi. Olar sol jerde ko'p miywe jıynap, mol sharap tayarladı.
13 Qareax ulı Yuxanan menen sho'l daladag'ı a'skerbasılar Mispadag'ı Gedaliyag'a kelip,
14 og'an: – Ammonlardın' patshası Baalistin' sizdi o'ltiriw ushın Netaniya ulı İsmayıldı jibergeninen xabarın'ız bar ma? – dedi. Biraq Axiqam ulı Gedaliya bug'an isenbedi.
15 Keyin Qareax ulı Yuxanan Mispada jasırın tu'rde Gedaliyag'a: – Kelin', men barıp, Netaniya ulı İsmayıldı o'ltireyin, bunı hesh kim bilmeydi. Ne ushın sizdi o'ltiriwine, janın'ızg'a jıynalg'anlardın' tarqap ketiwine ha'm Yahudada qalg'anlardın' nabıt bolıwına jol qoyıwımız kerek? – dedi.
16 Biraq Axiqam ulı Gedaliya Qareax ulı Yuxanang'a: – Bulay isleme, sen İsmayıl tuwralı jalg'an aytıp tursan', – dedi.
