Eremiya 42 bob
1 Keyin barlıq a'skerbasılar, Qareax ulı Yuxanan, Hoshaya ulı Ezaniya ha'm u'lken-kishi pu'tkil xalıq Eremiya payg'ambarg'a kelip,
2 og'an bılay dedi: – O'tinishimizdi qabıl etip, bizler ushın, mına aman qalg'anlar ushın Qudayın' Jaratqan İyege duwa et. Ko'rip turg'anın'day, ko'pten az qaldıq.
3 Qay jerge barıp, ne isleytug'ınımızdı Qudayın' Jaratqan İye bizge ko'rsetsin.
4 Eremiya payg'ambar olarg'a: – Yaqshı, aytqanın'ızday, men Qudayın'ız Jaratqan İyege duwa etemen ha'm Jaratqan İye ne dep juwap berse de, onı sizlerge ayan qılaman. Sizlerden hesh na'rseni jasırmayman, – dedi.
5 Olar Eremiyag'a ja'ne bılay dedi: – Eger Qudayın' Jaratqan İye bizge bildiriw ushın sag'an ayan etken ha'r bir so'zge a'mel qılmasaq, Jaratqan İyenin' O'zi bizlerge qarsı haqıyqıy ha'm sadıq gu'wa bolsın.
6 Jaqsı bolsa da, jaman bolsa da, bizler seni janına jiberip atırg'an Qudayımız Jaratqan İyege qulaq asamız. Qudayımız Jaratqan İyege qulaq assaq, abadan turmısqa erisemiz.
7 On ku'nnen keyin, Eremiyag'a Jaratqan İyeden so'z tu'sti.
8 Eremiya Qareax ulı Yuxanandı, onın' menen birge a'skerbasılardı ha'm u'lken-kishi pu'tkil xalıqtı shaqırıp,
9 olarg'a bılay dedi: – O'tinishin'izdi bildiriw ushın meni İzraildın' Qudayı Jaratqan İyenin' da'rgayına jibergen edin'iz. Ol bılay deydi:
10 «Eger usı jerde qalsan'ız, Men sizlerdi qayta tikleymen, qulatpayman, otırg'ızaman, qoparıp taslamayman. Sebebi Men O'zim basın'ızg'a salg'an apatshılıq sebepli o'kinip atırman.
11 O'zlerin'iz qorqıp atırg'an Babiloniya patshasınan endi qorqpan'. Onnan qorqpan', – deydi Jaratqan İye, – Men sizler menen birge bolaman. Sizlerdi onın' qolınan qutqaraman ha'm azat etemen.
12 Men sizlerge rehim qılaman, sonda onın' sizlerge janı ashıp, sizlerdi o'z jerin'izge qaytaradı».
13 Eger sizler: «Bul jerde qalıwdı qa'lemeymiz», – dep Qudayın'ız Jaratqan İyenin' so'zine qulaq salmasan'ız,
14 a'ne: «Yaq, bizler Mısırg'a ketemiz. Ol jerde urıs ta ko'rmeymiz, onı xabarlag'an ka'rnay sestin de esitpeymiz, nang'a zar bolmaymız, sol jerde jasaymız», – desen'iz,
15 onda Yahudanın' aman qalg'anları, Jaratqan İyenin' so'zin tın'lan'! İzraildın' Qudayı A'lemnin' Jaratqan İyesi bılay deydi: «Eger sizler Mısırg'a barıwg'a qarar etip, sol jerge barıp jasasan'ız,
16 sizler qorqqan qılısh ol jerde izin'izden jetedi, sizler qorqqan ashlıq Mısırda jag'an'ızg'a jabısadı ha'm sizler sol jerde o'lesiz.
17 Mısırg'a barıp jasawdı qarar qılg'an ha'r bir adam qılıshtan, ashlıqtan ha'm obadan o'ledi. Men basın'ızg'a jawdıratug'ın apatshılıqtan hesh kim tiri qalmaydı, hesh kim qashıp ta qutıla almaydı».
18 İzraildın' Qudayı A'lemnin' Jaratqan İyesi bılay deydi: «Erusalim turg'ınlarına qa'ha'r-g'a'zebim to'gilgenindey, Mısırg'a kirgenin'izde, sizlerge de g'a'zebim to'giledi. Sizler g'arg'ısqa qalıp, qorqınıshlı ko'riniske aylanasız, na'letlenip, masqara bolasız. Bul jerdi qaytıp ko'rmeysiz».
19 Ha'y, Yahudanın' aman qalg'anları! Jaratqan İye sizlerge Mısırg'a ketpewdi buyırdı. Bilip qoyın', bu'gin men sizlerge eskertip atırman.
20 Meni Qudayın'ız Jaratqan İyenin' da'rgayına jiberip: «Bizler ushın Qudayımız Jaratqan İyege duwa et. Onın' aytqanlarının' ha'mmesin bizlerge bildir, bizler de og'an a'mel qılamız», – degenin'izde, u'lken qa'tege jol qoydın'ız.
21 Men bu'gin sizlerge bunı bildirdim, biraq sizler Qudayımız Jaratqan İyenin' men arqalı aytqan so'zlerine qulaq salmadın'ız.
22 Endi jaqsılap bilip qoyın', barıp jasamaqshı bolg'an jerin'izde qılıshtan, ashlıqtan ha'm obadan o'lesiz.
