1 – Qa'nekey, basım suw tolı qudıq, Ko'zlerim ko'z jas shıg'atug'ın bulaq bolsa edi! Xalqımnın' qaza tapqanları ushın, Ku'ni-tu'ni joqlaw aytıp, jılar edim!
2 Qa'nekey, sho'lde men ushın bir ka'rwan saray bolsa edi! Xalqımdı taslap, olardan uzaqlasar edim! Sebebi olardın' ha'mmesi buzıq, Opasızlar jıyındısı.
3 – Olar jalg'an ushın tillerin oq jay kibi iyedi, Nahaqlıqtın' arqasınan olar jerde ku'sheyip barmaqta, Jawızlıq u'stine jawızlıq qılmaqta, Meni hasla tanımaydı, – deydi Jaratqan İye. –
4 Ha'r birin'iz o'z dostın'ızdan saqlanın', Tuwısqanların'ızdın' birde birewine isenben'. Sebebi ha'r bir tuwısqan jalg'anshı, Ha'r bir dos o'sekshi.
5 Ha'r kim o'z dostısın aldaydı, Hesh kim haqıyqattı so'ylemeydi. Tillerin jalg'an so'ylewge u'yretken, Qılmıs islew menen o'zlerin harıqtırdı.
6 Sen, Eremiya, o'tirikshiler arasında jasap atırsan', O'tirikshiligi sebepli olar Meni tanıwdan bas tartadı, – deydi Jaratqan İye.
7 Sonlıqtan A'lemnin' Jaratqan İyesi bılay deydi: – Men olardı otta eritip, sınaqtan o'tkeremen. Xalqımnın' jaman isine bunnan basqa ne qılayın?
8 Olardın' tilleri o'ltiretug'ın oq, Hiyle menen so'yleydi, Dostı menen ko'zabag'a jaqsı so'ylesedi, Biraq ishinen og'an duzaq quradı.
9 Bular ushın Men olardı jazalamayın ba? – deydi Jaratqan İye, – Bunday milletten o'sh almayın ba?
10 – Men tawlar ushın jılap-sıqlap, Daladag'ı jaylawlar ushın joqlaw aytaman. Olar ku'yip, sho'lge aylandı, Hesh kim ol jerden o'tpeydi, Mallardın' dawısı da esitilmeydi. Quslar da, haywanlar da ol jerden qashıp ketken.
11 – Men Erusalimdi tas u'yindisine, Sag'allardın' ma'kanına aylandıraman. Yahuda qalaların sho'lge aylandırıp, Adamsız bos qaldıraman.
12 Bunı tu'siniwge kimnin' danalıg'ı jetedi? Bul jerdin' ne ushın qurıp, wayran bolıp, hesh kim ju'rmeytug'ın sho'lge aylang'anın bizge tu'sindiretug'ınday, Jaratqan İyenin' awzınan shıqqan so'zdi kim alıp, ja'riyaladı?
13 Jaratqan İye bılay deydi: – Olar Menin' o'zlerine bergen Nızamımdı orınlawdan bas tarttı, dawısıma qulaq aspadı ha'm Nızamıma say jasamadı.
14 Kerisinshe, olar qaysarlıq penen o'z ju'rek qa'lewlerine berilip, ata-babaları u'yretkenindey, Baallarg'a erdi.
15 Sonın' ushın A'lemnin' Jaratqan İyesi İzraildın' Qudayı bılay deydi: – Men bul xalıqqa ashshı juwsan jegizip, za'ha'rli suw ishkizemen.
16 Men olardı o'zleri de, ata-babaları da tanımaytug'ın milletlerdin' arasına tarqatıp jiberemen. Olar tolıq qırılıp bolmag'ansha, izine qılısh salaman.
17 A'lemnin' Jaratqan İyesi bılay deydi: – Oylanıp ko'rin'! Joqlaw aytıp jılaytug'ın hayallardı shaqırın'! Olardın' en' sheberlerin aldırtın'!
18 Jıldam kelip, bizler ushın jılasın, Ko'zimizden jas shıg'arıp, Qabag'ımızdan suwday ag'ızsın.
19 Sionnan joqlaw aytıp jılag'an dawıs esitiledi: «Bizler wayran boldıq! Qattı uyatqa qaldıq! Jerimizdi ta'rk ettik, Ma'kanımız jer menen jeksen boldı».
20 Ha'y, hayallar, Jaratqan İyenin' so'zin tın'lan'! Awzınan shıqqan so'zge qulaq salın'! Qızların'ızg'a jılawdı, Olardın' doslarına joqlaw jırın aytıwdı u'yretin'.
21 Ko'shelerde balalardı, Maydanlarda jaslardı qırıp taslaw ushın, O'lim a'yneklerimizge tırmasıp, Qorg'an qalalarımızg'a kirdi.
22 Olarg'a ayt, Jaratqan İye bılay deydi: – Adamnın' o'li deneleri, Ashıq daladag'ı qıy sıyaqlı, Oraqshılardan qalg'an masaq sıyaqlı shashılıp jatadı. Olardı jıynap alatug'ın hesh kim bolmaydı.
23 Jaratqan İye bılay deydi: – Dana adam danalıg'ı menen, Ku'shli ku'shi menen, Bay baylıg'ı menen maqtanbasın.
24 Maqtang'an adam Meni tu'singeni ha'm tanıg'anı menen, Jer ju'zinde su'yispenshilik, A'dalat ha'm tuwrılıqtı ju'zege asıratug'ın, Jaratqan İye Men ekenim menen maqtansın. Bulardan Men ra'ha'tlenemen, – deydi Jaratqan İye.
25 Sonday ku'nler keledi, – deydi Jaratqan İye, – tek ko'zabag'a su'nnetlengenlerdin' ha'mmesin jazalayman.
26 Mısırdı, Yahudanı, Edomdı, ammonlardı, Moabtı ha'm sho'lde jasap, tulımshaqların kesetug'ınlardın' ha'mmesin jazalayman. O'ytkeni bul milletlerdin' ba'ri su'nnetsiz, pu'tkil İzrail xalqının' da ju'regi su'nnetsiz.
