Joqlaw 4 bob
1 A'ttegene-ay! Qalayınsha altın qarawıttı! Sap altın jaltıramay qaldı! Ha'r ko'shenin' basında, Muxaddes hasıl taslar shashılıp jatır.
2 Sionnın' a'ziz balaları, Sap altınday qa'dirli edi. Eh, endi bolsa, gu'lalshının' qolınan shıqqan, Ilay ıdıstay qa'dirsiz bolıp qaldı.
3 Ha'tte, sag'allar da emshek berip, O'z balaların emizedi. Biraq menin' xalqım sho'ldegi tu'yequs kibi, Balalarına rehimsiz boldı.
4 Na'restenin' tili sho'lden, Tan'layına jabısıp qaldı. Balalar nan sorap, tilenbekte, Biraq olarg'a hesh kim bir tislem nan bermeydi.
5 La'zzetli tag'amlar jep jasag'anlar, Ko'shelerde ashlıqtan nabıt bolmaqta. Qırmızı kiyim kiyip o'skenler, U'yilgen taslandılardan awqat izlemekte.
6 Xalqımnın' jazası, Adamzat qolı tiymesten, Bir demde joq bolg'an, Sodomnın' jazasınan da awır.
7 Erusalim jolbasshıları qardan da taza, Su'tten de aq edi. Deneleri yaqıttay qızıl, Ko'rinisi lazuritke megzer edi.
8 Endi bolsa ko'mirden de qara, Ko'shelerde adam tanıp bolmas olardı, Etleri su'yeklerine jabısıp qalg'an, Kewip qalg'an ag'ashqa aylang'an.
9 Ashlıqtan o'lgennen go're, Qılıshtan o'lgen abzalıraq edi. Jerdin' o'niminen mahrum bolıp, Ashlıq azabınan jan ta'slim qıldı.
10 Miyrimli hayallar o'z balaların, O'z qolları menen pisirdi. Xalqım wayran bolg'an waqıtta, Perzentleri olarg'a azıq boldı.
11 Jaratqan İye qa'ha'rin tolıq shashtı, Lawlag'an g'a'zebin to'kti. Siong'a qarsı tutandırg'an otı, Onın' tiykarların da jandırıp jiberdi.
12 Jer ju'zindegi patshalardın' da, Du'nyadag'ı insanlardın' da hesh biri, Erusalim da'rwazaların dushpanlardın', Jawlardın' jarıp o'tetug'ınına isenbedi.
13 Bularg'a Erusalim payg'ambarlarının' gu'nası, Ruwxaniylerinin' qılmısı sebepshi boldı. Sebebi olar qala ortasında, A'dillerdin' qanın to'kti.
14 Endi olar soqır adamday, Ko'shelerde qan'g'ıp ju'r. U'stileri qan menen haramlang'an, Olarg'a hesh kimnin' jaqınlag'ısı kelmeydi.
15 Xalıq olarg'a: «Joq bolın', ha'y, haramılar! Ketin'ler, ketin'ler, qol tiygizben'ler!» – dep baqıradı. Olar solay quwılıp, sergizdan boladı. Biraq milletler arasında da olarg'a bılay delinedi: «Bul jerden shıg'ıp ketin'ler!»
16 Jaratqan İyenin' O'zi olardı tarattı, Ol endi olarg'a na'zer salmaydı. Ruwxaniylerge hu'rmet, Jası u'lkenlerge miyrim ko'rsetilmeydi.
17 Biyhuda ja'rdem ku'tiwden, Ko'zlerimiz taldı. Minarada turıp ku'ttik, Qutqara almaytug'ın xalıqtı.
18 Dushpan adımımızdı an'lıdı, O'z ko'shelerimizde ju're almay qaldıq. A'jel jetip, ku'nlerimiz tawısıldı, O'mirimiz payanına jetti.
19 Bizdi quwdalag'anlar, Ko'klerdegi bu'rkitten de shaqqan. Olar tawlarda bizlerdi awladı, Sho'llerde an'lıp jattı.
20 O'mirimiz demi, Jaratqan İyenin' maylag'an patshası, Olardın' duzag'ına tu'sti. Bizler ol tuwralı: «Onın' sayasında, Milletler arasında jasaymız», – degen edik.
21 Ha'y, Us elinde jasaytug'ın, Qız Edom! Shadlan, quwan! Biraq sag'an da jaza kesesi jetip baradı, Ma's bolıp, kiyimin'di sheshesen'.
22 Ha'y, qız Sion! Qılmısın'nın' jazası tamamlandı, İye seni su'rginde uzaq uslap turmaydı. Biraq ha'y, qız Edom, senin' gu'naların'dı ashıp taslap, Qılmısların' ushın seni jazalaydı.
