Ezekiel 13 bob
1 Mag'an Jaratqan İyeden so'z tu'sti:
2 – İnsan ulı, ha'zir payg'ambarshılıq qılıp atırg'an İzrail payg'ambarları menen so'yles. O'zliginen payg'ambarshılıq qılıp atırg'anlarg'a ayt: «Jaratqan İyenin' so'zin tın'lan'!
3 Quday İye bılay deydi: Hesh na'rse ko'rmey, ayanlardı o'zleri qıyalınan shıg'arıp ju'rgen aqılsız payg'ambarlardın' sorı qurısın!
4 İzrail, senin' payg'ambarların' qarabaqanalar arasındag'ı sag'allarg'a uqsaydı.
5 Jaratqan İyenin' ku'ni kelgende, İzrail xalqı sawashta bekkem turıwı ushın, olar diywallarg'a shıg'ıp, olardın' opırılg'an jerlerin du'zetpedi.
6 Olardın' ayanları o'tirik, ashqan palları jalg'an. Olardı Jaratqan İye jibermegen bolsa da: „Jaratqan İye usılay aytadı“, – dep ja'riyalaydı ha'm sol so'zlerdin' orınlanıwın ku'tedi.
7 Men aytpag'an bolsam da: „Bunı Jaratqan İye aytadı“, – degenin'izde, jalg'an ayanlar ko'rip, o'tirik boljawlardı aytpadın'ız ba?
8 Sonlıqtan Quday İye bılay deydi: Sizlerdin' so'zlerin'iz o'tirik ha'm ayanların'ız jalg'an. Bunın' ushın Men sizlerge qarsı shıg'aman, – deydi Quday İye.
9 – Jalg'an ayanlar ko'rip, o'tirik boljawlar aytatug'ın payg'ambarlarg'a qarsı qolımdı ko'teremen. Olar Menin' xalqımnın' ken'esinde qatnaspaydı, İzrail xalqının' dizimine tirkelmeydi ha'm İzrail jerine kirmeydi. Sonda sizler Menin' Quday İye ekenimdi bilesiz.
10 Sebebi bul payg'ambarlar tınıshlıq bolmaytug'ın bolsa da, tınıshlıq bolatug'ının aytıp, Menin' xalqımdı azg'ırdı. Olar ha'lsiz diywaldı ha'klegendey qıldı.
11 Olardı ha'klep atırg'anlarg'a diywaldın' qulaytug'ının ayt. No'ser jawın quyıp, u'lken burshaq jawıp, ku'shli dawıl ko'teriledi.
12 Diywal qulag'anda, adamlar jaqqan ha'gin'izdin' qayaqta ekenin soramay ma?
13 Endi Quday İye bılay demekte: Men g'a'zeplenip, ku'shli dawıl turg'ızaman, qa'ha'rim menen no'ser ha'm burshaq jawdırıp, diywaldı opat qılaman.
14 Sizler ha'klegen diywaldı qulatıp, jer menen jeksen etemen, onın' tu'bi ko'rinip qaladı. Diywal qulag'anda, sizler astında qalıp, nabıt bolasız. Sonda Menin' Jaratqan İye ekenimdi bilip alasız.
15 Men diywalg'a ha'm onı ha'klegenlerge g'a'zebimdi tolıq shashıp, sizlerge: „Diywal da, onı ha'klegenler de joq boldı,
16 yag'nıy Erusalimde tınıshlıq bolmaytug'ın waqıtta tınıshlıqtın' keletug'ının aytıp, payg'ambarshılıq qılg'an İzraildın' payg'ambarları joq boldı“, – deymen, – deydi Quday İye».
17 – Al endi, insan ulı, o'zinshe payg'ambarshılıq etip ju'rgen xalqın'nın' hayal-qızlarına ju'zin'di bur da, olarg'a qarsı payg'ambarshılıq qıl.
18 Olarg'a Quday İye bılay deydi dep ayt: «Ha'r bir adamnın' janın awlap, olardın' qollarına tumar taqqan ha'm adamlardın' basına tu'rli o'lshemdegi japqısh tikken hayallardın' sorı qurıydı! Xalqımnın' janına qaslıq qılıp, o'z janımdı saqlap qalaman dep oylaysız ba?
19 Bir neshe uwıs arpa ha'm bir neshe tislem nan ushın, xalqımnın' aldında Meni xorladın'ız. Jalg'ang'a ha'wes bolg'an xalqıma o'tirik so'ylep, o'liwge tiyisli bolmag'an adamdı o'ltirdin'iz, o'liwi kerek adamnın' janın aman saqlap qaldın'ız.
20 Sonlıqtan Quday İye bılay deydi: Men sizlerdin' adam janın qus kibi awlap atırg'an tumarların'ızg'a qarsıman. Olardı qolların'ızdan julıp alaman, qus kibi awlag'an janların'ızdı azat qılaman.
21 Japqıshların'ızdı da jırtıp, xalqımdı qolın'ızdan qutqaraman. Olar endi sizlerge olja bolmaydı. Sonda sizler Menin' Jaratqan İye ekenimdi bilip alasız.
22 Men haq adamg'a zıyan keltirmekshi bolmasam da, sizler o'tirik penen onı u'mitsizlendirdin'iz. Sizler nahaq adamdı qollap quwatladın'ız. Sonlıqtan olar jaman jolınan qaytpadı ha'm janın saqlap qala almadı.
23 Sol sebepli endi sizler jalg'an ayanlar ko'rmeysiz ha'm pal ashpaysız. Men xalqımdı sizlerdin' qolın'ızdan qutqaraman. Sonda Menin' Jaratqan İye ekenimdi bilip alasız».
