Ezekiel 18 bob
1 Mag'an Jaratqan İyeden so'z tu'sti:
2 «Ne ushın sizler İzrailda: „A'keleri qıshqıl ju'zim jeydi, balalarının' tisi qamasadı“, – degen naqıldı qollanasız?
3 Men, Quday İye tiriligim haqı ant ishemen: bul naqıldı İzrailda endi aytpaytug'ın bolasız.
4 Bilip qoyın': ha'r bir tiri jan Mag'an tiyisli. A'kenin' de, balanın' da janı Meniki. Tek gu'na qılg'an adam o'ledi.
5 Haq adam a'dalatlı ha'm tuwrı bolg'an na'rseni isleydi.
6 Ol to'beshiklerdegi butlarg'a arnalg'an qurbanlıq ma'resimine qatnaspaydı, İzrail xalqının' butlarına ko'z salmaydı, basqanın' hayalın haramlamaydı ha'm etek kiri kelgen waqtında hayalg'a jaqınlamaydı.
7 Hesh kimge zulım qılmaydı, girewge alg'an zatın qaytarıp beredi, talanshılıq qılmaydı, ash adamg'a nan, jalan'ashqa kiyim beredi.
8 O'sim ushın qarız bermeydi, u'steme almaydı, nahaqlıqtan qolın tıyadı, eki adam arasındag'ı dawdı a'dillik penen sheshedi.
9 Ol Menin' qag'ıydalarıma a'mel qıladı, nızamlarımdı shın ju'rekten orınlaydı. Bunday adam – haq adam, ol so'zsiz jasaydı, – deydi Quday İye.
10 – Biraq usı haq adamnın' qan to'gip ju'rgen, bir qaraqshı balası bolıp, ol usı nadurıs na'rselerden birin islese,
11 yag'nıy a'kesi islemegen isti qılıp, to'beshiklerdegi butlarg'a arnalg'an qurbanlıq ma'resimine qatnassa, basqanın' hayalın haramlasa,
12 jarlı ha'm ka'mbag'alg'a zulım qılsa, talanshılıq qılsa, girewge alg'an zatın qaytarıp bermese, butlarg'a tabınsa, jerkenishli islerdi islese,
13 o'sim ushın qarız berip, u'steme alsa, onda ol aman qalar ma eken? Ol aman qalmaydı. Bunday jerkenishli islerge qol urg'an adam so'zsiz o'ltiriliwi tiyis. O'limine o'zi sebepshi boladı.
14 Eger bunday adamnın' perzenti bolsa ha'm ol a'kesi islegen barlıq gu'nalardı ko're tura, a'kesine eliklemese,
15 yag'nıy to'beshiklerdegi butlarg'a arnalg'an qurbanlıq ma'resimine qatnaspasa, İzrail xalqının' butlarına ko'z salmasa, jaqınının' hayalın haramlamasa,
16 hesh kimge zulım qılmasa, qarızdardan girew talap qılmasa, talanshılıq qılmasa, ashqa nan, kiyimsizge kiyim berse,
17 ka'mbag'aldı ja'birlemese, o'sim ha'm u'steme almasa, Menin' nızamlarıma boysınıp, qag'ıydalarıma a'mel qılsa, onda ol a'kesinin' gu'nası ushın o'lmeydi, ol jasaydı.
18 Al a'kesi o'z gu'nası ushın o'ledi. Sebebi ol zulımlıq qıldı, tuwısqanın taladı, o'z xalqı arasında jaramas islerdi isledi.
19 Sizler: „Ne ushın perzent a'kenin' gu'nası ushın juwap bermeydi?“, – dep aytasız. Sebebi perzent a'dil ha'm tuwrı islerdi isledi. Menin' barlıq qag'ıydalarıma muqıyatlı tu'rde a'mel qıldı. Ol so'zsiz jasaydı.
20 Tek gu'na qılg'an adam o'ledi. Perzent a'kenin', a'ke bolsa, perzenttin' gu'nası ushın juwapker emes. Haq adam haqlıg'ının', nahaq adam o'z nahaqlıg'ının' juwabın aladı.
21 Eger nahaq adam islegen barlıq gu'naları ushın ta'wbe qılıp, Menin' barlıq qag'ıydalarıma a'mel qılsa, a'dil ha'm tuwrı islerdi islese, ol jasaydı, o'lmeydi.
22 Ol qanday qılmıs islemesin, hesh biri eske alınbaydı, ol islegen a'dil isleri sebepli jasaydı.
23 Men nahaq adamnın' o'limin qa'leymen be? – deydi Quday İye, – Men onın' jaman joldan qaytıwın ha'm jasawın qa'lemeymen be?
24 Eger haq adam o'z haqlıg'ınan tayıp, nahaq is tutsa, jawızlar kibi barlıq jerkenishli islerdi islese, ol jasay ma? Ol islegen ha'mme a'dalatlı isler eske alınbaydı, al o'zi islegen qıyaneti ha'm gu'nası ushın o'ledi.
25 Sizler: „İyenin' jolı tuwrı emes“, – deysizler. Tın'lan', İzrail xalqı! Men tutqan jol natuwrı ma? Sizlerdin' jolın'ız natuwrı emes pe?
26 Eger haq adam haqlıg'ınan tayıp, natuwrı isler islese ha'm usı sebepli o'lse, onda ol o'zi islegen gu'nası ushın o'ledi.
27 Eger nahaq adam o'z nahaqlıg'ınan qaytıp, a'dil ha'm tuwrı islerdi qılsa, ol o'z o'mirin saqlap qaladı.
28 Ol o'zi islegen barlıq qılmıslarına ko'z jiberip, olar ushın ta'wbe qılg'anı sebepli jasaydı, o'lmeydi.
29 Sonday bolsa da, İzrail xalqı: „İyenin' jolı tuwrı emes“, – deydi. Menin' jolım natuwrı ma, İzrail xalqı? Natuwrı jol sizlerdiki emes pe?
30 Bunın' ushın, İzrail xalqı, sizlerdin' ha'r birin'izdi o'z jolların'ızg'a bola hu'kim etemen, – deydi Quday İye. – Ta'wbe qılın', barlıq gu'naların'ızdan qaytın', qılmısların'ız sizlerdi nabıt qılmasın.
31 İslegen barlıq gu'naların'ızdan ju'z burıp, o'zlerin'izge jan'a ju'rek ha'm jan'a ruwx alın'. İzrail xalqı, sizlerge o'liwdin' ne keregi bar?
32 Men hesh kimnin' o'limin qa'lemeymen, – deydi Quday İye. – Jaman joldan qaytın' ha'm jasan'!»
