Ezekiel 28 bob
1 Mag'an Jaratqan İyeden so'z tu'sti:
2 – İnsan ulı, Tirdin' hu'kimdarına ayt: «Quday İye bılay deydi: Senin' ko'kiregin' ko'terilip, men qudayman, ten'iz qoynındag'ı qudaylardın' taxtında otırıppan, dedin'. O'zin' quday emes, adam bola tura, o'zin'di qudayg'a ten' bilesen'.
3 Sen Danielden de dana ekensen'- da', sennen jasırın sır joq eken-da'!
4 Danalıg'ın' ha'm aqılın' menen baylıq arttırdın' ha'm g'a'ziynexanan'a altın menen gu'mis jıynadın'.
5 Sawda-satıqtag'ı danalıg'ın' menen baylıq arttırdın' ha'm baylıg'ın' sebepli menmensip kettin'.
6 Sonlıqtan Quday İye bılay deydi: O'zin'di qudayday dana bilgenin' ushın,
7 u'stin'e jat jerlilerdi, milletlerdin' en' jawızın alıp kelemen. Olar danalıg'ın' jaratqan go'zzallıqqa qarsı qılıshların jalan'ashlaydı ha'm nurlı saltanatın'dı so'ndiredi.
8 O'zin'di go'rge tıg'adı ha'm sen ten'iz qoynındag'ı qalan'da jawızlıq penen o'ltirilesen'.
9 Sonda o'zin'di o'ltirgenler aldında: „Men qudayman“, – dey alasan' ba? O'zin'di o'ltirgenlerdin' qolında sen quday emes, al a'piwayı bir adam bolasan'.
10 Sen jat jerlilerdin' qolınan su'nnetsizlerdin' o'limi menen o'lesen'. Bunı Men aytıp turman, – deydi Quday İye».
11 Mag'an Jaratqan İyeden so'z tu'sti:
12 – İnsan ulı, Tir patshası ushın joqlaw ayt ha'm og'an Quday İye bılay deydi dep ayt: «Sen minsizlik tımsalısan', Danalıqqa tolg'an, go'zzallıqta ba'rkamal edin'.
13 Sen Edende, Qudaydın' bag'ında edin'. Serdolik, xrizolit, gagat, Sarı yaqıt, oniks, yashma, Lazurit, periwza, zu'mret sıyaqlı, Qımbatbaha taslarg'a bezendin'. Bezeniw buyımların' altınnan islengen edi. Sen jaratılg'an ku'ni, bular tayarlang'an edi.
14 Sen maylang'an qorg'awshı kerub edin', Usı iske seni Men qoyg'an edim. Sen Qudaydın' muxaddes tawı u'stinde edin', Otlı taslar arasında ju'rer edin'.
15 Jaratılg'an ku'nin'nen baslap, Qılmısqa qol urg'ang'a deyin, O'z jolın'da minsiz edin'.
16 Sawdan'nın' ko'pligi sebepli, İshin' nahaqlıqqa toldı, Gu'nag'a qol urdın'. Men seni haram dep sanap, Qudaydın' tawınan ılaqtırdım. Qorg'awshı kerub, seni, Otlı taslardın' arasınan quwıp jiberdim.
17 Go'zzallıg'ın' sebepli ju'regin' ta'kabbirlendi, Dan'qparazlıg'ın' sebepli danalıg'ın'dı joq qıldın'. Sog'an bola, Men seni jerge ılaqtırdım, Patshalar aldında shermende qıldım.
18 Qılmısların'nın' ko'pligi menen, Sawda-satıqtag'ı nahaqlıg'ın' menen, O'z muxaddes orınların'dı haramladın'. Sonda Men ortan'nan ot shıg'ardım, Ol seni jalmap qoydı. Ko'rgenlerdin' ko'z aldında, Seni ku'lge aylandırdım.
19 Xalıqlar arasında seni tanıytug'ınlardın' ha'mmesi, Awhalın'a tan' qaldı. Aqıbetin' qorqınıshlı boldı, Sen ma'n'gige joq bolasan'».
20 Mag'an Jaratqan İyeden so'z tu'sti:
21 – İnsan ulı, ju'zin'di Sidong'a qaray burıp, og'an qarsı payg'ambarshılıq qıl.
22 Og'an Quday İye bılay deydi dep ayt: «Ha'y, Sidon, Men sag'an qarsıman. Men senin' ishin'de dan'qqa erisemen. Sag'an hu'kim shıg'arıp, O'z muxaddesligimdi ayan qılg'anımda, Ha'mme Menin' Jaratqan İye ekenimdi bilip aladı.
23 Men Sidong'a illet jiberemen, Ko'shelerinde qan to'giledi. Ja'n-jaqtan urılg'an qılıshtan, Qala ortasında qaza tapqanlar qulap jatadı. Sonda olar Menin' Jaratqan İye ekenimdi bilip aladı.
24 İzrail xalqın jek ko'retug'ın qon'sılardın' hesh biri, endi qaytıp İzrailg'a jaralawshı tiken yamasa ushlı jantaqtay bolmaydı. Sonda olar Menin' Quday İye ekenimdi biledi.
25 Quday İye bılay deydi: Xalıqlar arasına tarqatıp jiberilgen izraillılardı jıynap alg'anımda, milletlerdin' ko'z aldında olarg'a O'z muxaddesligimdi ayan etemen. Keyin olar o'z jerlerine, qulım Yaqıpqa bergen jerlerge ma'kan basadı.
26 Ol jerde qa'wipsiz jasaydı, u'yler quradı, ju'zimzarlar otırg'ızadı. Do'gerektegi olardı jek ko'rgenlerge hu'kim shıg'arg'anımnan keyin, olar qa'wipsizlikte jasaydı. Sonda olar Menin' o'zlerinin' Qudayı Jaratqan İye ekenimdi bilip aladı».
