Ezekiel 31 bob
1 Su'rginde bolg'an waqtımızdın' on birinshi jılının' u'shinshi ayının' birinshi ku'ni mag'an Jaratqan İyeden so'z tu'sti:
2 – İnsan ulı, Mısır patshası faraong'a ha'm onın' sansız xalqına bılay dep ayt: «Ullılıqta sag'an ten' keletug'ın kim bar?
3 A'nekey, sulıw shaqalı, qoyıw sayalı, Lebanondag'ı kedr ag'ashına uqsag'an, Assiriyag'a qara! Onın' boyı ba'lent bolıp, To'besi bultlarg'a tiyip turatug'ın edi.
4 Suwlar onı suwg'ardı, Jer astı bulaqları onı o'sirdi. Ag'ısları ol o'sken jerden aqtı, Tarmaqları tog'aydag'ı ha'mme tereklerdi qandırdı.
5 Ol tog'aydag'ı barlıq tereklerden biyik bolıp o'sti, Suwg'a jaqsılap qang'anlıqtan, Baldaqları irilenip, Shaqaları uzaydı.
6 Aspandag'ı barlıq quslar, Shaqalarına uya saldı. Barlıq jabayı haywanlar, Shaqaları astında balaladı. Barlıq ullı milletler, Onın' sayasında jasadı.
7 Ol o'zinin' ba'lentligi menen, Shaqalarının' uzınlıg'ı menen ko'rkem edi. Sebebi tamırı ullı suwlarg'a tiyip turg'an edi.
8 Qudaydın' bag'ındag'ı kedrler onın' menen bellese almas edi. Sa'rwiler onın' putaqlarına ten' kelmes edi. Shınarlardın' shaqaları onıkindey emes edi. Qudaydın' bag'ındag'ı birde bir terek, Go'zzallıqta og'an ten' kelmes edi.
9 Men onı qalın' shaqalar menen bezedim, Qudaydın' Eden bag'ındag'ı ha'mme ag'ashlar, Og'an ha'wes qılar edi.
10 Sonlıqtan Quday İye bılay deydi: Onın' boyı o'sip, to'besi bultlarg'a jetkende, ol biyikliginen ta'kabbirlenip ketti.
11 Sonın' ushın Men onı milletlerdin' hu'kimdarının' qolına berdim ha'm ol onı o'z jawızlıg'ına jarasa jazaladı. Men onı quwıp jiberdim.
12 Basqa milletlerdin' en' jawızı onı kesip, taslap ketti. Shaqaları tawlarg'a ha'm oypatlıqlarg'a tu'sip, sıng'an putaqları jerdin' barlıq say-salalarında shashılıp jattı. Jer betindegi ha'mme milletler onın' sayasın ta'rk etip, o'zin taslap ketti.
13 Aspandag'ı barlıq quslar qulag'an ag'ashqa kelip qondı, barlıq jabayı haywanlar shaqaları arasına jaylastı.
14 Endigiden bılay, suw boyında o'sken hesh bir terek bunday ba'lent bolıp o'sip, to'besi bultlarg'a tiymewi, mol suw iship o'sken hesh bir terek bunday da'rejede ba'lent bolmawı ushın usılay boldı. Olardın' ha'mmesi go'rge kirgen adamlar menen birge o'limge, jer astındag'ı du'nyag'a tapsırılg'an.
15 Quday İye bılay deydi: Kedr ag'ashı o'liler ma'kanına kirgen ku'ni, Men onın' ushın aza tutsın dep, jer astı suw ko'zlerin bekittim. Olardın' ag'ısın toqtattım, mol suwların ag'ızbay qoydım. Bul ag'ash ushın pu'tkil Lebanondı tu'nekke qapladım, barlıq tereklerin solıttım.
16 Men onı go'rge kirgenler menen birge o'liler ma'kanına tu'sirgenimde, qulawının' shawqımınan milletlerdi titirettim. Sonda Eden bag'ının' barlıq terekleri de, Lebanonnın' en' jaqsı ha'm saylandı terekleri de, mol suw iship o'sken terekler de jer astındag'ı du'nyada ta'selle taptı.
17 Onın' sayasında jasag'anlar, yag'nıy xalıqlar arasındag'ı onın' awqamlasları onın' menen birge o'liler ma'kanına tu'sip, qılıshtan qaza tapqanlarg'a qosıldı.
18 Eden bag'ındag'ı tereklerdin' qaysı biri dan'q-ataqta ha'm ullılıqta sag'an ten' keledi eken? Biraq sen Eden terekleri menen birge jer astındag'ı du'nyag'a kiresen'. Sen qılıshtan qaza tapqanlar menen birge su'nnetsizlerdin' arasında jatasan'. Bul faraonnın' ha'm onın' sansız xalqının' tımsalı, – deydi Quday İye».
