Ezekiel 32 bob
1 Su'rginde bolg'an waqtımızdın' on ekinshi jılının' on ekinshi ayının' birinshi ku'ni mag'an Jaratqan İyeden so'z tu'sti:
2 – İnsan ulı, Mısır patshası faraon ushın bılay dep joqlaw ayt: «Sen o'zin'di xalıqlar arasındag'ı arıslan dep bilesen', Biraq o'zin' ten'izdegi aydarhag'a uqsaysan'. Da'ryaların'a boy taslaysan', Ayaqların' menen suwlardı basqılaysan', Tarmaqların ılaytasan'.
3 Quday İye bılay deydi: U'stin'e torımdı taslayman. Ko'plegen xalıqlar jıynalıp, Torım menen seni tartıp shıg'aradı.
4 Seni jerge ılaqtıraman, Ashıq maydang'a taslayman. Aspandag'ı barlıq quslardı u'stin'e qondıraman, Jer betindegi barlıq jabayı haywanlar sag'an toyadı.
5 Go'shin'di tawlarg'a jayıp taslayman, Oypatlıqlardı o'ligin'e toltıraman.
6 Jerdi tawlarg'a deyin aqqan qanın'a qandıraman, Say-salalardı etin'e toltıraman.
7 Seni gu'mdan qılg'anımnan keyin, ko'klerdi jawaman, Ondag'ı juldızlardı tu'nertemen, Quyash ju'zin bult penen qaplayman, Ay da sa'wle shashıwın toqtatadı.
8 Aspandag'ı barlıq jaqtılıq shıraqların, U'stin'de qaran'g'ı qılaman, Jerin'di zulmat penen qaplayman, – deydi Quday İye.
9 – Jer boylap, sen tanımaytug'ın xalıqlar arasında, Senin' qulag'anın'dı ja'riyalap, Ko'p xalıqlardın' ju'regine g'ulg'ıla salaman.
10 Ko'p xalıqlardı sag'an hayran qaldıraman, Aldında qılısh oynatqanımda, Olardın' patshaları sen sebepli qaltırap qorqadı. Sen qulag'an ku'ni, Ha'r biri o'z janı ushın ha'r sa'tte titireydi.
11 Quday İye bılay deydi: Babiloniya patshasının' qılıshı sag'an du'beydi.
12 Milletlerdin' en' jawızı bolg'an, Ku'shli a'skerlerdin' qılıshı menen, Senin' ko'p sanlı xalqın'dı qıraman. Olar Mısırdın' menmenligin ayaq astı qılıp, Sansız xalqın qırıp joyadı.
13 Mol suwlar janında bag'ılıp atırg'an, Pu'tkil malların joq qılaman, Bunnan bılay, adam ayag'ı da, Haywan tuyag'ı da bul suwlardı basqılamaydı.
14 Sonda suwlardı tındıraman, Da'ryaların mayday bolıp ag'atug'ın qılaman, – deydi Quday İye.
15 – Mısır jerin qan'ıratıp, bos qaldırg'anımda, Onı ha'mme na'rsesinen jurday etkenimde, Onda jasaytug'ınlardı qırıp taslag'anımda, Olar Menin' Jaratqan İye ekenimdi bilip aladı.
16 Mine bul, milletlerdin' qızları aytatug'ın joqlaw. Mısır ha'm onın' ko'p sanlı xalqı tuwralı usı joqlawdı aytadı, – deydi Quday İye».
17 Su'rginde bolg'an waqtımızdın' on ekinshi jılı, aydın' on besinshi ku'ni mag'an Jaratqan İyeden so'z tu'sti:
18 – İnsan ulı, Mısırdın' ko'p sanlı xalqı ushın qayg'ırıp jıla. Olardı ha'm ku'shli milletlerdin' qızların go'rge kirgenler menen birge jer astındag'ı du'nyag'a jiber.
19 Olarg'a bılay dep ayt: «Sen o'zin'di basqalardan unamlıman dep oylaysan' ba? Tu'sip, su'nnetsizler menen bir.ge jat»
20 Olar qılıshtan qaza tapqanlardın' arasında jan tapsıradı. Qılısh berildi. Mısırdı ha'm onın' ko'p sanlı xalqın qırıp taslan'.
21 O'liler ma'kanındag'ı en' ku'shli sa'rka'rdalar Mısır ha'm onın' awqamlasları tuwralı: «Qılıshtan o'tkerilgen su'nnetsizler jer astına tu'sirildi, olar sol jerde jatırıptı», – deydi.
22 Assiriya ha'm onın' pu'tkil a'skerleri sol jerde jatır. Qılıshtan qaza tapqan a'skerlerinin' qa'birleri a'tirapın qorshap alg'an.
23 Olardın' qa'birleri tun'g'ıyıqtın' en' tu'binde, a'skerleri onın' a'tirapında. Tiriler a'leminde qa'wip tuwdırg'anlardın' ha'mmesi qılıshtan o'tkerilip o'ltirildi.
24 Elam da sol jerde, ko'p sanlı xalqı da onın' qa'birinin' a'tirapında. Olardın' ha'mmesi qılıshtan qaza tapqan. Tirilerdin' a'lemine qa'wip salg'an bul su'nnetsizler jer astındag'ı du'nyag'a tu'sti. Olar tun'g'ıyıqqa tu'skenler menen birge isnatqa qaldı.
25 lamg'a ha'm onın' ko'p sanlı xalqına o'ltirilgenler arasınan orın berildi. Adamları onın' do'geregine qoyıldı. Olardın' ha'mmesi su'nnetsiz bolıp, qılıshtan o'tkerilgen edi. Olar tiriler a'leminde qa'wip salg'an edi, endi tun'g'ıyıqqa tu'skenler menen birge isnatqa qaldı. Olar qaza tapqanlardın' arasına ornalastı.
26 Meshex penen Tubal da sol jerde ko'p sanlı xalqı menen birge jatır. Adamlarının' qa'birleri olardın' a'tirapında. Bul su'nnetsizler de tiriler a'leminde qa'wip tuwdırg'anı ushın qılıshtan qaza tapqan.
27 Olar o'liler ma'kanına qural-jaraqları menen kirgen, qılıshları basına qoyılg'an, su'nnet etilmegen batırlar menen birge jatpaydı. Meshex penen Tubaldın' gu'naları su'yeklerine ornalasıp alg'an. O'ytkeni olar batırlar kibi tiriler a'leminde qa'wip tuwdırdı.
28 Faraon, sen de tas-talqan qılınıp, qılıshtan qaza tapqanlar menen birge su'nnetsizler arasında jatasan'.
29 Edom da o'z patshaları ha'm barlıq hu'kimdarları menen birge ol jerde. Ku'shliligine qaramastan, olardın' ha'mmesi qılıshtan qaza tapqanlar menen birge qoyılg'an. Olar su'nnetsizler ha'm tun'g'ıyıqqa tu'skenler menen birge jatır.
30 Arqa ta'reptin' barlıq basshıları menen sidonlılar da sol jerde. Olar ku'shli bolıp, qa'wip salg'anına qaramastan, qaza tapqanlar menen birge shermendelik penen ol jerge kirdi. Bul su'nnetsizler qılıshtan qaza tapqanlar menen birge jatır ha'm tun'g'ıyıqqa tu'skenler menen birge isnatqa qaldı.
31 Faraon ha'm onın' barlıq a'skerleri bulardı ko'rip, o'zlerinin' qılıshtan qaza tapqan sansız xalqı ushın ta'selle tabadı, – deydi Quday İye.
32 – Men olarg'a tiriler a'lemine qorqınısh salıwg'a jol bergen bolsam da, faraon ha'm onın' sansız xalqı qılıshtan qaza tapqanlar menen birge su'nnetsizlerdin' arasında jatadı, – deydi Quday İye.
