Ezekiel 38 bob
1 Mag'an Jaratqan İyeden so'z tu'sti:
2 – İnsan ulı, Magog jerindegi Meshex ha'm Tubaldın' ullı hu'kimdarı Gogqa ju'zin'di qaratıp, og'an payg'ambarshılıq qıl:
3 «Quday İye bılay deydi: Ha'y, Meshex ha'm Tubaldın' ullı hu'kimdarı Gog, Men sag'an qarsıman!
4 Men seni basqa ta'repke burıp jiberip, jaqların'a qarmaq salaman. Seni ha'm pu'tkil ordan'dı, atların'dı, atlıların'dı, bezenip kiyinip alıp, u'lken ha'm kishi qalqan uslag'an u'lken toparın'dı, qılısh penen qurallang'anlardın' ha'mmesin su'yrep shıg'araman.
5 Qalqan uslap, duwlıg'a kiygen Persiya, Xabashstan ha'm Put xalıqları,
6 Gomerdin' barlıq a'skerleri, arqadag'ı alıs jurt Togarma xalqının' pu'tkil la'shkerleri, sonday-aq, ko'plegen xalıqlar senin' menen birge boladı.
7 Tayar tur! Janın'a jıynalg'an pu'tkil alaman menen birge tayar tur. Sen olarg'a jetekshi bolasan'.
8 Ko'p waqıttan keyin, sen atlanısqa shaqırılasan'. Son'g'ı jıllarda sen urıstan o'zin tiklep alg'an bir jerge hu'jim qılasan'. Bul jerdin' xalqı ko'p milletlerden shıg'ıp, uzaq waqıttan beri adamsız qalg'an İzrail tawlarına jıynalg'an. Onın' turg'ınları milletler arasınan alıp kelinip, ha'zir qa'wipsiz jasap atır.
9 Sen dawılday ko'terilesen'. Senin' o'zin', la'shkerlerin' ha'm senin' menen bolg'an ko'p xalıq eldi qaplap alıw ushın, bulttay bolıp kelesiz.
10 Quday İye bılay deydi: Sol ku'ni sen jaman qıyallarg'a berilip, jawız jobalar du'zesen'.
11 Sen bılay deysen': „Qorg'ansız jerlerge bastırıp barıp, biyg'am, tınısh jasap atırg'an xalıqqa hu'jim qılaman. Olardın' diywalı da, ta'mbilenetug'ın qapısı da joq.
12 Burın qan'ırap bos jatqan, ha'zir adam ma'kan basqan qalalarda jasap atırg'an xalıqtı talap, oljalayman. Sharwashılıq ha'm sawda menen shug'ıllanatug'ın, milletlerdin' arasınan jıynalıp, du'nyanın' orayında jasaytug'ın bul xalıqqa qol salaman“.
13 Sheba, Dedan, Tarshish sawdagerleri ha'm onın' barlıq jolbasshıları sennen: „Sen talaw ushın keldin' be? Talan-taraj qılıw, gu'mis ha'm altın alıp ketiw, mal ha'm baylıqtı tartıp alıw, mol oljalı bolıw ushın la'shker tartıp keldin' be?“ – dep soraydı».
14 Sonlıqtan insan ulı, payg'ambarshılıq qılıp, Gogqa ayt: «Quday İye bılay deydi: Sol ku'ni xalqım İzraildın' qa'wipsizlikte jasap atırg'anına senin' ko'zin' jetedi.
15 Sonda arqadag'ı alıs jurtın'nan ko'p xalıqlardı: atlılardı, ullı jıyındı ha'm sansız la'shkerlerdi ertip kelesen'.
16 Sen jer ju'zin qaplag'an bult kibi, xalqım İzrailg'a hu'jim jasaysan'. Keleshekte, ha'y Gog, Men seni O'z jerime jiberemen. Milletlerdin' ko'z aldında, sen arqalı muxaddesligimdi ayan etip, milletlerge O'zimdi tanıtaman.
17 Quday İye bılay deydi: A'yyemgi da'wirlerde qullarım İzrail payg'ambarları arqalı aytqan adamım sen emessen' be? Sol waqıtları olar Menin' seni izraillılarg'a qarsı jiberetug'ınım tuwralı jıllar boyı payg'ambarshılıq etti.
18 Gogtın' İzrail jerine hu'jim etetug'ın ku'ni, – deydi Quday İye, – qa'ha'rlenip, g'a'zebim lawlaydı.
19 Qızg'anshaqlıg'ım menen g'a'zep otında janıp, sol ku'ni İzrail jerinde ullı jer silkiniw ju'z beretug'ının ja'riyalayman.
20 Ten'izdegi balıqlar, ko'ktegi quslar, jabayı haywanlar, barlıq jer bawırlawshılar, jer betindegi barlıq adamlar Menin' aldımda titireydi. Tawlar astan-kesten boladı, tik jarlar qulaydı ha'm barlıq diywallar jer menen jeksen boladı.
21 Pu'tkil tawlarımda Gogqa qarsı qılısh shaqıraman, – deydi Quday İye. – Ha'r bir adamnın' qılıshı o'z tuwısqanına qarsı boladı.
22 Gogtı illet ha'm qan to'giw menen jazalayman. Onın' ha'm la'shkerlerinin' u'stine, janındag'ı ko'p xalıqlardın' u'stine g'arq etiwshi jawın, taslı burshaq, ot ha'm ku'kirt jawdıraman.
23 Solay etip, Men ullılıg'ımdı ha'm muxaddesligimdi ko'rsetemen ha'm ko'p milletlerdin' ko'z aldında O'zimdi ayan etemen. Sonda olar Menin' Jaratqan İye ekenimdi bilip aladı».
