Ezekiel 39 bob
1 – İnsan ulı, sen Gogqa qarsı payg'ambarshılıq qılıp, og'an ayt: «Quday İye bılay deydi: Ha'y, Meshextin' ha'm Tubaldın' ullı hu'kimdarı Gog, Men sag'an qarsıman!
2 Seni basqa ta'repke burıp jiberemen, uzaq arqadan alıp shıg'ıp, İzrail tawlarına alıp kelemen.
3 Shep qolın'dag'ı sadag'ın'dı ha'm on' qolın'dag'ı og'ın'dı urıp tu'siremen.
4 Sen pu'tkil la'shkerlerin' ha'm janın'dag'ı xalıqlar menen birge İzrail tawlarında qulaysan'. Seni ha'r tu'rli jırtqısh quslarg'a ha'm jabayı haywanlarg'a jem qılaman.
5 Sen ashıq maydanda o'lesen'. Bunı Men aytıp turman, – deydi Quday İye.
6 – Men Magog jerine ha'm atawlarda qa'wipsiz jasap atırg'anlarg'a ot jiberemen. Sonda olar Menin' Jaratqan İye ekenimdi bilip aladı.
7 Men O'zimnin' muxaddes atımdı xalqım İzrailg'a ayan etemen. Bunnan bılay, muxaddes atıma til tiygiziwine jol qoymayman. Sonda xalıqlar İzraildın' Muxaddesi, Jaratqan İye Men ekenimdi bilip aladı.
8 Mine, bul ku'n keledi ha'm ju'zege asadı, – deydi Quday İye, – yag'nıy sol Men aytqan ku'n.
9 İzrail qalalarının' turg'ınları sırtqa shıg'ıp, qural-jaraqlardı, u'lken ha'm kishkene qalqanlardı, oq jay ha'm onın' oqların, tayaq ha'm nayzalardı otqa jag'adı. Olar jeti jıl otın boladı.
10 Daladan otın tasıwg'a, tog'aydan otın shabıwg'a ha'jet qalmay, qural-jaraqlardı otın qıladı. İzrail xalqı o'zlerin tonag'anlardı tonaydı, o'zlerinen tartıp alg'anlardan tartıp aladı, – deydi Quday İye.
11 – Sol ku'ni Men İzraildan, ten'izdin' shıg'ısındag'ı Jolawshılar oypatlıg'ınan Gogqa qa'birstan ushın orın beremen. Ol o'tkenketkenlerdin' jolın tosadı. Ol jerge Gog penen onın' pu'tkil la'shkerleri jerlenedi ha'm ol jer „Gogtın' sansız la'shkerlerinin' oypatlıg'ı“ dep ataladı.
12 Eldi tazalaw ushın, İzrail xalqı olardı jeti ay boyı jerleydi.
13 Eldegi pu'tkil xalıq olardı jerlewge qatnasadı. Men O'zimdi dan'qqa eristirgen ku'nim, İzrail xalqı abırayg'a iye boladı, – deydi Quday İye.
14 – Usı jeti ay o'tkende, ha'r ku'ni eldi gezip ju'retug'ın adamlar belgilenedi. Olar menen birge eldi tazalaw ushın ko'miwsiz qalg'an o'lilerdi ko'metug'ın adamlar da belgilenedi.
15 Eldi gezip ju'rgenler adam su'yegin ko'rip qalsa, onın' qasına belgi qoyıp ketedi. Jerlewshiler onı alıp, Gogtın' la'shkerlerinin' oypatlıg'ına jerleydi.
16 Sol jerde Hamona degen qala da boladı. Olar usılayınsha eldi tazalaydı».
17 İnsan ulı, sen bolsan', – deydi Quday İye, – ha'r tu'rli quslarg'a ha'm barlıq jabayı haywanlarg'a bılay dep ayt: «Menin' sizler ushın soyatug'ın qurbanlıg'ıma, İzrail tawlarındag'ı ullı qurbanlıqqa ja'n-jaqtan jıynalıp kelin'ler. Ol jerde go'sh jep, qan ishesiz.
18 Bashan u'lkesinde semirtilip bag'ılg'an qoshqarlardın', toqlılardın', tekelerdin', bug'alardın' go'shi ha'm qanı sıyaqlı, ku'shli adamlardın' ha'm du'nya hu'kimdarlarının' go'shin jep, qanın ishesiz.
19 Menin' sizler ushın soyatug'ın qurbanlıg'ımnan toyg'ansha go'shtin' mayın jep, ma's bolg'ansha qan ishesiz.
20 Menin' dasturxanımnan atlarg'a, atlılarg'a, ku'shli jawıngerlerge ha'm ha'r qıylı a'skerlerge toyasız, – deydi Quday İye.
21 – Men milletler arasında ullılıg'ımdı ayan etemen. Barlıq xalıqlar Menin' shıg'arg'an hu'kimimdi ha'm olardı qu'diretli qolım menen jazalag'anımdı ko'redi.
22 Sol ku'nnen baslap, İzrail xalqı Menin' o'zlerinin' Qudayı Jaratqan İye ekenimdi bilip aladı.
23 Basqa xalıqlar İzrail xalqının' Mag'an qıyanet qılg'anı sebepli, o'z jazıg'ı ushın su'rgin etip alıp ketilgenin biledi. Men olardan ju'zimdi jasırdım, olardı dushpanlardın' qolına berdim ha'm ha'mmesi qılıshtan qaza taptı.
24 Olarg'a o'z napa'kligine ha'm nızamsızlıg'ına jarasa is tuttım ha'm ju'zimdi olardan jasırdım.
25 Sonlıqtan Quday İye bılay deydi: Endi Men Yaqıptı burıng'ı abadanshılıg'ına eristiremen, pu'tkil İzrail xalqına rehim qılaman ha'm muxaddes atım hu'rmeti qızg'anaman.
26 Olarg'a hesh kim qa'wip tuwdırmay, o'z ellerinde qorqınıshsız jasap atırg'anında, olar Mag'an qılg'an qıyanetleri ushın uyaladı.
27 Olardı xalıqlar arasınan qaytarıp, dushpan jerlerinen jıynap alg'anımda, ko'p milletlerdin' ko'zinin' aldında olar arqalı O'z muxaddesligimdi ayan etemen.
28 Men olardı xalıqlar arasına tarqatıp jibergen bolsam da, keyin ol jerde olardın' birde birewin qaldırmay o'z jerine jıynag'anımda, olar Menin' o'zlerinin' Qudayı Jaratqan İye ekenimdi bilip aladı.
29 Men İzrail xalqının' u'stine Ruwxımdı to'gemen, endi hesh qashan ju'zimdi olardan jasırmayman, – deydi Quday İye».
