Ezekiel 40 bob
1 Su'rginde bolg'an waqtımızdın' jigirma besinshi jılının' birinshi ayının' onınshı ku'ni Erusalimnin' basıp alıng'anına on to'rt jıl bolg'an edi. Sol ku'ni Jaratqan İyenin' qolı menin' u'stimde bolıp, Jaratqan İye meni sol jerge alıp bardı.
2 Ayanda Quday meni İzrail eline alıp barıp, ba'lent bir tawdın' u'stine turg'ızıp qoydı. Ol jerdin' qubla ta'repinde imaratlar bolıp, qalag'a uqsap turg'an edi.
3 Meni sol jerge alıp bardı. Qarasam, da'rwaza aldında bir adam tur. Onın' ko'rinisi jıltırag'an qoladay bolıp, qolında zıg'ır jip ha'm o'lsheytug'ın tayaq bar edi.
4 Sol adam mag'an bılay dedi: – İnsan ulı, ko'zlerin' menen ko'r, qulaqların' menen esit, ko'rsetken na'rselerimnin' ha'mmesine dıqqat qoy. Menin' sag'an ko'rsetiwim ushın sen bul jerge alıp kelindin'. Ko'rgenlerin'nin' ha'mmesin İzrail xalqına jetker.
5 Qarasam, İbadatxananın' sırtı aylana diywal menen qorshalg'an eken. Sol adamnın' qolındag'ı o'lsheytug'ın tayaqtın' uzınlıg'ı altı shıg'anaq bolıp, ha'r bir shıg'anaqtın' uzınlıg'ı a'dettegi o'lshemnen to'rt elige artıq edi. Ol diywaldı o'lshedi, diywaldın' qalın'lıg'ı da, biyikligi de bir o'lshew tayag'ına ten' boldı.
6 Keyin ol shıg'ısqa qarap turg'an da'rwazag'a barıp, tekshelerden ko'terilip, da'rwaza bosag'asın o'lshedi. Bosag'a tabaldırıg'ının' eni bir tayaqqa ten' bolıp, bul birinshi bosag'a edi.
7 Da'rwaza imaratının' ishinde saqshılardın' bo'lmeleri bar edi. Olardın' uzınlıg'ı da, eni de bir tayaqqa ten' bolıp, usı bo'lmelerdi ajıratıp turg'an diywallardın' qalın'lıg'ı bes shıg'anaq edi. Da'liz jolının' aqırında İbadatxana ha'wlisine qarag'an aywan bolıp, usı aywang'a shıg'atug'ın tabaldırıqtın' eni bir tayaqqa ten' boldı.
8 Son' ol aywandı ishten o'lshedi, onın' da'lizden tısqarı uzınlıg'ı bir qamıs shıqtı.
9 Keyin ol aywandı sırttan o'lshedi, onın' uzınlıg'ı segiz qamıs shıqtı. Aywan esiginin' eki qaptalındag'ı su'tinge uqsag'an shıg'ın'qı diywallardın' ha'r qaysısının' qalın'lıg'ı eki shıg'anaqtan edi. Bul aywan da'rwaza imaratının' ishinde bolıp, İbadatxanag'a qarap turg'an edi.
10 Shıg'ıs da'rwaza imaratının' ishinin' eki qaptalında da u'sh-u'shten bo'lmeler bolıp, olardın' ha'mmesinin' o'lshemi de, olardın' arasındag'ı diywallar da birdey qalın'lıqta edi.
11 Ol da'rwazanın' kirer awzın o'lshedi, ol on shıg'anaq, al da'lizdin' eni on u'sh shıg'anaq shıqtı.
12 Saqshılardın' bo'lmelerinin' ha'r qaysısının' aldında eni bir shıg'anaqtan bolg'an pa'skeltek paqsa bar edi. Saqshılardın' bo'lmelerinin' eni de, uzınlıg'ı da altı shıg'anaq edi.
13 Keyin da'rwaza imaratının' to'besinin' enin, bir bo'lmenin' shetki diywalınan qarama-qarsı turg'an bo'lmenin' shetki diywalına shekemgi aralıqtı o'lshedi. To'benin' eni jigirma bes shıg'anaq shıqtı.
14 Keyin ol da'rwaza imaratının' ha'wli ta'repindegi shıg'ın'qı diywalların o'lshedi. Olardın' biyikligi alpıs shıg'anaq shıqtı.
15 Da'rwaza imaratının' kirer awızdan shıg'ar awızg'a shekemgi uzınlıg'ı eliw shıg'anaq edi.
16 Da'rwaza imaratının' ishinin' eki ta'repinde jaylasqan saqshılardın' bo'lmeleri menen olardın' arasındag'ı diywallarda, sonday-aq aywannın' ishinin' ha'r bir ta'repinde ayna ta'rizli oyıqlar bar edi. Aywannın' ha'wli ta'repindegi shıg'ın'qı diywalları palma ag'ashının' su'wretleri menen bezelgen edi.
17 Keyin ol meni sırtqı ha'wlige alıp kirdi. Ha'wli a'tirapında otız bo'lme ha'm tas to'selgen jol bar edi.
18 Da'rwazalardın' eki ta'repindegi tas joldın' eni da'rwazalardın' uzınlıg'ına ten' edi. Bul tas jol ha'wlidegi tas joldan pa'sirek edi.
19 Ol ha'wlinin' enin, shıg'ıstag'ı da'rwaza imaratının' shıg'ar awzınan ishki ha'wlinin' kirer awzına shekemgi aralıqtı o'lshedi, ol ju'z shıg'anaq shıqtı.
20 Ol sırtqı ha'wlinin' arqag'a qarag'an da'rwazasının' uzınlıg'ı menen enin o'lshedi.
21 İmarattın' eki ta'repindegi u'sh-u'shten qurılg'an saqshılardın' bo'lmeleri, olardın' arasındag'ı diywallardın' ha'm aywannın' o'lshemi birinshi da'rwaza imaratının' o'lshemleri menen birdey edi. İmarattın' uzınlıg'ı eliw shıg'anaq, eni jigirma bes shıg'anaq edi.
22 Diywallardag'ı ayna ta'rizli oyıqlardın', aywannın' ha'm palma ag'ashının' su'wretlerinin' o'lshemleri shıg'ıs da'rwazasındag'ı menen birdey edi. Da'rwazag'a jeti basqaldaqlı tekshe arqalı ko'teriletug'ın edi. Al bastırma imarattın' ishki ta'repinde edi.
23 Arqa da'rwazasının' aldında da shıg'ıs da'rwazasının' aldındag'ıday qarama-qarsı turg'an ishki ha'wlinin' da'rwaza imaratı bar edi. Bul adam ishki da'rwaza imaratınan sırtqı da'rwaza imaratına shekemgi aralıqtı o'lshedi. Aralıq ju'z shıg'anaq shıqtı.
24 Ol meni qubla ta'repke alıp bardı. Ol jerde qublag'a qarag'an da'rwaza imaratı bar edi. Ol imarattın' diywalların ha'm aywanın o'lshedi. Olardın' o'lshemleri basqalardiki menen birdey shıqtı.
25 Basqa da'rwaza imaratlarında bolg'anınday, bul da'rwaza imaratının' da, onın' aywanının' da ha'mme ta'repinde ayna ta'rizli oyıqlar bar edi. İmarattın' uzınlıg'ı eliw shıg'anaq, eni jigirma bes shıg'anaq bolıp shıqtı.
26 Og'an jeti basqaldaqlı tekshe arqalı ko'terilip, aywang'a kiretug'ın edi. İmarattın' ishki diywalları palma ag'ashının' su'wretleri menen bezelgen edi.
27 İshki ha'wlinin' de qublag'a qarag'an da'rwazası bar edi. Ol qubladag'ı sırtqı da'rwazadan usı da'rwazag'a shekemgi aralıqtı o'lshedi. Aralıq ju'z shıg'anaq shıqtı.
28 Ol meni qubla da'rwaza arqalı İbadatxananın' ishki ha'wlisine alıp kirdi de, qubladag'ı da'rwazanı o'lshedi. Onın' da o'lshemleri basqalardiki menen birdey edi.
29 Saqshılardın' bo'lmelerinin', olar arasındag'ı diywallardın' ha'm aywannın' o'lshemi de basqa imaratlardag'ılar menen birdey bolıp shıqtı. Da'rwaza imaratının' ha'm onın' aywanının' ha'mme ta'repinde ayna ta'rizli oyıqlar bar edi. Da'rwaza imaratının' uzınlıg'ı eliw shıg'anaq, eni jigirma bes shıg'anaq edi.
30 İshki ha'wlidegi da'rwaza imaratlarının' ha'r birinin' aywanının' uzınlıg'ı jigirma bes shıg'anaq, eni bes shıg'anaq edi.
31 Aywan sırtqı ha'wlige qarap turg'an bolıp, onın' kirer awzının' eki qaptalındag'ı shıg'ın'qı diywalları palma ag'ashının' su'wretleri menen bezelgen edi. Da'rwazag'a segiz basqaldaqlı tekshe arqalı ko'teriletug'ın edi.
32 Ol shıg'ıs da'rwazasının' imaratı arqalı meni ishki ha'wlige alıp kirdi ha'm onı o'lshedi. Ol da basqalarday bolıp shıqtı.
33 Saqshılar bo'lmeleri, olar arasındag'ı diywalları ha'm aywannın' o'lshemleri basqaları menen birdey edi. İmarattın' da, onın' aywanının' da ha'mme ta'repinde ayna ta'rizli oyıqlar bar edi. Da'rwaza imaratının' uzınlıg'ı eliw shıg'anaq, eni jigirma bes shıg'anaq edi.
34 Aywan sırtqı ha'wlige qarap turg'an bolıp, onın' shıg'ın'qı diywalları palma ag'ashının' su'wretleri menen bezelgen edi. Da'rwazag'a segiz basqaldaqlı tekshe arqalı ko'teriletug'ın edi.
35 Keyin ol meni arqa da'rwazag'a alıp kelip, da'rwaza imaratın o'lshedi. Onın' o'lshemleri basqa imaratlardın' o'lshemleri menen birdey edi.
36 Saqshılar bo'lmeleri, olardın' arasındag'ı diywalları ha'm aywannın' o'lshemi basqalardiki menen birdey edi. İmarattın' ishinin' ha'mme ta'repinde aynala ayna ta'rizli oyıqlar bar edi. İmarattın' uzınlıg'ı eliw shıg'anaq, eni jigirma bes shıg'anaq edi.
37 Aywan sırtqı ha'wlige qarap turg'an bolıp, onın' shıg'ın'qı diywalları palma ag'ashının' su'wretleri menen bezelgen edi. Da'rwazag'a segiz basqaldaqlı tekshe arqalı ko'teriletug'ın edi.
38 İshki da'rwazanın' aywanının' qaptalında, bo'lek bir bo'lmeli jay bar edi. Jandırılatug'ın qurbanlıqlar usı jerde juwılatug'ın edi.
39 Jandırılatug'ın qurbanlıqtı, gu'na ha'm ayıp qurbanlıg'ın soyıw ushın da'rwaza aywanının' ishinde, eki qaptalda ekew-ekewden to'rt stol turdı.
40 Aywannın' sırtında bolsa, eki ta'repte eki stoldan to'rt stol bolıp, olar arqa da'rwazag'a kiretug'ın teksheden ko'rinip turdı.
41 Solay etip, da'rwazanın' ishki ha'm sırtqı ta'replerinde qurbanlıqlardı soyıwg'a arnalg'an segiz stol bar edi.
42 Jandırılatug'ın qurbanlıqlar ushın jonılg'an tastan qurılg'an ja'ne to'rt stol bar edi. Ha'r bir stoldın' uzınlıg'ı ha'm eni bir yarım shıg'anaq, biyikligi bir shıg'anaq edi. Jandırılatug'ın qurbanlıqlardı ha'm basqa qurbanlıqlardı soyıw ushın arnalg'an quraljaraqlar onın' u'stinde turdı.
43 Aywannın' diywallarına ha'r biri to'rt eli bolg'an ilmekler qag'ılg'an edi. Qurbanlıq go'shi bolsa stollar u'stine qoyılatug'ın edi.
44 İshki da'rwazanın' sırtında, ishki ha'wlide eki bo'lme bar edi. Bulardın' birewi arqadag'ı da'rwazanın' janında bolıp, qublag'a qarag'an, ekinshisi shıg'ıs da'rwazanın' janında bolıp, arqag'a qarag'an edi.
45 Adam mag'an bılay dedi: – Qublag'a qarap turg'an bo'lme İbadatxanada xızmet etip atırg'an ruwxaniylerge arnalg'an.
46 Al arqag'a qarap turg'an bo'lme qurbanlıq orında xızmet etip atırg'an ruwxaniylerge arnalg'an. Bular Sadoqtın' urpaqları bolıp, olarg'a Lebiy urıwı arasınan Jaratqan İyege xızmet etiw ushın, Og'an jaqınlasıwg'a ruxsat etilgen edi.
47 Keyin ol ishki ha'wlini o'lshedi. Ol to'rt mu'yeshli bolıp, uzınlıg'ı da, eni de ju'z shıg'anaq shıqtı. Qurbanlıq orın İbadatxananın' aldında edi.
48 Ol meni İbadatxananın' aywanına alıp kelip, onın' bosag'asının' eki ta'repindegi su'tinge uqsag'an shıg'ın'qı diywalların o'lshedi. Diywallardın' qalın'lıg'ı bes shıg'anaq, eni u'sh shıg'anaq shıqtı.
49 Aywannın' o'zinin' uzınlıg'ı jigirma shıg'anaq, eni on eki shıg'anaq edi. Aywang'a on basqaldaqlı tekshe arqalı ko'teriletug'ın edi. Aywannın' kirer awzının' eki ta'repinde eki su'tin bar edi.
