Ezekiel 46 bob
1 «Quday İye bılay deydi: – İshki ha'wlige alıp kiretug'ın shıg'ıs ta'reptegi da'rwaza altı jumıs ku'ni dawamında jabıq tursın. Al Shabbat ku'ni ha'm Jan'a ay bayramı ku'ni ashılsın.
2 Hu'kimdar sırtqı ha'wliden usı da'rwaza imaratının' aywanına kirip, aywan esiginde tursın. Ruwxaniy onın' jandırılatug'ın ha'm tatıwlıq qurbanlıqların usınıp atırg'anda, hu'kimdar aywan bosag'asında turıp sıyınsın. Keyin kelgen jolı menen shıg'ıp ketsin. Biraq da'rwaza keshke shekem ashıq tursın.
3 Ha'r Shabbat ha'm Jan'a ay bayramı ku'ni İzrail xalqı usı da'rwaza aldında turıp, Jaratqan İyege sıyınsın.
4 Shabbat ku'ni hu'kimdar Jaratqan İyege minsiz altı toqlı menen minsiz bir qoshqardı jandırılatug'ın qurbanlıq ushın alıp kelsin.
5 Qoshqarg'a qosıp, g'a'lle sadaqası ushın bir efa un bersin. Al toqlılar menen birge qa'legen mug'darda un bersin. Ha'r bir efa ung'a bir hin mug'darda za'ytu'n mayın qosıp bersin.
6 Jan'a ay bayramı ku'ni minsiz bir bug'a, altı toqlı ha'm bir qoshqar bersin.
7 G'a'lle sadaqası ushın bug'ag'a qosıp bir efa, qoshqarg'a qosıp bir efa un alıp kelsin. Al toqlılar menen birge qa'legen mug'darda g'a'lle sadaqasın bersin. Ha'r bir efa un ushın bir hin za'ytu'n mayın qosıp bersin.
8 Hu'kimdar ishke kirgende, da'rwaza imaratının' aywanı arqalı kirsin ha'm sol jol menen qaytıp shıqsın.
9 Belgilengen bayramlarda u'lke xalqı sıyınıw ushın Jaratqan İyenin' aldına kelgende, arqadag'ı da'rwazadan kirgenleri qubladag'ı da'rwazadan, qubladag'ı da'rwazadan kirgenleri arqadag'ı da'rwazadan shıg'ıp ketsin. Ha'r bir adam kirgen da'rwazasınan qaytıp shıqpay, qarama-qarsı da'rwazadan shıg'ıp ketiwi kerek.
10 Hu'kimdar olardın' arasında bolıwı kerek. Xalıq kirgende kiriwi, xalıq shıqqanda shıg'ıwı kerek.
11 U'lken bayramlarda ha'm belgilengen bayramlarda qurbanlıq qılınatug'ın ha'r bir bug'a ha'm ha'r bir qoshqar menen birge bir efadan g'a'lle sadaqası beriledi. Toqlılar menen birge qa'legen mug'darda g'a'lle sadaqası beriledi. Ha'r bir efa un menen birge bir hin za'ytu'n mayı beriledi.
12 Hu'kimdar Jaratqan İyege ıqtıyarlı tu'rde jandırılatug'ın qurbanlıq yamasa tatıwlıq qurbanlıg'ın bermekshi bolsa, og'an shıg'ısqa qarag'an da'rwaza ashılsın. Bul qurbanlıqlardı ol Shabbat ku'ni beretug'ın qurbanlıqlarday etip usınsın. Keyin ol sırtqa shıg'ıp ketedi ha'm da'rwaza jabıladı».
13 «Ha'r ku'ni azanda bir jasar minsiz bir toqlını jandırılatug'ın qurbanlıq etip alıp kelip, onı Jaratqan İyege usının'.
14 Onın' menen birge ha'r ku'ni azanda g'a'lle sadaqası ushın efanın' altıdan bir bo'legi mug'darında sapalı un ha'm ung'a aralastırıw ushın hinnin' u'shten bir bo'legi mug'darında za'ytu'n mayı berilsin. G'a'lle sadaqasının' Jaratqan İyege usınıw qag'ıydası ma'n'gige usınday boladı.
15 Toqlı, g'a'lle ha'm za'ytu'n mayı jandırılatug'ın qurbanlıq ushın ha'r ku'ni azanda u'zliksiz tu'rde alıp kelinsin».
16 «Quday İye bılay deydi: Eger hu'kimdar o'z iyeliginen ullarının' birine jer sawg'a qılsa, bul jer onın' a'wladlarına da miyrasqa o'tip, olardın' miyrası boladı.
17 Eger hu'kimdar xızmetshilerinin' birine jer sawg'a qılsa, xızmetshi bul jerge Qutlı jılg'a deyin g'ana iyelik qıla aladı. Keyin jer hu'kimdarg'a qaytarıp beriledi. Hu'kimdardın' jeri tek onın' balalarına g'ana miyrasqa o'te aladı.
18 Hu'kimdardın' xalıqtı jerden quwıp shıg'arıp, olardın' jerin tartıp alıwg'a haqısı joq. Ol tek o'z jerinen balalarına miyras ajıratıwı mu'mkin. Xalqımnın' hesh biri o'z jerinen quwıp shıg'arılmasın».
19 Keyin adam meni da'rwaza janındag'ı jol arqalı ruwxaniylerge arnalg'an arqag'a qarap turg'an muxaddes bo'lmelerge alıp keldi. Sol jerden batıstag'ı en' shetki orındı ko'rsetti.
20 Ol bılay dedi: – Bul jerde ruwxaniyler ayıp ha'm gu'na qurbanlıqlarının' go'shin pisiredi ha'm g'a'lle sadaqasının' nanın jabadı. Xalıqtın' muxaddes azıqawqatlarg'a tiyip ketpewi ushın, olardı sırtqı ha'wlige shıg'armawı kerek.
21 Keyin ol meni sırtqı ha'wlige shıg'arıp, ha'wlinin' to'rt mu'yeshine alıp bardı. Ha'r bir mu'yeshte qorshalg'an bir orın bar edi.
22 Ha'wlinin' ha'r bir mu'yeshinde o'lshemleri birdey bolg'an, uzınlıg'ı qırıq shıg'anaq, eni otız shıg'anaq bolg'an u'sti jabıq orınlar bar edi.
23 Olardın' ha'mmesi diywal menen aylandırılg'an bolıp, diywaldın' ishi boylap oshaqlar qurılg'an edi.
24 Adam mag'an bılay dedi: – Bular asxanalar. Onda İbadatxana xızmetshileri xalıqtın' alıp kelgen qurbanlıq go'shlerin pisiredi.
