1 Mag'an Jaratqan İyeden so'z tu'sti:
2 – İnsan ulı! İzrail tawlarına ju'zin'di qaratıp, olarg'a qarsı payg'ambarshılıq etip,
3 bılay dep ayt: «Ha'y, İzrail tawları, Quday İyenin' so'zin tın'lan'! Quday İye tawlarg'a, to'belerge, say-salalarg'a ha'm oypatlıqlarg'a bılay deydi: Qaran'lar, Men sizlerge qarsı qılısh jiberemen, sıyınıw orınların'ızdı qıyrataman.
4 Qurbanlıq orınların'ız wayran qılınadı, tu'tetki tu'tetiletug'ın orınların'ız qıyratıladı, o'ltirilgen adamların'ızdı butların'ızdın' aldına ılaqtıraman.
5 Men İzrail xalqının' o'li denelerin olardın' butlarının' aldına taslayman ha'm su'yeklerin'izdi qurbanlıq orınların'ızdın' do'geregine shashaman.
6 Sizler qay jerde jasasan'ız da, qalaların'ız wayran boladı, sıyınıw orınların'ız qıyraydı. Sonda qurbanlıq orınların'ız wayran bolıp, qan'ırap qaladı, butların'ız bo'leklenip, jer menen jeksen boladı, tu'tetki tu'tetiletug'ın orınların'ız sındırıp taslanıp, qol miynetin'iz tu'p-tamırı menen joq qılınadı.
7 Aran'ızda o'ltirilgenler qulap jatadı, sonda Menin' Jaratqan İye ekenimdi bilip alasız.
8 Biraq Men bazılardı aman qaldıraman. Sizler el boylap tarqatıp jiberilgenin'izde, ayırımların'ız basqa milletler arasında qılıshtan qutılıp qalasız.
9 Aman qalg'anlar su'rgin etip alıp ketilgen jerindegi milletler arasında Meni esleydi. Mennen ju'z burg'an opasız ju'rekleri ha'm butlardın' izinen qarag'an buzıq ko'zleri sebepli qanshelli ha'siret shektim. Olar islegen jamanlıqları ha'm jerkenishli isleri ushın o'zlerinen o'zleri jerkenedi.
10 Sonda olar Menin' Jaratqan İye ekenimdi bilip aladı. Men olarg'a bul apatshılıqtı jiberemen dep, bostan-bosqa aybat etkenim joq».
11 Quday İye bılay demekte: «Ashıw menen alaqanın'dı alaqanın'a urıp, jerdi tewip bılay dep ayt: İslegen barlıq jawız ha'm jerkenishli isleri ushın izraillılardın' sorı qurıydı! Olar qılıshtan, ashlıqtan ha'm illetten qırıladı.
12 Uzaqtag'ılar illetten o'ledi, jaqındag'ılar qılıshtan qırıladı. Qutılıp, aman qalg'anlar ashlıqtan nabıt boladı. Usılayınsha, Men olarg'a g'a'zebimdi tolıq shashaman.
13 Qurbanlıq orınlarının' a'tirapındag'ı butlardın' arasında, ha'r bir biyik to'beshikte ha'm barlıq tawdın' to'belerinde, ha'r bir qoyıw japıraqlı terektin' ha'm ha'r bir sayalı terebinf astında, yag'nıy butlarına xosh iyisli tu'tetki tu'tetken jerlerde qırılg'anlar sozılıp jatqanda, olar Menin' Jaratqan İye ekenimdi bilip aladı.
14 Men olarg'a qolımdı ko'terip, sho'lden Diblag'a shekemgi, olar jasag'an barlıq jerlerdi qan'ıratıp, bos qaldıraman. Sonda olar Menin' Jaratqan İye ekenimdi bilip aladı».
