Ezekiel 9 bob
1 Keyin men Jaratqan İyenin' ba'lent dawıs penen: – Qalanı jazalaw ushın tayınlang'anlar, ha'r birin'iz quralların'ızdı alıp berman kelin'! – dep baqırg'anın esittim.
2 Men arqag'a qarap turg'an joqarg'ı da'rwaza ta'repten kiyatırg'an altı erkekti ko'rdim. Olardın' ha'r birinin' qolında qırg'ın qılıwshı qural bar edi. Olardın' janında zıg'ırdan kiyim kiygen, beline jazıw quralların asıp alg'an birew bar edi. Olar ishke kirip, qola qurbanlıq orınnın' qasında turdı.
3 Kerublar u'stindegi İzraildın' Qudayının' saltanatı o'z ornınan ko'terilip, İbadatxananın' bosag'asına bardı. Jaratqan İye zıg'ır kiyim kiyip, beline jazıw quralların asıp alg'an adamdı shaqırıp,
4 og'an: – Erusalim qalasın aylanıp shıq ha'm qalada islenip atırg'an jerkenishli islerden nala shegip, zarlap atırg'anlardın' man'layına belgi qoy, – dedi.
5 Basqa altı adamg'a Onın' bılay degenin esittim: – Onın' izinen qalanı aylanıp, adamlardı qırıp taslan', ayaman', rehim etpen'.
6 G'arrılardı, jigit ha'm qızlardı, balalardı ha'm hayallardı qırıp taslan'. Biraq man'layında belgisi barlarg'a tiymen'. Menin' Muxaddes ma'kanımnan baslan'. Olar İbadatxana aldında turg'an aqsaqallardan basladı.
7 Quday altı adamg'a: – Ha'wlilerdi o'li denelerge toltırıp, İbadatxananı haramlan'. Qa'ne, baslan'lar! – dedi. Olar barıp, qaladag'ılardı qıra basladı.
8 Olar adamlardı o'ltirgende, jalg'ız o'zim qalg'an men et betimnen jerge jıg'ılıp, pa'riyad etip: – Ah, Quday İye! G'a'zebin'di Erusalimge shashıp, İzrailda tiri qalg'anlardın' ha'mmesin qırıp jibermekshimisen'? – dedim.
9 Ol mag'an bılay dep juwap berdi: – İzrail ha'm Yahudanın' gu'nası ju'da' awır, el qang'a, qala a'dalatsızlıqqa tolg'an. Adamlar: «Jaratqan İye eldi ta'rk etti, Jaratqan İye ko'rmeydi», – deydi.
10 Men de olardı ayamayman, rehim de etpeymen. Tutqan jollarına jarasa jazasın beremen.
11 Sol arada zıg'ır kiyim kiyip, beline jazıw quralların asqan adam qaytıp kelip: – Men buyırg'anın'day qıldım, – dep xabarladı.
