Daniel 11 bob
1 – Midiyalı Dariydin' hu'kimdarlıg'ının' birinshi jılında, men og'an ja'rdem berip, qorg'aw ushın onın' qasında turg'an edim.
2 – Endi men sag'an haqıyqattı aytaman. Persiya patshalıg'ında ja'ne u'sh patsha hu'kimdarlıq qıladı. Biraq to'rtinshi patsha basqalarına qarag'anda baylıg'ı aytarlıqtay ko'p bolıp, baylıg'ı arqalı ku'sh arttıradı ha'm ha'mmeni Grek patshalıg'ına qarsı qozg'aydı.
3 Keyin taxtqa ku'shli bir patsha otıradı, ol ullı hu'kimdarlıq penen basqarıp, qa'legen isin qıladı.
4 Degen menen, ol ku'sh-qu'diretke tolıp tasqanda, patshalıg'ı ıdırap, to'rtke bo'linip ketedi. Taxt onın' zu'ryadına berilmeydi ha'm patshalıqtın' aldıng'ı ku'sh-qu'direti olarda bolmaydı. Sebebi onın' patshalıg'ı tu'p-tamırı menen julıp taslanıp, onın' zu'ryadınan bolmag'an basqa birewlerge beriledi.
5 Sol arada qubla patshası ku'sheyip ketedi, biraq patshanın' sa'rka'rdarlarınan biri ku'sheyip, patshanın' saltanatınan go're u'lkenirek bir patshalıqqa hu'kimdarlıq qıladı.
6 Bir neshe jıl o'tkennen son', qubla patshası arqa patshası menen tınıshlıq kelisimin du'zedi. Usı kelisimdi bekkemlew ushın, qubla patshasının' qızı arqa patshasına baradı. Degen menen, qubla patshasının' qızı o'z ku'shin joytadı ha'm ku'shin saqlay almaydı. Qız, onın' menen birge kelgen no'kerleri, balası ha'm onı qollapquwatlag'an qolg'a tapsırıladı.
7 Biraq qubla patshalıg'ının' taxtına qızdın' ag'ayinlerinen biri otıradı. Ol arqa patshalıg'ının' la'shkerlerine hu'jim qılıp, qorg'anların qolg'a aladı ha'm olardın' u'stinen jen'iske erisedi.
8 Olardın' mu'sin qudayların, quyma butların, gu'mis ha'm altınnan islengen qımbatbaha ıdısların olja qılıp, Mısırg'a alıp ketedi. Keyin bir neshe jıl dawamında arqa patshasının' tınıshın buzbaydı.
9 Son'ınan arqa patshası qubla patshasına bastırıp baradı, biraq artqa sheginiwge ma'jbu'r bolıp, o'z eline qaytıp ketedi.
10 Keyin arqa patshalıg'ının' balaları urısqa tayarlanıp, ju'da' ko'p la'shker jıynaydı. La'shkerler topan suwday ag'ıp, qubla patshalıg'ının' qorg'anına hu'jim qıladı
11 G'a'zepke mingen qubla patshası arqa patshası menen sawashqa tu'sedi. Arqa patshasının' sansız la'shkerleri dushpan qolına ta'slim qılınadı
12 2Sansız la'shkerdin' u'stinen jen'iske erisken qubla patshası ta'kabbirlenip ketedi ha'm mın'-mın'lag'an a'skerdi o'ltirse, de, onın' jen'isi uzaqqa sozılmaydı.
13 Sebebi bir neshe jıldan keyin arqa patshası aldıng'ısınan da ko'p ha'm jaqsı qurallang'an la'shkerleri menen qubla patshalıg'ına ja'ne bastırıp baradı.
14 Sol waqıtta ko'p adamlar qubla patshasına qarsı bas ko'teredi. Ayan a'melge assın, dep xalqın'nın' arasındag'ı bazı qozg'alan'shılar da bas ko'teredi, biraq tabısqa erise almaydı.
15 Sonda arqa patshası kelip, qorg'an qalanı qamal qıladı, ishine kiriw ushın diywalg'a topıraq u'yip, onı qolg'a aladı. Qubla patshalıg'ının' la'shkerleri arqa patshalıg'ının' ku'shine qarsı tura almaydı, ha'tteki, qubla patshalıg'ının' saylandı la'shkerleri de jawdın' la'shkerlerinin' ku'shli hu'jimin qaytara almaydı.
16 Arqa patshası qa'legenin isleydi, hesh bir adam og'an qarsılıq qılıwg'a ju'reksinbeydi. Ol go'zzal İzrail u'lkesin qolg'a kirgizip, onı wayran etiw mu'mkinshiligine iye boladı
17 Aldın arqa patshası o'z patshalıg'ının' bar ku'shi menen qubla patshalıg'ın basıp almaqshı boladı. Ol qubla patshalıg'ın jer menen jeksen qılıw maqsetinde onın' patshası menen kelisim du'zip, og'an qızın uzatadı. Biraq arqa patshasının' bul jobaları push bolıp, tabısqa erise almaydı.
18 Sonnan son' arqa patshası burılıp, ten'iz boyındag'ı qalalarg'a hu'jim qılıp, ko'bisin qolg'a aladı. Degen menen, bir sa'rka'rda bul ta'kabbir patshanı toqtatıp, onın' qılmıslarına jarasa jazasın beredi.
19 Sonda arqa patshası sheginip, o'z elindegi qorg'anlarg'a qaytadı ha'm jolda jen'iliske ushırap, izsiz joq bolad.
20 Onın' ornına arqa taxtına basqa bir patsha otıradı. G'a'ziynesin toltırmaqshı bolg'an bul patsha salıqshısın jiberip, adamlarg'a ko'p salıq saladı. Biraq qısqa waqıt ishinde ol o'ledi. Onın' o'limi sawashtın' yamasa birewdin' qastıyanshılıg'ı na'tiyjesinde ju'z bermeydi.
21 Onın' ornına taxtqa otırg'an patsha on'bag'an bir adam boladı. Patsha zu'ryadınan bolmag'an bul adam ku'tilmegende hiylekerlik penen arqa patshalıg'ının' taxtına otırıp aladı.
22 Ol o'zine qarsılıq ko'rsetken ju'da' ku'shli a'skeriy ordanı joq qıladı. Ha'tteki, kelisim du'zgen hu'kimdardı da usı awhalg'a saladı.
23 Ol basqa xalıqlar menen kelisim du'zip, hiylekerlik penen is tutadı. Og'an ergenlerdin' sanı az bolıwına qaramastan, onın' ku'shi barg'an sayın artıp baradı.
24 Ol bay wa'layatlarg'a ku'tilmegende bastırıp barıp, ata-babaları hesh qashan qılmag'an islerge qol uradı. Qolg'a kirgizgen olja ha'm mal-mu'liklerdi o'zinin' izine ergenlerge bo'listirip beredi. Qorg'anlardı qolg'a alıw jobaların du'zedi, biraq bul jag'day uzaqqa sozılmaydı.
25 Ol ku'sh-qu'diretin jıynap, qubla patshasına u'lken bir la'shker tartıp baradı. Qubla patshası da og'ada qu'diretli ha'm ku'shli la'shkerleri menen urısqa shıg'adı. Biraq og'an qarsı du'zilgen hiylekerlik sebepli artıq qarsı tura almaydı.
26 Qubla patshasının' o'z tabaqlasları og'an satqınlıq qıladı. Onın' ordası jen'iliske ushırap, ko'bisi qırılıp qaladı. 27Sol eki patshanın' ju'reginde jaman niyet boladı. Olar bir dasturxanda otırıp, bir-birine o'tirik so'yleydi. Biraq bunnan na'tiyje shıqpaydı. Sebebi belgilengen waqıt ele kelmegen edi.
27 Sol eki patshanın' ju'reginde jaman niyet boladı. Olar bir dasturxanda otırıp, bir-birine o'tirik so'yleydi. Biraq bunnan na'tiyje shıqpaydı. Sebebi belgilengen waqıt ele kelmegen edi.
28 Arqa patshası ko'p baylıq penen o'z eline qaytıp ketedi. Biraq onın' ju'regi muxaddes kelisimge qarsı boladı. Jolda ol niyetin a'melge asırıp, keyin o'z eline qaytadı.
29 Belgilengen waqıtta arqa patshası qubla patshalıqqa ja'ne ju'ris qıladı, biraq bul ret aldıng'ıday bolmaydı.
30 Batıstan kelgen kemeleri og'an qarsılıq ko'rsetedi, ruwxı tu'sken patsha artqa sheginedi. Biraq qaytıp kelgende, ol ashıwın muxaddes kelisim du'zgen xalıqtan aladı, muxaddes kelisimnen bas tartqanlarg'a bolsa jaqsılıq qıladı.
31 Onın' la'shkerleri İbadatxananın' qorg'anına bastırıp kirip, muxaddes orındı haramlaydı. Ku'ndelikli qurbanlıqlardı toqtatıp, wayran qılatug'ın jerkenishli bir zattı ornatadı.
32 Sol patsha hiyle menen kelisimnen bas tartqanlardın' kewlin tawıp, olardı o'z ta'repine awdırıp aladı. Al Qudayg'a sadıq qalg'anlar bolsa, bar ku'shi menen og'an qarsılıq ko'rsetedi.
33 Xalıqtın' arasındag'ı dana jolbasshılar adamlarg'a aqıllı na'siyatlar beredi. Degen menen, bir qansha waqıtqa deyin olardın' bazıları qılıshtan o'ledi, otta jandırıladı, bazıları zindang'a taslanadı, talan-taraj boladı.
34 Quwg'ın waqtında olar azg'antay ja'rdem aladı. Ko'pler jag'ımpazlıq penen olarg'a qosıladı.
35 Quwg'ın waqtında bir neshe dana adamlar azap shegedi. Usı arqalı aqırg'ı waqıtqa deyin olar usılayınsha pa'klenip, tazalanadı. Sebebi belgilengen waqıt ele kelmegen.
36 Arqa patshası kewli qa'legen isti qıladı. Ol o'zin ko'kke ko'terip, qudaylardan joqarı qoyadı. Qudaylardın' Qudayına qarsı so'ylep, til tiygizedi. Qudaydın' belgilep qoyg'an g'a'zep waqtı tawısılg'ang'a deyin, ol tabıslı boladı. Degen menen, Quday o'z jobasın so'zsiz a'melge asıradı.
37 Ol ata-babaları sıyıng'an qudaylardı ha'm hayallar jaqsı ko'rgen qudaydı mensinbeydi. Ol o'zin olardın' ha'mmesinen joqarı qoyıp, bir de bir qudaydı o'z na'zerine ilmeydi.
38 Bulardın' ornına qorg'anlardı qorg'awshı, dep atalg'an qudaydı ullılaydı. Ata-babaları tabınbag'an bul qudayg'a altın, gu'mis, qımbat bahalı taslar ha'm qımbat sıylardı sadaqa qılıp, hu'rmet ko'rsetedi.
39 Ol jat qudaydın' ja'rdemi menen qorg'anların qorg'aydı. Onı haqıyqıy hu'kimdar dep ta'n alg'anlarg'a hu'rmet-izzet ko'rsetip, olardı ko'p adamlardın' u'stinen basshı etip qoyadı ha'm olarg'a jerlerdi sawg'a sıpatında bo'lip beredi.
40 Zamannın' aqırında qubla patshası og'an hu'jim qıladı. Biraq arqa patshası sawash arbaları, atlıları ha'm ko'p kemeleri menen og'an quyınday bastırıp barıp, jerlerdi suw tasqını sıyaqlı jaypap o'tedi.
41 Ol go'zzal İzrail u'lkesin de qolg'a alıp, ko'plegen ellerdin' basına jetedi. Degen menen, edom, moab ha'm ammon xalqının' basshıları onın' qolınan qashıp qutıladı.
42 Ol basqa ellerge de qol saldı, Mısır da onnan qashıp qutıla almaydı.
43 Ol Mısırdın' altın, gu'mis qaznalarına ha'm barlıq baylıqlarına iyelik qıladı. Liviyalılar menen kushlılar da og'an bag'ınıshlı boladı.
44 Degen menen, shıg'ıs ha'm arqa ta'repten kelgen xabarlar onı tan' qaldıradı. Bul xabardan g'a'zeplengen patsha jolg'a atlanıp, ko'p adamlardı qırıp taslaydı.
45 Keyin ten'iz ha'm go'zzal muxaddes taw arasındag'ı jerlerge barıp, sol jerge patshalıq shatırların tigedi. Biraq ol sol jerde o'ledi, og'an ja'rdem beretug'ın hesh kim bolmaydı.
