Daniel 7 bob
1 Babilon patshası Belshassardın' patshalıg'ının' birinshi jılında Daniel to'seginde jatıp, tu'sinde ayanlar ko'rdi. Sonda ol tu'sin jazıp,
2 bılay dep bayan qıldı: «Tu'nde ko'rgen ayanda aspannın' to'rt ta'repinen esken ku'shli samal ullı ten'izdi tolqınlandırıp atırg'an eken.
3 Sol ten'izden bir-birine uqsamaytug'ın u'lken to'rt jırtqısh maqluq shıqtı.
4 Birinshisi arıslang'a uqsaytug'ın edi. Onda bu'rkittin' qanatları bar edi. Qanday da bir ku'shtin' onın' qanatların julıp taslag'anın ha'm jerden ko'terip, adamg'a uqsatıp eki ayaqqa turg'ızıp qoyg'anın ko'rdim. Sol maqluqqa adamnın' ju'regi berildi.
5 Ekinshi maqluq artqı ayaqları menen turg'an ayıwg'a uqsaytug'ın edi. Ol awzına u'sh qabırg'a su'yekti tislep alg'an edi. Og'an: „Qa'ne, toyg'anın'sha go'sh je“, – dep aytıldı.
6 Son'ınan qaplang'a uqsag'an basqa bir maqluqtı ko'rdim. Onın' arqasında qustın' to'rt qanatı bar edi ha'm ol to'rt baslı edi. Og'an hu'kimdarlıq etiw huqıqı berilgen edi.
7 Sonnan keyin, tu'r-tu'si qorqınıshlı, aybatlı ha'm ju'da' ku'shli to'rtinshi maqluqtı ko'rdim. Ol temir tisleri menen barlıg'ın shaynap, maydalap tasladı. Al qaldıqların bolsa, ayaqları menen basıp ezdi. Ol aldıng'ı maqluqlarg'a uqsamaytug'ın edi, onın' on mu'yizi bar ed.
8 Men usı maqluqtın' mu'yizlerin tamasha qılıp turg'anımda, olardın' arasınan o'sip shıg'ıp atırg'an ja'ne bir kishkene mu'yiz ko'rdim. Og'an orın bosatıw ushın, aldıng'ı on mu'yizden u'shewi tu'bi menen qoparılıp tu'sti. Jan'a o'sip shıqqan mu'yizde adamnın' ko'zine uqsag'an ko'zleri ha'm menmenlik penen so'yleytug'ın awzı bar edi».
9 «Men taxtlardın' orın-orınlarına qoyılıp, a'zelden bar bolg'an o'z ornına otırg'anın ko'rdim. Onın' kiyimi appaq qarday, shashları bolsa taptaza mamıqtay edi. Onın' taxtı janıp turg'an jalın, taxttın' do'n'gelekleri lawlap turg'an ot sıyaqlı edi.
10 Onın' aldınan otlı bir da'rya ag'ıp shıqtı. Mın'-mın'lag'anlar og'an xızmet etip, on mın' – on mın'lag'anı onın' aldında turdı. Hu'kim baslandı, kitaplar ashıldı.
11 Menmenlik penen so'ylep atırg'an sol kishkene mu'yizge qarap turg'anımda, sol to'rtinshi maqluq ko'z aldımda o'ltirildi ha'm onın' o'ligi otqa taslanıp, joq qılındı.
12 Basqa maqluqlardan bolsa hu'kimdarlıq tartıp alındı, biraq belgili bir waqıtqa deyin jasawına ruxsat berildi.
13 Tu'nde ko'rgen sol ayanımda men aspan bultlarında kiyatırg'an adam balasına uqsag'an birewdi ko'rdim. Ol a'zelden bar bolg'annın' aldına aparıldı.
14 Og'an biylik, ullılıq ha'm hu'kimdarlıq berildi. Barlıq xalıqlar, milletler ha'm ha'r bir tildegi adamlar og'an xızmet etti. Onın' biyligi tawısılmaytug'ın, ma'n'gi hu'kimdarlıq, patshalıg'ı hesh qashan qulamaytug'ın patshalıqdur».
15 Daniel, yag'nıy o'zime kelsem, mag'an ko'ringen bul ayan ruwxımdı tınıshsızlandırıp, meni tan' qaldırdı.
16 Men sol jerde turg'anlardın' birine jaqınlap, bulardın' ha'mmesinin' haqıyqıy ma'nisin aytıp beriwin soradım. Ol mag'an ayannın' ma'nisin ashıp, bılay dep tu'sindirip berdi:
17 «Bul to'rt u'lken maqluq – jer ju'zinde payda bolatug'ın to'rt patsha.
18 Biraq Quday Taalanın' muxaddesleri patshalıqtı qolg'a alıp, olar sheksiz, ma'n'gi hu'kimdarlıq qıladı».
19 Sonda to'rtinshi maqluq tuwralı shın ma'nisin biliwdi qa'legen edim, o'ytkeni ol basqa maqluqlardan ayrıqsha ha'm qattı qorqınıshlı edi. Temir tisleri ha'm qola tırnaqları bar bul maqluq barlıg'ın shaynap maydalap, qalg'anların bolsa basıp ezetug'ın edi.
20 Onın' basındag'ı on mu'yizdin' ha'm jan'a o'sip shıqqan mu'yizdin' ma'nisin biliwdi qa'ledim. Sol mu'yiz o'sip shıg'ıp atırg'anda, ornındag'ı u'sh mu'yizdi tu'sirip jibergen edi. Ko'zleri ha'm menmenlik penen so'yleytug'ın awzı bar bul mu'yiz basqa mu'yizlerge qarag'anda ko'birek ku'shke iye bolıp ko'rinetug'ın edi.
21 Men tamasha qılıp turg'anımda, sol mu'yiz muxaddes adamları menen sawash ju'rgizip, olardı jen'ip atırg'an edi.
22 Sonda A'zelden bar bolg'an kelip, O'zinin' muxaddesleri ushın a'dil hu'kim shıg'ardı. Qudaydın' muxaddeslerinin' patshalıqtı qolg'a alatug'ın waqtı kelgen edi.
23 Sa'wbetlesim dawam etip bılay dep tu'sindirip berdi: «To'rtinshi maqluq – bul jer ju'zinde hu'kimdarlıq qılatug'ın to'rtinshi patshalıqtın' tımsalı. Bul patshalıq basqa patshalıqlardan ayrıqsha boladı. Ol pu'tkil du'nyanı shaynap, ezip maydalap taslaydı.
24 Maqluqtın' on mu'yizi – patshalıqtı basqaratug'ın on patsha. Keyinirek jan'adan bir patsha payda boladı. Bul patsha aldıng'ı on patshadan ayrıqsha boladı ha'm olardın' arasınan u'sh patshanı taxttan tu'sirip taslaydı.
25 Ol Quday Taalag'a qarsı so'zlerdi aytıp, Onın' muxaddeslerin ezedi. Muxaddes bayramlar ha'm nızamlardı o'zgertiwge ha'reket etedi. Qudaydın' muxaddesleri bir mu'ddet, eki mu'ddet ha'm yarım mu'ddet dawamında sol patshanın' zulımlıg'ı astında boladı.
26 Usı mu'ddet tamamlang'anda, aspanda hu'kim jıynalısı baslanadı. Zalım patsha taxttan tu'sirilip, pu'tkilley joq qılınadı.
27 Quday Taalanın' muxaddeslerine bolsa patshalıq, hu'kimdarlıq ha'm aspan astındag'ı barlıq saltanattın' ullılıg'ı beriledi. Olardın' patshalıg'ı ma'n'gi patshalıq boladı. Barlıq hu'kimdarlıq olarg'a boysınıp, xızmet etedi».
28 Ko'rgen, esitkenlerim usılardan ibarat edi. Men, Daniel bul tu'simnen sonday qattı qa'weterlenip, ju'zim solg'ın tartıp ketken edi. Degen menen, bulardın' ha'mmesin ishimde saqladım.
