1 İzrail jayılıp o'sken ju'zim ag'ashına megzeydi, Mol miywesin berdi, Biraq miywesi ko'beygen sayın, Butqa arnap ko'p qurbanlıq orın qurdı. Eli gu'llep jasnag'an sayın, kiyeli taslardı bezedi.
2 İshi qara bul xalıq endi ayıbı ushın jazasın aladı, Jaratqan İye butqa arnalg'an qurbanlıq orınların qulatadı, Kiyeli tasların sındırıp taslaydı.
3 Sonnan son' olar bılay deydi: «Bizlerdin' patshamız joq, O'ytkeni Jaratqan İyeden qorqpadıq. Patshamız bolg'anı menen, Ne keler edi onın' qolınan?»
4 Olar aytıp atır ma'nissiz so'zlerdi, Jalg'an ant iship, kelisim du'zip atır. Sonın' ushın, atızdın' qarıqlarındag'ı za'ha'rli sho'p sıyaqlı, A'dilsizlik ko'beyip barmaqta.
5 Samariyada jasaytug'ınlar, Beyt-Awendegi qashar butınan qa'weter alar, Xalqı onın' ushın jas to'ger.Buttın' ruwxaniyleri de dad salar, Sebebi buttın' saltanatı alıp taslanadı.
6 But sıy retinde ullı patshag'a, Assiriyag'a alıp ketiledi, Efrayım shermende boladı, İzrail o'z jobası sebepli uyatqa qaladı.
7 Suwdag'ı ıg'ıp ketken tayaq sıyaqlı, Samariya patshası joq bolıp ketedi.
8 İzraildın' gu'nasına sebep bolg'an, Awendegi sıyınıw orınları joq qılınadı. Qurbanlıq orınlardı jantaq ha'm shen'geller basadı. Sonda adamlar tawlarg'a: «Bizlerdi jerlen'!» To'beshiklerge: «U'stimizge qulan'!» dep jalınadı.
9 Jaratqan İye bılay deydi: «Ha'y, İzrail, sen Gibada bolg'an ku'nnen baslap gu'na isledin', Sol jerde o'zgermesten qaldın'. Gibadag'ı jınayatshılarg'a qarsı sawash bolmadı ma?
10 Men qa'legen waqtımda jazan'dı beremen, Sag'an qarsı xalıqlardı birlestiremen. Eki jınayatın' ushın, Dushpanlar sag'an kisen saladı.
11 Efrayım tu'yek aydawdı jaqsı ko'retug'ın, U'yretilgen qasharg'a uqsaydı. Biraq moyıntırıq tag'aman, Efrayımnın' sulıw moynına, Efrayımdı ertleymen. Yahudag'a qos aydataman, Yaqıpqa mala bastıraman.
12 Ha'y, İzrail, o'zin'iz ushın a'dillik egin', Su'yispenshilik jemisin orıp alın'. O'zlerin'iz ushın su'rilmegen jerin'izdi su'rin', Sebebi Jaratqan İyenin' aldına keletug'ın waqtın'ız boldı, Ol kelgen waqıtta, U'stin'izge a'dalatlıqtı jawınday jawdırsın.
13 Biraq sizler jawızlıq egip, A'dilsizlikti orıp aldın'ız, Jalg'annın' miywesinen jedin'iz, O'ytkeni tutqan o'z jolın'ızg'a su'yenip, Batır jawıngerlerin'izge isendin'iz.
14 Sonın' ushın, xalqın'ızdın' basına sawash apatı do'nip tur, Qulaydı senin' barlıq qorg'anların'. Shalmannın' sawash ku'ninde Beyt-Arbeldi qulatqanınday, Hayallar balaları menen birge jerge urıp o'ltirildi.
15 Ha'y Beyt-El, jawızlıqların'nın' ko'pligi ushın, Usı ku'nler basın'a tu'sedi. Tan' atqanda, İzrail patshası nabıt boladı».
