Hoshea 5 bob
1 Jaratqan İye bılay deydi: «Ha'y, ruwxaniyler, esitin'ler! Ha'y, İzrail xalqı, dıqqat penen tın'lan'lar! Qulaq salın', ha'y patsha shan'arag'ı! Sizlerge qarsı hu'kim shıg'arıldı. Sizler Mispada adamlar ushın duzaq, Tabor tawında jayılg'an bir tor boldın'ız.
2 Sizler teren' battın'ız Shittimde, Biraq Men ha'mmen'izdi jazalayman.
3 Efrayım, seni jaqsı bilemen, İzrailda da Menin' ushın jasırın na'rse joq. Efrayım, ha'zir sen buzıqshılıq qılıp kettin', İzrail, sen o'zin'di haramladın'.
4 İslegen isleri Qudayına qaytıwına jol qoymaydı, Sebebi olardın' ishinde buzıqshılıq ruwxı bar, Olar Jaratqan İyeni tanımadı.
5 İzraildın' menmenligi o'zine qarsı gu'walıq beredi, O'z jınayatı sebepli qulaydı İzrail, yag'nıy Efrayım, Yahuda da onın' menen birge qulaydı.
6 Qoy ha'm malları menen Jaratqan İyeni izleydi, Biraq Onı taba almaydı, O'ytkeni Jaratqan İye olardı taslap ketti.
7 Olar Jaratqan İyege opasızlıq etti, Nekesiz balalar tuwdı. Jan'a ay bayramı olardın' o'zlerin, Ja'ne de, eginlerin jalmap jutadı.
8 Gibada ka'rnay, Ramada ka'rnay shertin', Beyt-Awende sawash dabılın urın', Dushpan izin'izden kiyatır, ha'y Benyamin!
9 Jaza ku'ni Efrayım qan'ırap, bosap qaladı, İzrail urıwlarına ja'riyalag'anım so'zsiz ju'z beredi.
10 Yahuda basshıları jer shegarasının' sızıg'ın, Jılıstırg'anlarg'a uqsaydı, Suw tasqınınday etip, g'a'zebimdi to'gemen olardın' u'stine.
11 Hu'kim waqtında Efrayım azap shegip, ezildi, O'ytkeni biyhuda zatlarg'a eriwdi abzal ko'rdi.
12 Men Efrayımdı ku'ye sıyaqlı jep, Yahuda xalqın qurt sıyaqlı kemiremen.
13 Efrayım o'zinin' kesel ekenin, Yahuda o'z jaraların ko'rgende, Efrayım Assiriyag'a ketti, Ullı patshadan ja'rdem sorap, elshi jiberdi, Biraq ol shıpa bere almaydı sizlerge, Jaran'ızdı ta'wir qıla almaydı.
14 O'ytkeni Men Efrayımg'a arıslan sıyaqlı, Yahuda xalqı ushın ku'shli bir arıslanday bolaman. Olardı O'zim tilkimlep, maydalap taslayman, Su'yrep, O'zim alıp ketemen. Olardı hesh kim qutqara almaydı.
15 Olar o'z gu'nasın moyınlag'an waqıtqa deyin, Men olardı taslap ketemen. Azap ishinde ju'rgende, Menin' ju'zimdi izlep, olar Mag'an qaytadı».
