Hoshea 6 bob
1 Bul xalıq bılay deydi: «Kelin'ler, Jaratqan İyege qaytayıq! Ol bizlerdi tilkimlep, maydalap tasladı, Shıpanı da O'zi beredi. Bizlerdi jaradar qıldı, Jaralarımızdı O'zi tan'adı.
2 Eki ku'nde bizlerdi o'mirge qaytaradı, U'shinshi ku'ni ayaqqa turg'ızadı, Onın' da'rgayında jasaymız.
3 Kelin'ler, Jaratqan İyeni biliwge umtılayıq, Onı biliwge g'ayrat salayıq. Ol tan' atıwınday so'zsiz keledi, Jerde suwg'aratug'ın jawın sıyaqlı, Awa, ba'ha'r jawınınday bizlerge keledi».
4 Quday bılay deydi: «Sag'an ne qılayın, ha'y Efrayım? Sag'an ne qılayın, ha'y Yahuda? Su'yispenshiligin'iz tan'dag'ı dumanday tez joq boladı, Erte azang'ı shıq sıyaqlı parlanıp ketedi.
5 Sonın' ushın, sizlerdi payg'ambarlarım arqalı shawıp tasladım, Awzımnan shıqqan so'zlerim menen o'ltirdim, Tan' nurının' shıg'atug'ınday, Shıg'arg'an hu'kimim so'zsiz ju'zge asadı.
6 O'ytkeni Men qurbanlıq emes, Miyrim-sha'pa'a'tti qa'leymen, Jandırılatug'ın qurbanlıqlardı emes, Meni, Qudaydı tanıp, biliwin'izdi qa'leymen.
7 Xalqım Adam sıyaqlı kelisimdi buzdı, Awa, ol jerde Mag'an opasızlıq qıldı.
8 Gilad – jawızlardın' qalası, Ko'sheleri qan izlerine tolı.
9 Qaraqshılar buqqıda jatıp, qurbanın an'lıydı, Ruwxaniyler toparı da olarg'a uqsaydı. Shexem qalasına baratug'ın jolda adam o'ltiredi, Awa, olar jerkenishli jınayatqa qol uradı.
10 Men İzrailda qorqınıshlı ha'diyseni ko'rdim: Efrayım buzıqshılıq qıldı, İzrail o'zin haramladı.
11 Ha'y, Yahuda, senin' de jaza ku'nin' belgilendi. Men xalqımdı ja'ne abadanshılıqqa eristirmekshi bolg'anımda,
