Lebiyliler 27 bob

Wa'de arqalı beriletug'ın sıylarg'a baylanıslı nızamlar (1-34).

¹ Jaratqan İye Muwsag'a bılay dedi:

² – İzrail xalqına bılay dep ayt: «Eger kim de kim bir adamdı Jaratqan İyege bag'ıshlawg'a wa'de berse, sol adamnın' qunı ushın beriletug'ın to'lemi to'mendegidey mo'lsherde bolsın.

³ Bul to'lemnin' qunı mınaday boladı: jigirma jastan alpıs jasqa deyingi er adamlar ushın Muxaddes orın o'lshemi menen eliw shekel gu'mis,

⁴ al hayallar ushın otız shekel gu'mis.

⁵ Bes jastan jigirma jasqa deyingi er adamlar ushın jigirma shekel, al hayal-qızlar ushın on shekel.

⁶ Bir aylıq bo'peden bes jasqa deyin bolg'an er balalar ushın bes, qızlar ushın u'sh shekel gu'mis.

⁷ Eger alpıs yamasa onnan joqarı jasta bolsa, onda erkekler ushın on bes shekel gu'mis, al hayallar ushın on shekel gu'mis to'lensin.

⁸ Eger wa'de bergen adam jarlı bolıp, belgilengen bahanı to'lewge shaması kelmese, bag'ıshlang'an adamdı ruwxaniyge alıp barsın. Ruwxaniy wa'de bergen adamnın' jag'dayına qaray, baha belgilesin.

⁹ Eger Jaratqan İyege wa'de qılıng'an mal qurbanlıqqa shalıwg'a bolatug'ın mal bolsa, ol Jaratqan İyege bag'ıshlang'an muxaddes bolıp esaplanadı.

¹⁰ Wa'de qılg'an adam Jaratqan İyege bag'ıshlag'an malın jaqsısının' ornına jamanın yamasa jamanının' ornına jaqsısın almastırmasın. Eger ol maldı almastırsa, almastırılg'an mal menen ekewi de Qudayg'a tiyisli bolıp, muxaddes sanaladı.

¹¹ Eger Jaratqan İyege arnap a'kelingen sıy haram sanalg'an mallardan bolsa, onı ruwxaniyge alıp barsın.

¹² Ruwxaniy maldın' jaqsı-jamanına qarap, baha belgilesin ha'm onın' bahası solay qalsın.

¹³ Eger iyesi maldı qaytarıp satıp alıwdı qa'lese, ruwxaniy ta'repinen belgilengen bahanın' u'stine besten bir bo'legin qosıp to'lesin.

¹⁴ Eger bir adam o'zinin' u'yin sıy qılıp, Jaratqan İyege bag'ıshlasa, ruwxaniy u'ydin' jaqsı-jamanına qarap, onın' bahasın belgilesin. Ruwxaniy u'yge qanday baha belgilese, u'ydin' bahası sonday boladı.

¹⁵ Eger sol adam bag'ıshlag'an u'yin qaytarıp satıp alıwdı qa'lese, ruwxaniydin' belgilegen bahasının' u'stine besten bir bo'legin qosıp to'lesin. Sonda u'y qaytadan o'ziniki bolıp qaladı.

¹⁶ Eger bir adam babasınan qalg'an miyras atızının' bir bo'legin Jaratqan İyege bag'ıshlawdı qa'lese, atızg'a egiletug'ın tuqımnın' mug'darı boyınsha bahası belgilensin. Bir xomer arpa tuqımı egiletug'ın atızdın' bahası eliw shekel gu'mis boladı.

¹⁷ Eger atız Qutlı jılda bag'ıshlansa, bunın' bahası belgilengen tolıq baha boyınsha qalsın.

¹⁸ Eger atız Qutlı jıldan son' bag'ıshlansa, ruwxaniy keyingi Qutlı jılg'a deyin qalg'an jıllardın' sanı boyınsha atızdın' bahasın belgilesin. Atızdın' bahası sog'an sa'ykes to'men boladı.

¹⁹ Eger sol adam atızın qaytarıp alıwdı qa'lese, ol atızg'a belgilengen bahanın' u'stine besten bir bo'legin qosıp to'lesin. Sonda atız ja'ne o'ziniki bolıp qaladı.

²⁰ Biraq sol adam atızdı o'zine qaytarıp satıp almasa ha'm atız basqa birewge satılg'an bolsa, onda atızdın' iyesi atızdı o'zine qaytarıp satıp ala almaydı.

²¹ Atız Qutlı jılg'a deyin tursa, onda bul Jaratqan İyege bag'ıshlang'an bolıp, muxaddes sanaladı ha'm atız ruwxaniylerge tiyisli bolıp qaladı.

²² Eger bir adam satıp alg'an, yag'nıy babasınan miyras bolmag'an atızın Jaratqan İyege bag'ıshlasa,

²³ ruwxaniy Qutlı jılg'a deyin qalg'an jıllar boyınsha onın' bahasın belgilesin. Ol adam belgilengen bahanı sol ku'ni-aq to'lesin ha'm to'lem Jaratqan İyege tiyisli bolıp, muxaddes sanaladı.

²⁴ Keyingi Qutlı jılda atız birinshi iyesine qaytarıp berilsin.

²⁵ Ha'r bir belgilengen baha Muxaddes orınnın' shekeli boyınsha belgilensin. Bir shekel jigirma geradan ibarat.

²⁶ İri ha'm mayda malların'ızdın' birinshi tuwılg'an to'lleri Jaratqan İyeniki bolıp, olardın' hesh qaysısın Jaratqan İyege bag'ıshlaman'. Sebebi ol Jaratqan İyege tiyisli.

²⁷ Biraq birinshi tuwılg'an mal haram sanalg'an mallardan bolsa, ol ushın ruwxaniydin' belgilegen bahasın ha'm onın' u'stine besten bir bo'legin qosıp to'lep, maldı qaytarıp alıwına boladı. Eger ol qaytarıp alınbasa, onda mal belgilengen bahag'a basqa birewge satıladı.

²⁸ Jaratqan İyege tolıg'ı menen bag'ıshlang'an adam, mal ha'm miyrastan qalg'an atızdın' hesh biri satılmasın ha'm qaytarıp alınbasın. O'ytkeni Jaratqan İyege tolıg'ı menen bag'ıshlang'an ha'r bir na'rse Jaratqan İyege tiyisli bolıp, ju'da' muxaddes sanaladı.

²⁹ Jaratqan İyege tolıg'ı menen bag'ıshlang'an adam aqshag'a qaytarıp satıp alınbasın, ol so'zsiz o'ltirilsin.

³⁰ Jerdin' zu'ra'a'ti bolsın, miywe ag'ashtın' jemisi bolsın, jerden o'nip shıg'atug'ın ha'r bir zu'ra'a'ttin' onnan biri Jaratqan İyege tiyisli. Bular Jaratqan İyege tiyisli bolıp, muxaddes sanaladı.

³¹ Eger bir adam onnan birinin' bir bo'legin qaytarıp alıwdı qa'lese, onda ol bahasının' u'stine besten bir bo'legin qosıp to'lewi tiyis.

³² Barlıq iri ha'm mayda mallardın' onnan birine kelsek, shopannın' tayag'ının' astınan o'tken ha'r bir onınshı mal Jaratqan İyege tiyisli bolıp, muxaddes sanaladı.

³³ Hesh kim mallardı jaqsı ha'm jaman dep ayırıp, bir-biri menen almastırmasın. Eger de mal almastırılsa, onda eki mal da muxaddes sanaladı ha'm onı qaytarıp satıp alıwg'a bolmaydı».

³⁴ Jaratqan İyenin' Sinay tawında İzrail xalqına Muwsa arqalı bergen buyrıqları usılar edi.