Amos 3 bob
1 Ha'y, İzrail xalqı, Jaratqan İyenin' so'zlerine qulaq salın'. Ol sizlerge, Mısırdan O'zi alıp shıqqan barlıq urıwın'ızg'a qarsı bılay deydi:
2 «Jer ju'zindegi barlıq xalıqlar arasınan, Tek g'ana sizlerdi tan'lap aldım, Sonlıqtan sizlerdi ha'mme jınayatların'ız ushın jazalayman».
3 O'z ara kelisip almay turıp, eki adam birge jolg'a shıg'a ma?
4 Oljası bolmasa, tog'ayda arıslan aqıra ma? Uslag'an hesh na'rsesi bolmasa, jas arıslan ininen dawıs shıg'ara ma?
5 Jerdegi duzaqqa jem qoyılmasa, Duzaqqa qus tu'se me? Duzaqqa hesh na'rse tu'spese, Duzaqtın' jibi tartıla ma?
6 Qalada qa'wipli jag'day sebepli ka'rnay shalınsa, Xalıqtı qorqınısh baspay ma? Jaratqan İye jibermese, Qalag'a apat kele me?
7 Shınında, qulı payg'ambarlarg'a O'z jobasın ashpay turıp, Quday İye hesh na'rse qılmaydı.
8 Arıslan aqırg'anda, kim qorqpaydı? Quday İye so'ylegende, Kim payg'ambarshılıq qılmaydı?
9 Ashdod saraylarında ja'riyalan', Mısır saraylarında da bılay dep ja'riyalan': «Samariya tawlarında jıynalın', Qalanın' ishindegi ullı ta'rtipsizliklerdi, Ondag'ı eziwshiliklerdi ko'rin'».
10 Jaratqan İye bılay deydi: «Olar a'dalatlıqtı qalay islewdi bilmeydi, Qorg'an qalalarında zulımlıq ha'm zorlıq jıynaydı».
11 Sonın' ushın, Quday İye bılay deydi: «Dushpan qorshap almaqta jerin'di, Ku'sh-quwattan ayırıp Seni, Qorg'an qalaların'dı talan-taraj qıladı».
12 Jaratqan İye bılay deydi: «Bir shopan arıslannın' awzınan qoydın' eki tuyag'ın, Yamasa qulag'ının' bir bo'legin alıp qalg'anınday, Samariyada jasap atırg'an izraillılar da, To'seginin' bir sheti ha'm juqa ko'rpesi menen g'ana aman qaladı.
13 Qulaq salın' ha'm Yaqıptın' urpaqların eskertin'!» Quday İye, A'lemnin' Qudayı bılay deydi:
14 «Jınayatları sebepli Men İzraildı jazalag'an ku'ni, Beyt-Eldin' qurbanlıq orınların joq qılaman, Kesilip jerge tu'sedi qurbanlıq orınnın' shaqları.
15 Qısqı ha'm jazg'ı saraylardı buzıp taslayman, Pil su'yegi menen bezelgen saraylar wayran qılınadı, Ko'p u'yler joq boladı». Bular Jaratqan İyenin' so'zleri.
