Amos 5 bob
1 İzrail xalqı, sizler haqqında aytatug'ın, Joqlaw jırıma qulaq salın':
2 «Qız İzrail jıg'ıldı, Endi qaytıp tura almaydı, Ol jalg'ız awnap jatır o'z jerinde, Onı turg'ızatug'ın hesh kim joq».
3 Sonın' ushın, Quday İye bılay deydi: «Qaladan İzrail xalqının' mın' jawıngeri shıqsa, Ju'z jawıngeri g'ana aman qaladı, Qaladan ju'z jawıngeri shıqsa, On jawıngeri g'ana aman qaladı».
4 Sonın' ushın, Jaratqan İye İzrail xalqına bılay deydi: «Mag'an qaytın', sonda jasaysız,
5 Beyt-Elge barman'lar, Gilgalg'a ayaq baspan'lar, Beer-Shebag'a o'tip ketpen'ler, Sebebi Gilgal xalqı so'zsiz su'rgin etiledi, Beyt-El hesh na'rse bolmay qaladı».
6 Jaratqan İyege qaytın', sonda jasaysız, Bolmasa, Ol Yusuptin' xalqına qarsı ottay lawlaydı, Beyt-Eldi jag'ıp joq qıladı. Jalındı o'shiretug'ın hesh kim bolmaydı.
7 Ha'y, a'dalattı ashshı juwsang'a aylandırg'anlar, Haqlıqtı jerge urg'anlar!
8 U'rker ha'm Orion juldız toparların jaratqannın', Tu'psiz qaran'g'ılıqtı tan' nurına aylandırıp, Ku'ndizdi tu'ndey qaran'g'ı qılg'annın', Ten'iz suwların shaqırıp,Jer ju'zine quyg'annın' atı Jaratqan İyedur.
9 Ol ku'shlilerdi jıldırımday jıg'adı, Qorg'an qalanı jer menen jeksen qıladı.
10 Sizler qala da'rwazasındag'ı jıyında a'dalatlı qazılardan jerkenesiz, Haqıyqattı so'ylegenlerdi jaman ko'resiz.
11 Ka'mbag'aldı ezesiz, Og'an awır salıq salıp, biydayın tartıp alasız, Tastan jonıp u'y salsan'ız da, onda jasay almaysız. Go'zzal ju'zimzar otırg'ızsan'ız da, onın' sharabın ishpeysiz.
12 Jınayatların'ız so'zsiz ko'p, Gu'naların'ız sansız ekenin bilemen. Haq adamdı ja'birlep, para alasız, Qala da'rwazasındag'ı hu'kim jıynalısı waqtında, Biysharanın' haqın jeysiz!
13 Sonın' ushın, sonday zamanda, Aqıllı adam u'nsizlik saqlaydı, Sebebi bul jaman zamandur.
14 Jamanlıqqa emes, jaqsılıqqa umtılın', Sonda sizler jasaysız, Solay etip, o'zlerin'iz aytqanday, Jaratqan İye, A'lemnin' Qudayı sizler menen birge boladı.
15 Jamanlıqtı jek ko'rin', Jaqsılıqtı su'yin', Qala da'rwazasındag'ı hu'kim jıynalısında a'dalattı tiklen'. Mu'mkin, Jaratqan İye, A'lemnin' Qudayı, Yusuptin' xalqınan aman qalg'anlarına rehim qılar.
16 Sonlıqtan, Jaratqan İye, A'lemnin' Qudayı, İye bılay deydi: «Barlıq maydanlarda xalıq zar jılasadı, Barlıq ko'shelerde olar way-way salısadı, Diyxanlardı aza tutıw ushın, Joqlaw aytatug'ınlardı jılaw ushın shaqıradı.
17 Barlıq ju'zimzarlarda zar jılaw esitiledi, O'ytkeni Men aran'ızdan o'temen». Bular Jaratqan İyenin' so'zleri.
18 Jaratqan İyenin' ku'nin an'sap ku'tip atırg'anlar, ha'siret shegesiz! Jaratqan İyenin' hu'kim ku'nin ku'tiwdin' ne keregi bar? Ol ku'n jaqtılıq emes, qaran'g'ılıq boladı.
19 Sol ku'ni bir adam arıslannan qashsa, Aldınan ayıw shıqqanday bolar, Onnan da qashıp, u'yine aman qaytsa, Qolı menen diywalg'a su'yenip turg'anda, Onı jılan shag'ıp alg'anday bolar.
20 Jaratqan İyenin' ku'ni qaran'g'ılıq emes, jaqtılıq bola ma? Ol qoyıw qaran'g'ılıq, onda jaqtılıq joq.
21 Jaratqan İye bılay deydi: «Bayramların'ızdı jek ko'remen, Olardan jerkenemen, Xosh ko'rmeymen muxaddes jıynalısların'ızdı.
22 Jandırılatug'ın qurbanlıq ha'm g'a'lle sadaqaların'ızdı, Mag'an usınsan'ız da, olardı qabıl etpeymen. Semirtilgen malların'ızdan tatıwlıq qurbanlıqların bersen'iz de, Men olarg'a na'zerimdi de salmayman.
23 Uzaqlastırın' Mennen shawqımlı qosıqların'ızdı, Tın'lamayman arfa menen shertken sazların'ızdı.
24 Onın' ornına a'dalat ag'ın suw sıyaqlı, Haqıyqatlıq ma'n'gi ag'atug'ın da'ryaday ag'ıp tursın.
25 Ha'y, İzrail xalqı, sho'lde qırıq jıl dawamında, Usıng'an qurbanlıqlar ha'm g'a'lle sadaqaların'ız Mag'an ba edi?
26 Patsha dep atag'an Sakkut mu'sinin, Juldız qudayı dep atag'an Kaywan mu'sinin, O'zlerin'iz ushın islep alg'an usı mu'sinlerdi alıp ju'resiz.
27 Ja'ne sizlerdi Damasktin' arg'ı jag'ına su'rgin qılaman». Bular Jaratqan İyenin' so'zleri, Onın' atı – A'lemnin' Qudayı.
