Amos 6 bob
1 Ha'siret shegesizler, Sionda biyg'am jasap atırg'anlar, Samariya tawında o'zlerin amanlıq ishindemiz, dep esaplag'anlar! Milletlerdin' abıraylı adamları bolıp sanalatug'ınlar, İzrail xalqı sizlerge arqa su'yep keledi.
2 Kalne qalasına barın' ha'm ko'rin', Ol jerden ullı Xamatqa o'tin', Keyin filistlerdin' Gat qalasına qaray tu'sin'. Sizlerdin' eki patshalıg'ın'ızdın' olardikinen artıqmashılıg'ı bar ma? Olardın' jerleri sizlerdikinen u'lken be edi?
3 Apat ku'nin uzaq sanap, Jawızlıqtı jaqınlastırıp atırg'anlar,
4 Pil su'yeginen sog'ılg'an ka'tte jatqanlar, To'seklerinde sozılıp jambaslag'anlar, Su'riwlerdin' ishinen qozılardı, Jaylawdag'ı semiz tanalardı jegenler!
5 O'zlerin'izshe Dawıtqa uqsap qosıqlar shıg'arıp, Arfa sazı astında qosıqlar aytqanlar!
6 U'lken keseler menen sharap iship, Maydın' en' jaqsısın u'stine su'rtkenler, Yusuptin' xalqının' qulawına nemquraydı qarag'anlar!
7 Sizler birinshi bolıp su'rginge a'ketilesiz, Jambaslap o'tkizetug'ın zıyapatların'ız tawısıladı.
8 Quday İye O'z atı menen ant ishedi, A'lemnin' Qudayı, Jaratqan İye bılay deydi: «Yaqıptın' menmenliginen jerkenemen, Onın' qorg'an qalaların jek ko'remen. Qalanı ha'm ishindegilerdin' ha'mmesin, Dushpang'a ta'slim qılaman».
9 Eger bir u'yde on adam qalsa, Olar da o'ledi.
10 Marhumnın' jaqın ag'ayini jerlew ushın o'lini alıwg'a kelgende, U'ydin' ishindegi adamnan: «Qasın'da ja'ne birew bar ma?» – dep soraydı, Ol: «Hesh kim joq», – dep juwap beredi. Keyin ag'ayini: «Tınısh, Jaratqan İyenin' atın tilge almayıq!» – deydi.
11 Mine, Jaratqan İye buyrıq berip atır, U'lken u'yler buzıp taslanadı, Kishkene u'yler jer menen jeksen boladı.
12 Atlar jartas u'stinde shaba ala ma? Kim o'gizdi jegip, ten'izdi su're aladı? Biraq sizler a'dalattı za'ha'rge, Haqlıq miywesin ashshı juwsang'a aylandırdın'ız.
13 Lo-Debar qalasın qolg'a kirgizdik, dep quwang'anlar: «Qarnayım qalasın o'z ku'shimiz benen basıp aldıq», – deysiz.
14 Biraq A'lemnin' Qudayı, Jaratqan İye bılay deydi: «Mine, sonın' ushın, ha'y İzrail xalqı, Sizlerge qarsı bir xalıqtı jiberemen, Olar Lebo-Xamattan Araba oypatlıg'ına deyin sizlerdi ezedi».
