Amos 7 bob
1 Quday İye mag'an mınanı ko'rsetti: patshag'a tiyisli o't sho'p jıynap alıng'annan son', jan'adan sho'pler shıg'a baslag'anda, Jaratqan İye shegirtke u'yirin payda qıldı.
2 Shegirtkeler eldegi barlıq jasıl sho'plerdi jep tawısqanda, men: – Quday İye, o'tinemen keshir! Yaqıp bunnan qalay aman qaladı? Ol ju'da' ha'lsiz xalıq! – dedim.
3 Jaratqan İye O'z ırayınan qayttı. – Bulay bolmaydı, – dedi Ol.
4 Quday İye ja'ne mag'an mınanı ko'rsetti: Quday İye ot jawdırdı, ot teren' suwlardı jalmap tasladı ha'm jerdi jandıra basladı.
5 Sonda men: – Quday İye, o'tinemen, toqtat! Yaqıp bunnan qalay aman qaladı? Ol ju'da' ha'lsiz xalıq! – dedim.
6 Jaratqan İye O'z ırayınan qayttı. – Bulay bolmaydı, – dedi.
7 Basqa ayanda mag'an mınanı ko'rsetti: İye bir o'lshew jibin uslap, o'rilgen tik diywaldın' qasında turdı.
8 Jaratqan İye: – Ne ko'rip tursan', Amos? – dep soradı. Men: – Bir o'lshew jibin, – dedim. İye bılay dedi: – Mine, xalqım İzraildın' ortasına da bir o'lshew jibin qoyaman. Endi artıq olardı keshirmeymen.
9 Isaq a'wladının' sıyınatug'ın orınları joq boladı, İzraildın' muxaddes orınları qıyratıladı, Yarobam na'siline qarsı qılısh jalan'ashlayman+.
10 Beyt-Eldegi ruwxaniy Amasiya İzrail patshası Yarobamg'a xabar jiberip, bılay dedi: «Amos İzrail xalqının' arasında sag'an qarsı til biriktirip atır. Jer onın' so'zlerin ko'tere almaydı.
11 Sebebi Amos bılay dep atır: „Yarobam qılısh penen o'ltiriledi, İzrail o'z jerinen alısqa, So'zsiz su'rgin etip a'ketiledi“».
12 Sonnan keyin, Amasiya Amosqa: – Ha'y, wa'liy, bul jerden ketip, Yahudag'a qash. Nanın'dı sol jerden tawıp, sol jerde payg'ambarshılıq et.
13 Endi artıq Beyt-Elde payg'ambarshılıq qılma. O'ytkeni bul jer patshanın' muxaddes jeri, patshalıqtın' ibadatxanası, – dedi.
14 Amos og'an bılay dep juwap berdi: – Men payg'ambar da emespen, payg'ambardın' sha'kirti de emespen. Men mal bag'ıp, jabayı a'njir ag'ashların o'siremen.
15 Su'riw bag'ıp ju'rgenimde, Jaratqan İye meni shaqırıp: «Bar, xalqım İzrailg'a payg'ambarshılıq qıl», – dedi.
16 Endi Jaratqan İyenin' so'zlerine qulaq sal. Sen: «İzrailg'a qarsı payg'ambarshılıq qılma, Isaq a'wladına qarsı so'yleme!» – deysen'.
17 Sonın' ushın, Jaratqan İye bılay deydi: «Hayalın' qalada jezo'kshe boladı, Ul ha'm qızların' qılısh ju'zinen o'tkiziledi. Jerin' o'lshenip, basqalarg'a bo'listirip beriledi, Al o'zin' haram sanalg'an bir jurtta o'lesen'. İzrail xalqı o'z jerinen alısqa, So'zsiz su'rgin etip a'ketiledi».
