Yunus 4 bob
1 Sonda Yunus bug'an qattı renjip, ashıwlandı.
2 Ol Jaratqan İyege bılay dep duwa etti: «O, Jaratqan İye! Usınday bolatug'ının o'z elimde bolg'an waqtımda-aq aytpag'an ba edim? Sonlıqtan da men Tarshishke qashqan edim. Sebebi Senin' miyrimli, rehimli, sabır-taqatlı, su'yispenshiligi sheksiz ha'm jazalawdan waz keshetug'ın Quday ekenin'di biletug'ın edim.
3 Endi o'tinemen, Jaratqan İye, menin' janımdı al. Sebebi tiri ju'rgenimnen go're, o'lgenim jaqsıraq».
4 Jaratqan İye og'an: «Senin' ashıwlanıwg'a haqın' bar ma?» – dedi.
5 Yunus qaladan shıg'ıp, onın' shıg'ıs ta'repindegi bir jerge barıp otırdı. Ol o'zine shertek sog'ıp alıp, onın' sayasında otırdı ha'm qalag'a ne bolatug'ının ko'riw ushın ku'te basladı.
6 Sonda Quday İye Yunustın' basına sayasın tu'sirip, qayg'ısın jen'illetsin dep, bir o'simlik o'sirip shıg'ardı. Yunus bul o'simlikke qattı quwandı.
7 Biraq kelesi ku'ni tan' atqanda, Quday bir qurttı jiberdi ha'm ol o'simlikti kemirip, quwratıp tasladı.
8 Quyash shıqqanda, Quday shıg'ıstın' qapırıq samalın estirdi. Quyash Yunustın' basın qattı qızdırg'anlıqtan, ol ha'lsizlene basladı ha'm o'zine o'lim tilep: «Tiri ju'rgenimnen go're, o'lgenim jaqsıraq», – dedi.
9 Biraq Quday og'an: – O'simlik ushın ashıwlanıwg'a haqın' bar ma? – dedi. Yunus: – A'lbette, ha'tteki, o'lgenshe ashıwlanıwg'a haqım bar, – dedi.
10 Sonda Jaratqan İye og'an bılay dedi: «Bul o'simlik bir tu'nde shıg'ıp, bir tu'nde joq boldı. Sen miynet etip, bul o'simlikti o'sirmegen bolsan' da, og'an janın' ashıp atır.
11 Al Nineviyada bolsa, aq penen qaranı ayıra almaytug'ın bir ju'z jigirma mın'nan aslam adam ha'm ko'p sanlı haywanlar bar. Usı ullı qala ushın Menin' janım qalay ashımasın?»
