Mixa 2 bob
1 Jınayat qılıwdı oylaytug'ınlar, Ha'tteki to'seginde jatqanda, Jawızlıq jobalastıratug'ınlar, ha'siret shegesiz! Tan' atqanda, olar du'zgen jobasın ju'zege asıradı. Sebebi olardın' sonı islewge ku'shi jetedi.
2 Kewli ku'segen atızlardı iyelep, Zorlıq penen u'ylerdi tartıp aladı. Olar shan'araqlardı ezip, miyras jerlerin basıp alıp atır.
3 Sol sebepli Jaratqan İye bılay deydi: «Men bul xalıqqa sonday bir apat tayarlap atırman, Bunnan hesh birin'iz qashıp kete almaysız. Basın'ızdı ko'terip, ju're almaysız, Sebebi sonday apatshılıq zaman keledi.
4 Sol ku'n kelgende, sizlerdi masqaralap, Sizler haqqında mınaday qayg'ılı jır aytıladı: „Bizler pu'tkilley wayran boldıq! Jaratqan İye xalqımızdın' barı-jog'ın basqalarg'a u'lestirdi, Jerlerimizdi satqınlarg'a tarqatıp berdi“».
5 Sonın' ushın, Jaratqan İyenin' xalqı qaytadan jerdi bo'liskende, Hesh birin'iz shek boyınsha u'les jer almaysız.
6 Olardın' payg'ambarları: «Bular haqqında payg'ambarshılıq etpe, Onday payg'ambarshılıqtı toqtat, Bizler bolmaymız shermende», – deydi.
7 «Ha'y, Yaqıptın' na'sili, Jaratqan İyenin' sabırı tawısılg'an ba eken? Ol usınday islerdi qılar ma edi? – dep aytıwın'ız orınlı ma? Jaratqan İyenin' so'zleri tuwrı ju'rgen adamg'a, Jaqsılıq alıp kelmey me?»
8 Jaratqan İye bılay deydi: «Jaqında o'z xalqın'ızg'a dushpanday zulımlıq qıldın'ız! Sawashtan qaytqan adamlarday qa'wetersiz ju'rgenlerdi an'lıp, Olardın' iynindegi shapanın tartıp aldın'ız.
9 Xalqımnın' hayalların o'zleri unatqan o'z u'ylerinen shıg'arıp jiberdin'iz, Jas balalardın' nesiybesin ma'n'gige qırqıp tasladın'ız.
10 Qa'nekey, turın', ketin' bul jerden! Artıq aman-esenlik taba almaysız bul elden! O'ytkeni gu'nan'ız sebepli elin'iz tolıq wayran boldı».
11 Jalg'an so'yleytug'ın o'tirikshi kelip: «Sizlerge sharap ha'm o'tkir ishimlik mol boladı, dep payg'ambarshılıq qılaman», – dese, Ol bul xalıqtın' payg'ambarı sanaladı!
12 Jaratqan İye bılay deydi: «Biraq ha'y, Yaqıp urpag'ı, Men ha'mmen'izdi so'zsiz jıynayman, Qalg'an izraillılardı toplayman. Qoradag'ı qoylarday, jaylawdag'ı su'riwdey etip, Jıynayman sizlerdi bir jerge. Sonda tolıp-tasar elin'iz adamlarg'a».
13 Quday olarg'a jol ashadı, Tutqınlıqtan azat etedi. Qala da'rwazasınan shıg'ıp ketedi. Patshan'ız bolg'an Jaratqan İye olarg'a jetekshi bolıp, aldında ju'redi.
