Mixa 3 bob
1 Sonda men bılay dedim: «Tın'lan'lar, Yaqıp urpag'ının' basshıları, İzrail xalqının' hu'kimdarları! Sizler a'dalattın' ne ekenin biliwin'iz kerek emes pe?
2 Al sizler bolsa, jaqsılıqtan jerkenip, Jamanlıqtı jaqsı ko'resiz. Sizler xalqımnın' terisin sıyırıp, Etin su'yeginen sılıp alasız.
3 Xalqımnın' go'shin jeysiz: terisin sıyırıp, su'yeklerin maydalaysız, Qazang'a salınatug'ın go'shtey, tabag'a pisiretug'ın ettey olardı tuwraysız.
4 Jaqın arada sizler Jaratqan İyege jalbarınasız, Degen menen, sol waqıtta jawızlıq islegenin'iz ushın, Ol sizlerden ju'zin jasıradı».
5 Xalqın joldan azg'ırg'an, O'zin toydırg'ang'a tınıshlıq tilegen, Al awzın maylamag'ang'a urıs ja'riyalag'an payg'ambarlarg'a, Jaratqan İye bılay deydi:
6 «Sonın' ushın, u'stin'izdi qaran'g'ı tu'n qaplaydı, Qaran'g'ılıqtan hesh qanday ayan ko're almaysız. Ha'y, payg'ambarlar, sizler ushın quyash batadı, Ku'ndizin'iz qaran'g'ılıqqa aylanadı.
7 Wa'liyler shermende boladı, Uyatqa qaladı palkerler. Quday olarg'a juwap bermegeni ushın, Uyattan ju'zlerin jawıp aladı».
8 Biraq men Yaqıp urpag'ına ayıpların, İzrail xalqına gu'naların bildiriw ushın, Jaratqan İyenin' Ruwxı menen ku'shke, A'dillik ha'm batıllıqqa tolaman.
9 Qulaq salın', Yaqıp urpag'ının' basshıları, İzrail xalqının' hu'kimdarları! A'dillikten jerkendin'iz, Haqıyqattı burmaladın'ız.
10 Qanlardın' esesine tikledin'iz Siondı, A'dilsizlik jolı menen qurdın'ız Erusalimdi.
11 Basshıları para alıp, hu'kim shıg'aradı, Ruwxaniyleri da'mego'ylik penen ta'lim beredi, Payg'ambarları pul alıp, payg'ambarshılıq qıladı. Sonday bolsa da, olar: «Jaratqan İye bizler menen birge, Basımızg'a tu'speydi hesh qanday apat», – dep, Jaratqan İyege arqa su'yegisi keledi.
12 Sonlıqtan sizler sebepli Sion atız sıyaqlı su'riledi, Sizler sebepli Erusalim qırdag'ı tas u'yinine aylanadı. İbadatxana turg'an tawdı tog'aylıq qaplaydı.
