Xabaqquq 1 bob
1 Bul payg'ambarshılıq so'z – Xabaqquq payg'ambarg'a ayan arqalı berilgen xabar.
2 Jaratqan İye, qashang'a deyin Seni ja'rdemge shaqıraman, Mag'an qulaq salasan' ba, o'zi? «Zorlıq-zombılıq!» dep jalbarınıp atırman, Biraq bizlerdi qutqarmay atırsan' Sen!
3 Ne ushın jawızlıqtı ko'zim menen ko'riwime jol qoydın'? Sonday nahaqlıqqa qalay qarap turıpsan'? Qayaqqa qarasam da talan-tarajlıq ha'm zorlıq-zombılıq. Ha'mme jerde daw ha'm ja'njeller tolıp ketti.
4 Sonlıqtan nızam o'z ku'shin joytıp, a'dillik ayaq astı boldı, Jawızlar a'dil adamlardan u'stin keldi, Solay etip, a'dillik burmalandı.
5 Keyin Jaratqan İye bılay dedi: «Dıqqat penen qaran'lar basqa xalıqlarg'a, Tan' qalasızlar ko'rgenlerin'izge. Sizlerdin' da'wirin'izde sonday isler qılaman, Esitken waqtın'ızda, isene almaysızlar.
6 Mine, Men babilonlılardı ku'shli qılaman, Bul xalıq jawız ha'm tınımsız. Olar du'nyanın' to'rt ta'repine ju'ris qıladı, Basqa xalıqlarg'a tiyisli jerlerdi basıp aladı.
7 Olar qorqınıshlı ha'm qa'wiplidur, O'zine xan, o'zine biy bolg'an menmen xalıqdur
8 Olardın' atları qaplannan tez, Tu'nde ju'retug'ın ash qasqırlardan da qa'wiplidur. Atlı a'skerleri jerdi shan'g'ıtıp, uzaqtan keler, Oljasına taslanatug'ın bu'rkit yan'lı ushıp keler.
9 Olardın' ha'mmesi kiyatır tonaw ushın, Ordaları sho'l quyınınday alg'a talpınıp, Olar qum jıynag'anday tutqınlardı jıynap keler.
10 Patshalardı mazaqlap, basshılardı masqara qıladı, Qorg'anlı, bekkem qalalardın' u'stinen ku'ledi, Sol qalalardın' diywallarına qıya etip, topıraq u'yip, Keyin olardı qolg'a aladı.
11 Sonnan keyin, olar samal sıyaqlı tez o'tip ketedi, Bul gu'nakar adamlar o'z ku'shin quday, dep esaplaydı».
12 Jaratqan İye, Muxaddes Qudayım, Ha'mme waqıtta bar bolg'an Sen emessen' be? Solay eken, bizler joq bolıp ketpeymiz. O, Jaratqan İye, bizlerdi jazalaw ushın, babilonlılardı tan'ladın', O, menin' su'yengen Tawım, jazalaw huqıqın solarg'a berdin'.
13 Jawızlıqtı ko'rgisi kelmeytug'ın sonday pa'kdur Senin' ko'zlerin', Xosh ko'rmeysen' Sen nahaqlıqtı. Ne ushın endi usı jawız adamlarg'a shıdap atırsan'? Jawızlar o'zlerine qarag'anda a'dilirek bolg'anlardı jutıp atırg'anda, Sen qalayınsha u'nsiz turıpsan'?
14 Sen adamzattı ten'izdegi balıqlarday, Basshısı joq shıbın-shirkeylerdey qıldın'.
15 Babilonlılar olardın' barlıg'ın o'z qarmag'ına tu'sirer, Tor taslap balıq awlag'anday etip, olardı awlar. Awları menen tutıp alıp, jıynap alar, Sonda olar quwanıp, shadlanar+.
16 Awları arqalı olar ko'p olja aladı, Jaqsı awqatlar menen awqatlanadı, Sol sebepli, awları ushın qurbanlıqlar shaladı. Awlarına arnap, tu'tetki tu'tetedi.
17 Qashang'a deyin, olar awları menen ellerdi awlap, Xalıqlardı ayawsız o'ltiriwdi dawam etedi?
