Sefaniya 2 bob
1 Ha'y, arsız xalıq! O'rteliw ushın jıynalg'an saban sıyaqlı toplanın'lar!
2 Qudaydın' pa'rmanı orınlansa, Ta'wbe qılıw mu'mkinshiligin'iz samal ushırg'an qawıqtay joq boladı. Sonlıqtan Jaratqan İyenin' ku'shli qa'ha'rine ushıramasın'ızdan aldın, Jaratqan İyenin' g'a'zep ku'ni kelmesinen aldın, esin'izdi jıynap alın'!
3 Ha'y, Jaratqan İyenin' nızamlarına a'mel qılatug'ınlar, Eldegi barlıq kishipeyilliler, Jaratqan İyege kelin'. Haq ha'm kishipeyil bolıwg'a umtılın'. Sonda Jaratqan İyenin' g'a'zep ku'ninde aman saqlanıwın'ız mu'mkin.
4 Gaza qalası qan'ırap, bosap qaladı, Ashkelon qalası qarabaqanag'a aylanadı, Ashdod turg'ınları tu'ske deyin quwıp shıg'arıladı, Ekron qalası tu'p-tamırı menen joq qılınadı.
5 Kritten kelip, ten'iz boyında jasap atırg'anlar, ha'siret shegesiz! Ha'y, filistlerdin' jeri Kenaan, Jaratqan İyenin' sag'an qarsı hu'kimi mınaday: «Men seni birde bir turg'ının' qalmag'ansha, qırıp taslayman».
6 Ten'iz boyındag'ı elin'iz, Qoy-eshkilerdin' jaylawlarına, Su'riwlerdin' qoralarına aylanadı.
7 Yahuda xalqının' aman qalg'anları sol eldi iyelik qıladı, Ol jerde su'riwlerin otlatadı, Ashkelondag'ı u'ylerde tu'neydi. O'ytkeni Qudayı Jaratqan İye olarg'a g'amxorlıq qıladı, Burıng'ı abadanshılıg'ına eristiredi.
8 «Men moablılardın' kemsitken mısqıllı so'zlerin, Ammon xalqının' mazaq so'zlerin esittim. Olar Menin' xalqımdı ayaq astı qılıp, Xalqımnın' jerine ko'z alayttırg'anın esittim.
9 Sonlıqtan, tiriligim haqı ant ishemen, – deydi İzraildın' Qudayı, A'lemnin' Jaratqan İyesi: – Moab eli Sodom, ammon xalqının' eli Gomora sıyaqlı bolıp qaladı. Sonda olardı jabayı sho'pler qaplap, Duzlı shuqırlarg'a tolıp ketedi, Ma'n'gi qan'ırag'an elsiz dalag'a aylanadı. Xalqımnın' aman qalg'anları olardı tonaydı, Yahudada aman qalg'anları olardın' jerlerin mu'lik etip aladı».
10 Olardın' menmenlikleri ushın, A'lemnin' Jaratqan İyesinin' xalqın ayaq astı qılıp, Olardın' jerine ko'z alayttırg'anı ushın, Usı apatlar olardın' basına tu'sedi.
11 Jaratqan İye olarg'a qarsı aybat qıladı, Jer ju'zindegi barlıq qudaylardı qurtadı. Ten'iz jag'alarındag'ı barlıq milletler, O'z ellerinde Jaratqan İyege sıyınadı.
12 «Ha'y, kushlılar, Sizler de Menin' qılıshımnan o'lesiz», – deydi Jaratqan İye.
13 Jaratqan İye arqa ta'repke qarsı qol ko'terip, Assiriyanı joq qıladı. Nineviya qalasın wayran qıladı, Onı suwsız sho'lge aylandıradı.
14 Onın' ortası su'riwlerdin', Ha'r tu'rli jabayı haywanlardın' jatatug'ın ornı boladı. Su'tinlerdin' joqarısında uzaqsha ha'm bayıwlılar uyıqlaydı, Aynalardan olardın' dawısı shıg'adı. Qulatılg'an tasları bosag'alarında u'yilip qaladı, Tek g'ana kedr ag'ashları qaladı.
15 Mine, tınıshlıq ishinde jasag'an maqtanshaq qala, «Mag'an ten'lese alatug'ını joq», – dep o'zinshe aytqan edi. Al endi bolsa, ol wayran boldı, Jabayı haywanlardın' ma'kanına aylandı. Janınan o'tken-ketkenler, Ko'rgenlerine qolların shoshaytıp, mazaqlap ketedi.
