Zexariya 3 bob
1 Keyin bas ruwxaniy Eshuanın' Jaratqan İyenin' perishtesinin' aldında turg'anın ha'm onın' on' jag'ında onı ayıplaw ushın shaytannın' turg'anın ko'rdim.
2 Jaratqan İye shaytandı keyip: «Men sag'an tıyım salaman, ha'y, shaytan! Erusalimdi tan'lag'an Men sag'an tıyım salaman! Bul adam ot ishinen suwırıp alıng'an shala jang'an otın bo'legi emes pe?» – dedi.
3 Perishtenin' aldında Eshua patas kiyim kiyip turg'an edi.
4 Perishte sol jerde turg'anlarg'a: «U'stindegi patas kiyimlerin sheshin'», – dedi. Keyin Eshuag'a: «Tın'la, senin' ayıpların'dı alıp tasladım. Sag'an taza, saltanatlı kiyim kiydiremen», – dedi.
5 Sonda men: «Onın' basına taza sa'lle kiydirilsin», – dedim. Olar onın' basına taza sa'lle, u'stine kiyim kiydirdi. Jaratqan İyenin' perishtesi de onın' qasında turg'an edi.
6 Keyin Jaratqan İyenin' perishtesi Eshuag'a eskertip bılay dedi:
7 «A'lemnin' Jaratqan İyesi bılay deydi: „Eger Menin' jollarım menen ju'rip, Menin' talaplarımdı orınlasan', İbadatxanamda sen basshılıq qılıp, ha'wlimdi basqarasan'. Sag'an usı jerde turg'anlar menen birge da'rgayıma kirip-shıg'ıw huqıqın beremen.
8 Tın'la, bas ruwxaniy Eshua, sen ha'm janın'da otırg'an ruwxaniy tuwısqanların' menen birge ha'mmen'iz keleshekte ju'z beretug'ın waqıyalardın' nıshanısız. Men „Na'l“ dep atalatug'ın xızmetkerimdi alıp shıg'aman.
9 Mine, Eshuanın' aldına bir tas qoydım. Sol tasqa jeti ko'z qarap turıptı. Men tastın' u'stine oyıp jazıw jazaman“. Bunı A'lemnin' Jaratqan İyesi aytadı. „Bir ku'n ishinde mına eldin' gu'nasın alıp taslayman.
10 Sol ku'ni sizler qon'sıqobaların'ızdı o'z ju'zim ag'ashların'ızdın' ha'm a'njir ag'ashların'ızdın' astında otırıwg'a mira't etesiz“. Bunı A'lemnin' Jaratqan İyesi aytadı».
