Malaxiya 2 bob
1 – Ha'y ruwxaniyler, endi bul buyrıq sizlerge arnaladı.
2 Eger Mag'an qulaq salmasan'ız ha'm atımdı hu'rmet etpesen'iz, – deydi A'lemnin' Jaratqan İyesi, – sizlerge na'let jawdırıp, sizlerdin' pa'tiyaların'ızdı na'letke aylandıraman. A'lle qashan na'letledim, sebebi sizler Meni hu'rmetlewdi qa'lemedin'ler.
3 – Men sizlerdin' a'wladların'ızdı jazalayman. Bayramların'ızda qurbanlıq qılg'an malların'ızdın' taslandıların ju'zlerin'izge ılaqtıraman. Sizlerdi usılar menen birge taslap jiberemen.
4 Lebiyliler menen du'zgen kelisimimnin' dawam etiwi ushın, usı buyrıqtı Menin' bergenimdi bilip alasızlar, – deydi A'lemnin' Jaratqan İyesi.
5 – Lebiyliler menen du'zgen kelisimim o'mir ha'm tınıshlıq beretug'ın kelisim edi. Mag'an hu'rmet ko'rsetsin dep, Men olarg'a usılardı bergen edim. Olar Mennen qorqıp, atımdı hu'rmet etetug'ın edi.
6 Olardın' awzında durıs ko'rsetpe bar edi ha'm tillerinde hesh qanday a'dalatsızlıq joq edi. Olar Menin' menen birge bolıp, tınıshlıq ha'm tuwrı jolda ju'retug'ın edi ha'm ko'p adamlardı gu'na jolınan qaytaratug'ın edi.
7 – Ruwxaniydin' tilindegi so'zler bilimdi saqlaydı ha'm adamlar onın' awzınan durıs ko'rsetpe izleydi. O'ytkeni ol A'lemnin' Jaratqan İyesinin' xabarshısı.
8 Degen menen, sizler joldan azg'ırılıp kettin'iz ha'm o'z u'gitna'siyatların'ız benen ko'p adamlardı gu'nag'a jeteledin'iz. Menin' lebiyliler menen du'zgen kelisimimdi buzdın'ız, – deydi A'lemnin' Jaratqan İyesi.
9 – Sizler Menin' jollarımdı izlemedin'ler, Nızamg'a baylanıslı ma'selelerde adamına qaray is tuttın'lar. Sol sebepten Men de barlıq xalıqtın' aldında sizlerdin' abırayın'ızdı tu'sirip, jerge urdım.
10 Bizlerdin' ha'mmemizdin' A'kemiz bir emes pe? Bizlerdi Quday jaratqan joq pa? Onday bolsa, ne ushın ha'r birimiz o'z tuwısqanımızg'a qıyanet etip, Qudaydın' ata-babalarımız benen du'zgen kelisimin buzıp atırmız?
11 Yahuda xalqı opasızlıq qıldı. Olar İzrailda ha'm Erusalimde jerkenishli isler isledi: Yahuda basqa qudaylarg'a tabınatug'ın qızlarg'a u'ylenip, Jaratqan İyenin' su'ygen muxaddes İbadatxanasın haramladı.
12 Bunı islegen adam kim bolıwına qaramastan, ol A'lemnin' Jaratqan İyesine qurbanlıqlar alıp kelse, Jaratqan İye onı Yaqıptın' shatırlarınan joq qılsın!
13 Sizler islep atırg'an ja'ne bir is bar: Jaratqan İyenin' qurbanlıq ornın ko'z jaslar menen toltırıp jibergensiz, dad salıp, ha'siret shegip atırsız. Sebebi Jaratqan İye sizlerdin' alıp kelgen qurbanlıqların'ızdı qabıl etpey atır, Ol bulardan ırazı emes.
14 «Ne ushın?» – dep soraysızlar. Sebebi sizler jas waqtın'ızda u'ylengen hayalın'ızg'a qıyanet ettin'ler. Ol sizlerdin' o'mirlik joldasın'ız, nekeli hayalın'ız edi. Jaratqan İyenin' O'zi ekewin'izdin' aran'ızda gu'wa bolg'an edi.
15 Quday sizlerdi bir dene ha'm bir ruwx qılıp jaratpadı ma? Ne ushın bir qıldı? O'ytkeni Ol O'zine ayrıqsha bolg'an bir urpaq izlegen edi. Sonlıqtan o'zlerin'izge ıqtıyat bolın', hesh birin'iz jaslıqta u'ylengen hayalın'ızg'a qıyanet etpen'.
16 – Men nekenin' buzılıwın jek ko'remen, – deydi İzraildın' Qudayı, Jaratqan İye. – Hayalına usınday jawızlıq islegen adamnan jerkenemen, – deydi A'lemnin' Jaratqan İyesi. Sonlıqtan abaylı bolın'lar ha'm qıyanet etpen'ler, – dedi.
17 Sizler so'zlerin'iz benen Jaratqan İyeni sharshatıp jiberdin'ler. Sizler: «Bizler Onı qalay sharshattıq?» – dep soraysız. Al sizler Onı: «Jamanlıq qılg'an ha'r bir adam Jaratqan İyenin' aldında jaqsıdur, Onın' kewli olardan tolıdur», – dep sharshattın'ız. Ja'ne de: «Qa'ne, a'dillikti saqlaytug'ın Quday qayda o'zi?» – dep soraysız.
