Sanlar 10 bob
1 Jaratqan İye Muwsag'a bılay dedi:
2 – Gu'misten eki ka'rnay sho'kkishlep soqtır, bulardı ja'miyetti jıynaw ushın ha'm ha'r bir ordanın' jolg'a shıg'ıwı ushın qollanasan'.
3 Eki ka'rnay birge shertilgen waqıtta, barlıq ja'miyet senin' qasın'a, Ushırasıw shatırının' aldına jıynalsın.
4 Tek g'ana bir ka'rnay shertilse, onda ko'semler, yag'nıy İzraildın' tiyre basshıları senin' janın'a jıynalsın.
5 Ka'rnay qısqa-qısqa etip shertilgen waqıtta, shıg'ıs ta'repte qonıs basqanlar jolg'a shıqsın.
6 Ekinshi ma'rte qısqa-qısqa etip shertilgen waqıtta, qubla ta'repte qonıs basqanlar jolg'a shıqsın. Ka'rnaydın' qısqaqısqa etip shertiliwi urıwlardın' jolg'a shıg'ıwı kerekligin bildiredi.
7 Ja'miyetti jıynaw ushın ka'rnaydı uzaq waqıt a'piwayı dawıs penen sherttir.
8 Ka'rnaylardı Xaronnın' ruwxaniy ulları shertsin. Bul sizler ha'm keleshek a'wladların'ız ushın ma'n'gi qag'ıyda bolıp qalsın.
9 U'lken'izde sizlerge hu'jim qılg'an dushpang'a qarsı sawashqa shıqqanın'ızda, ka'rnay shertip, belgi berin'. Sonda Qudayın'ız Jaratqan İye bolg'an Men sizlerdi eslep, dushpanların'ızdan qutqaraman.
10 Shadlı ku'nlerin'izde – bayramların'ızda, Jan'a ay bayramların'ızda, jandırılatug'ın qurbanlıqlar ha'm tatıwlıq qurbanlıqlar bergenin'izde ka'rnay shertin'. Usılay etip, Qudayın'ız bolg'an Men sizlerdi esleymen. Men – Qudayın'ız Jaratqan İyemen.
11 İzrail xalqı Mısırdan shıqqannan keyin ekinshi jıldın' ekinshi ayının' jigirmalanshı ku'ni bult buyrıqlar qoyılg'an shatırdan joqarı ko'terildi.
12 Sonda izraillılar da Sinay sho'linen jolg'a shıg'ıp, bult Paran sho'linde toqtag'ansha ko'ship-qonıp ju'rdi.
13 Olar Jaratqan İyenin' Muwsa arqalı bergen buyrıg'ı boyınsha jolg'a birinshi ma'rte shıqtı.
14 Olar ha'r saparı jolg'a shıqqanda, ha'r bir orda o'z bayrag'ı astında bir ta'rtipte ju'retug'ın edi. Birinshi bolıp, Amminadab ulı Naxshon basshılıg'ındag'ı Yahuda ordası bo'limleri menen birge o'z ordasının' bayrag'ı astında ko'shti baslap ju'rdi.
15 İssaxar urıwı bo'limine Suar ulı Netanel,
16 Zebulon urıwı bo'limine Xelon ulı Eliab basshılıq qılatug'ın edi.
17 Sonnan keyin, Muxaddes shatır jıynastırılıp, onı ko'terip, alıp ju'retug'ın Gershon urpag'ı menen Merariy urpag'ı jolg'a shıqtı.
18 Olardan son' Shedeur ulı Elisur basshılıg'ındag'ı Ruben ordası bo'limleri menen birge o'z ordasının' bayrag'ı astında jolg'a shıqtı.
19 Shimon urıwı bo'limine Surishadday ulı Shelumiel,
20 Gad urıwı bo'limine Dewel ulı Elyasaf basshılıq qılatug'ın edi.
21 Onnan keyin Qohat urpag'ı muxaddes buyımlardı ko'terip, jolg'a shıqtı. Olar belgilengen jerge jetip baraman degenshe, Muxaddes shatır qurılıp bolınıwı tiyis edi.
22 Ammihud ulı Elishama basshılıg'ındag'ı Efrayım ordası bo'limleri menen birge o'z ordasının' bayrag'ı astında jolg'a shıqtı.
23 Menashshe urıwı bo'limine Pedasur ulı Gamaliel,
24 Benyamin urıwı bo'limine Gidoniy ulı Abidan basshılıq qılatug'ın edi.
25 Ko'shtin' en' aqırında Ammishadday ulı Axiezer basshılıg'ındag'ı Dan ordası bo'limleri menen birge o'z ordasının' bayrag'ı astında jolg'a shıqtı. Olar İzrail ordalarının' artqı saqshıları edi.
26 Asher urıwı bo'limine Oxran ulı Pagiel,
27 Naftaliy urıwı bo'limine Enan ulı Axira basshılıq qılatug'ın edi.
28 İzraillılar bo'limlerge bo'linip, usı ta'rtipte jolg'a shıg'atug'ın edi.
29 Muwsa midyanlı qa'yin atası Reueldin' balası Xobabqa bılay dedi: – Jaratqan İyenin': «Sizlerge beremen», – degen jerine baratırmız. Siz de bizler menen birge barın', sizge jaqsı qatnasta bolamız. O'ytkeni Jaratqan İye İzrailg'a jaqsılıq etiwdi wa'de qıldı.
30 Xobab og'an: – Yaq, barmayman. O'z elime, ag'ayin-tuwg'anlarımnın' janına qaytaman, – dep juwap berdi.
31 Muwsa og'an bılay dedi: – İltimas, bizlerdi taslap ketpen'. Sebebi siz sho'lde qonıslaytug'ın jerlerdi bilesiz. Bizlerge jol ko'rsetesiz.
32 Eger bizler menen birge barsan'ız, Jaratqan İyenin' isleytug'ın barlıq jaqsılıqların siz benen de bo'lisemiz.
33 İzraillılar Jaratqan İyenin' tawınan shıg'ıp, u'sh ku'nlik jol ju'rdi. Qonıslaytug'ın jerdi tabıw ushın Jaratqan İyenin' Kelisim sandıg'ı olardın' aldında ju'rip bardı.
34 Qonıs basqan jerden jolg'a shıqqanda, Jaratqan İyenin' bultı ku'n boyı olardın' u'stinde boldı.
35 Kelisim sandıg'ı jolg'a shıqqanda, Muwsa bılay dep aytatug'ın edi: «Tur, Jaratqan İye! Tarap ketsin dushpanların' ja'n-jaqqa, Seni jek ko'retug'ınlar aldın'nan qashıp ketsin!»
36 Kelisim sandıg'ı toqtag'anda bolsa, Muwsa bılay dep aytatug'ın edi: «Qayt, mın'-mın'lag'an İzrail xalqının' Jaratqan İyesi!»
