Sanlar 25 bob
1 İzraillılar Shittimde ornalasıp turg'anda, olardın' erkekleri moablı hayallar menen buzıqshılıq qıla basladı.
2 Moablı hayallar izraillılardı o'z qudaylarına arnap beretug'ın qurbanlıqqa mira't etti. İzrail xalqı olardın' qurbanlıq go'shlerinen jedi ha'm olardın' qudaylarına tabındı.
3 Solay etip, İzrail xalqı Peordag'ı Baalg'a baylanıp qaldı. Sol sebepten Jaratqan İyenin' olarg'a g'a'zebi qaynadı.
4 Jaratqan İye Muwsag'a: – Bul xalıqtın' barlıq basshıların a'kelip, olardı ku'ndiz Menin' aldımda asıp qoy. Usılay etip, Menin' İzrail xalqına bolg'an g'a'zebim tu'ssin, – dedi.
5 Sonda Muwsa İzrail basshılarına: – Ha'r birin'iz Peordag'ı Baalg'a baylanıp qalg'an adamların'ızdı o'ltirin', – dep buyrıq berdi.
6 Ja'miyet Ushırasıw shatırının' aldında jılap turg'anda, izraillı bir adam midyanlı bir hayaldı Muwsanın' ha'm İzrail ja'miyetinin' ko'z aldında o'z shatırına alıp kirgen edi.
7 Bunı ko'rgen Xaronnın' aqlıg'ı, Elazar ulı Pinexas ja'miyet arasınan shıg'ıp, qolına bir nayza aldı.
8 Pinexas izraillı sol adamnın' izinen barıp, shatırg'a kirdi de, nayzanı ekewine de qadadı. Nayza izraillı sol adamnın' denesin tesip o'tip, midyanlı sol hayaldın' qarnına kirgen edi. Solay etip, İzrail xalqın joq etip atırg'an oba toqtadı.
9 Bul obadan o'lgenlerdin' sanı 24 000 adam edi.
10 Jaratqan İye Muwsag'a bılay dedi:
11 – Ruwxaniy Xaronnın' aqlıg'ı, Elazar ulı Pinexas İzrail xalqına bolg'an g'a'zebimdi qaytardı. O'ytkeni ol xalıqtın' arasında Menin' ushın ullı qızg'anshaqlıq ko'rsetti. Sol sebepli, Men O'z qızg'anshaqlıg'ım menen olardı pu'tkilley joq qılmadım.
12 Sen og'an bılay dep ayt: Men Pinexas penen tınıshlıq kelisimimdi du'zemen.
13 Bul kelisim boyınsha Pinexas ha'm onın' a'wladı ma'n'gi ruwxaniy boladı. Sebebi ol Qudayı ushın qızg'anshaqlıq qılıp, İzrail xalqınan Menin' g'a'zebimdi qaytardı.
14 Midyanlı hayal menen birge o'ltirilgen izraillı adamnın' atı Salu ulı Zimriy edi. Ol Shimon urıwındag'ı bir a'wladtın' basshısı edi.
15 Al o'ltirilgen hayal bolsa, midyanlı bir tiyrenin' basshısı bolg'an Surdın' qızı Kozbiy edi
16 Jaratqan İye Muwsag'a:
17 – Midyan xalqın dushpan dep bil ha'm olardı qırıp tasla.
18 O'ytkeni olar sizlerge qarsı sumlıq oylap, sizlerdi Peorda jalg'an qudaylarg'a tabındırdı ha'm o'zlerinin' tuwısqanı bolg'an midyanlı tiyre basshısının' qızı Kozbiy arqalı azg'ırıwg'a salıp, dushpanlıq qıldı. Bul hayal Peorda oba tarqalg'an waqıtta o'ltirilgen edi, – dedi.
