Matta 3 bob
1 Sol ku'nleri Shomıldırıwshı Yaqıya kelip, Yahudiya u'lkesinin' sho'l dalasında:
2 – Ta'wbe etin'ler! O'ytkeni Aspan Patshalıg'ı jaqınlap qaldı, – dep ja'riyaladı.
3 İyshaya payg'ambar arqalı mınaday dep aldın ala aytılg'an adam usı Yaqıya edi: «Sho'l dalada baqırg'an birewdin' dawısı shıg'adı: „İyemizge jol tayarlan'lar, Onın' ju'retug'ın jolların du'zetin'ler!“»
4 Yaqıya tu'yenin' ju'ninen kiyim kiygen, belin teri qayıs penen buwg'an bolıp, onın' awqatı shegirtke menen jabayı ha'rrenin' palı edi.
5 Sol waqıtta Erusalimnin', pu'tkil Yahudiya u'lkesinin' ha'm İordannın' pu'tkil do'gereginin' turg'ınları og'an bardı
6 ha'm o'zlerinin' gu'naların moyınlap, İordan da'ryasında shomıldırıldı.
7 Yaqıya o'zine ko'p pariseyler menen saddukeylerdin' shomıldırılıwg'a kiyatırg'anın ko'rip, olarg'a: – Ha'y, uwlı jılanlardın' tuqımları! Keleshektegi qa'ha'rli jazadan qutılıwdı sizlerge kim u'yretti?
8 Ta'wbe etkenin'izge ılayıq jemis berin'ler!
9 Ja'ne: «Bizlerdin' ata tegimiz – İbrayım ata-g'o!» – dep ishlerin'izden oylaman'lar. Sebebi sizlerge aytatug'ınım: Quday İbrayımg'a mına taslardan da balalar jasap bere aladı.
10 Tereklerdin' tamırında ha'zirdin' o'zinde-aq balta jatır. Jaqsı miywe bermeytug'ın ha'r bir terek shabılıp, otqa taslanadı.
11 Ta'wbe etkenin'izdin' belgisi retinde, men sizlerdi suw menen shomıldıraman. Biraq mennen keyin Keliwshi mennen de qu'diretli: men Onın' ayaq kiyimin sheshiwge de ılayıqlı emespen. Ol sizlerdi Muxaddes Ruwx ha'm ot penen shomıldıradı.
12 Onın' jabası qolında. Ol O'z qırmanın tazalap, biydayın g'a'llexanasına jıynaydı, al sabanın so'nbes otqa jandıradı, – dedi.
13 Sonda İysa Yaqıya ta'repinen shomıldırılıw ushın Galiladan İordan da'ryasına, Yaqıyanın' qasına keldi.
14 Biraq Yaqıya Onı irkip: – Senin' qolın'nan shomıldırılıwg'a men mu'ta'jben-g'o! Sen nege mag'an kiyatırsan'? – dedi.
15 Biraq, İysa og'an juwap berip: – Endi ırazı bol, pu'tkil haqlıqtı bizler usılayınsha orınlawg'a tiyislimiz-g'o, – dedi. Sonnan son', Yaqıya Og'an qayılshılıq berdi.
16 İysa shomıldırılıp, da'rriw suwdan shıqtı. Mine, aspan ashılıp, Ol Qudaydın' Ruwxının' O'zinin' u'stine kepterdey tu'sip kiyatırg'anın ko'rdi.
17 Sonda aspannan: – Bul – Menin' su'yikli Ulım, Men Og'an ırzaman! – degen saza esitildi.
