Luka 13 bob
1 Sol waqıtta geybirewler İysag'a kelip, Pilattın' galilalılardı o'ltirtkeni ha'm olardın' qanın o'zleri soyg'an qurbanlıqları menen aralastırıp taslag'anı haqqında aytıp berdi.
2 İysa olarg'a: – Sizler: «Usınday apatqa ushırag'anı ushın, bul galilalılar basqa barlıq galilalılardan gu'nalıraq», – dep oylaysızlar ma?
3 Yaq, deymen sizlerge. Eger ta'wbe etpesen'ler, ha'mmen'iz de usılay nabıt bolasızlar.
4 U'stilerine Siloha minarası qulap o'lgen on segiz adam Erusalimde jasawshı adamlardın' ha'mmesinen ayıplıraq edi, dep oylaysızlar ma?
5 Yaq, deymen sizlerge. Eger ta'wbe etpesen'ler, ha'mmen'iz de usılay nabıt bolasızlar, – dedi.
6 Son'ınan İysa mınaday tımsal aytıp berdi: – Bir adamnın' ju'zim bag'ında egilgen a'njir ag'ashı bolıptı. Adam onnan miywe alıw ushın kelipti, biraq taba almaptı.
7 Sonda ol bag'mang'a: «Mine, men u'sh jıldan beri bul a'njir ag'ashınan miywe alıw ushın kelemen, biraq taba almayman. Onı shawıp tasla! Nege ol bosqa orın iyelep tur?» – depti.
8 Biraq bag'man og'an juwap berip: «Xojayın, onı bıyıl da qaldırın'. Men onın' a'tirapın qazıp, qıy to'geyin.
9 Mu'mkin, endigi jılı miywe berip qalar. Eger bermese, shawıp taslarsız, – depti.
10 Bir dem alıs ku'ni* İysa ma'jilisxanalardın' birinde ta'lim berip otırg'an edi.
11 Sol jerde on segiz jıldan beri awırıw ruwxınan qıynalg'an bir hayal bar edi. Ol eki bu'klenip qalg'an bolıp, boyın hesh tik uslay almas edi.
12 İysa onı ko'rip, janına shaqırıp aldı da, og'an: – Hayal, sen da'rtin'nen azat bolasan', – dep,
13 onın' u'stine qolların qoyg'anda, hayal sol waqıtta-aq boyın tiklep, Qudayg'a alg'ıslar ayta basladı.
14 Sonda ma'jilisxana basshısı İysanın' dem alıs ku'ni shıpa bergenine ashıwı kelip, xalıqqa: – Jumıs islew ushın altı ku'n bar. Shıpa alıwg'a dem alıs ku'ni emes, al sol ku'nleri kelin'ler, – dedi.
15 İyemiz İysa og'an bılay dep juwap berdi: – Ha'y, eki ju'zliler! Dem alıs ku'ni ha'r birin'iz o'gizin'izdi yamasa eshegin'izdi qoradan sheship alıp, suwg'arıwg'a aparmaysız ba.
16 On segiz jıldan beri shaytan baylap qoyg'an İbrayımnın' mına qızın dem alıs ku'ni bul baylawdan azat qılıw kerek emes pe edi?
17 İysa usı so'zlerdi aytqanda, Og'an qarsılıq ko'rsetkenlerdin' ha'mmesi uyalıp qaldı. Al pu'tkil xalıq Onın' barlıq ullı islerine quwandı.
18 Son'ınan İysa: – Quday Patshalıg'ı nege uqsaydı? Onı nege megzeteyin?
19 Ol – bir adamnın' alıp, o'z bag'ına ekken qıshqıl tuqımına uqsaydı. Ol o'sip, terek boladı ha'm shaqalarına aspan qusları ushıp kelip, uya saladı, – dedi.
20 İysa ja'ne bılay dedi: – Quday Patshalıg'ın nege uqsatayın?
21 Ol – bir hayaldın' alıp, barlıq qamır ashıg'ansha, u'sh samar ung'a aralastırg'an ashıtqısına uqsaydı.
22 Erusalimge qaray jol alg'an İysa qala ha'm awıllardı aralap, ta'lim berip ju'rdi.
23 Bir adam İysadan: – İyem, tek az g'ana adam qutqarıla ma? – dep soradı.
24 Sonda İysa xalıqqa bılay dedi: – Tar qapıdan kiriwge bar ku'shin'izdi salın'lar! Sebebi sizlerge aytatug'ınım: ko'pler kiriwge tırısadı, biraq kire almaydı.
25 U'ydin' İyesi turıp qapını jawıp taslag'anda, sizler sırtta turıp, qapını qag'a baslap: «İyem! İyem! Bizlerge qapını ash!» – deysizler. Biraq Ol sizlerge: «Men sizlerdi tanımayman ha'm qayaqtan kelgenin'izdi bilmeymen», – dep juwap beredi.
26 Sonda sizler: «Bizler Senin' ko'z aldın'da iship jedik. Sen bizlerdin' ko'shelerimizde ta'lim beretug'ın edin'-g'o», – dep aytasızlar.
27 Biraq Ol: «Sizlerge aytatug'ınım: Men sizlerdi tanımayman ha'm qayaqtan kelgenin'izdi bilmeymen. Ha'y, jamanlıq qılıwshılardın' ha'mmesi Mennen awlaq ketin'ler!» – deydi.
28 Sizler İbrayımdı, Isaqtı, Yaqıptı ha'm barlıq payg'ambarlardı Quday Patshalıg'ında, al o'zlerin'izdin' sırtqa quwıp shıg'arılg'anın'ızdı ko'rgenin'izde jılap, pushayman jeysizler.
29 Shıg'ıstan ha'm batıstan, arqadan ha'm qubladan adamlar kelip, Quday Patshalıg'ında dasturxan a'tirapına otıradı.
30 Mine, sonda son'g'ılardın' geybirewleri birinshiler, al birinshilerdin' geybirewleri son'g'ılar boladı.
31 Sol waqıtta bir neshe pariseyler kelip, İysag'a: – Bul jerden ket, Hirod Seni o'ltirmekshi, – dedi.
32 İysa olarg'a bılay dedi: – Barıp, sol tu'lkige aytın'lar: Men bu'gin ha'm erten' jinlerdi quwıp shıg'arıp, awırıwlarg'a shıpa beremen, al u'shinshi ku'ni isimdi juwmaqlayman.
33 Solay bolsa da, Men bu'gin, erten' ha'm arg'ı ku'ni O'z jolım menen ju'riwim kerek. O'ytkeni hesh bir payg'ambarg'a Erusalimnen basqa jerde o'liwge bolmaydı.
34 Oh, Erusalim, Erusalim! Payg'ambarlardı o'ltiriwshi, Qudaydın' sag'an jibergenlerin tas penen urıwshı qala! O'z sho'jelerin qanatının' astına alg'an ma'kiyen sıyaqlı, Men de senin' balaların'dı neshe ret jıynamaqshı boldım, biraq sizler qa'lemedin'ler.
35 Mine, u'yin'izdi Quday taslap ketip, ol qan'ırap qaladı. Sizlerge aytatug'ınım: «İyemizdin' atınan Keliwshi jarılqang'an!»* – dep aytqanların'ızg'a deyin Meni ko'rmeysizler.
