Luka 20 bob
1 Ku'nlerdin' birinde İysa xalıqqa İbadatxanada ta'lim berip, olarg'a Xosh Xabardı ja'riyalap turg'anda, Onın' qasına bas ruwxaniyler ha'm diniy mug'allimler aqsaqallar menen birge kelip,
2 Onnan: – Bizlerge aytshı, bul islerdi qanday biylik penen islep ju'rsen' ha'm bunday biylikti Sag'an kim berdi? – dep soradı.
3 İysa juwap qaytarıp: – Men de sizlerden bir na'rseni sorayın. Aytın'larshı:
4 Yaqıyanın' shomıldırıwı aspannan boldı ma yamasa adamlardan ba? – dedi.
5 Olar o'z ara oylasıp: – Eger «aspannan» desek, Ol bizlerge: «Onda nege sizler og'an isenbedin'ler», – dep aytar.
6 Al eger «adamlardan» desek, pu'tkil xalıq bizlerge tas atar, o'ytkeni olar Yaqıyanın' payg'ambar ekenine isenedi, – desti.
7 Sonlıqtan olar İysag'a: – Qayaqtan ekenin bilmeymiz, – dep juwap berdi.
8 Sonda İysa olarg'a: – Men de sizlerge bul islerdi qanday biylik penen isleytug'ınımdı aytpayman, – dedi.
9 Son'ınan İysa xalıqqa mına tımsaldı aytıp berdi: – Bir adam ju'zim bag'ın otırg'ızıptı ha'm onı diyxanlarg'a ijarag'a berip, o'zi uzaq waqıtqa alıs jerge ketip qalıptı.
10 Terim ma'wsimi kelgende, bag'dın' jemisinen tiyisli u'lesin alıw ushın, ol diyxanlarg'a o'zinin' bir xızmetshisin jiberipti. Biraq diyxanlar onı urıp, qurı qol qaytarıptı.
11 Ol basqa xızmetshisin jibergende, onı da urıp, masqaralap, qurı qol qaytarıptı.
12 U'shinshisin jumsag'anda, onı da jaradar etip, quwıp jiberipti.
13 Sonda ju'zim bag'ının' iyesi: «Ne qılsam eken? Su'yikli ulımdı jibereyin. Mu'mkin, onı hu'rmet eter», – depti.
14 Biraq diyxanlar onı ko'rip, o'z ara oylasıp: «Bul miyrasxor-g'o. Ju'rin'ler, onı o'ltireyik, sonda miyras mu'lki bizlerge qaladı», – desipti de,
15 onı ju'zim bag'ınan sırtqa shıg'arıp, o'ltiripti. Endi ju'zim bag'ının' iyesi olarg'a ne isleydi?
16 Ol kelip, sol diyxanlardı joq qıladı da, ju'zim bag'ın basqalarg'a beredi. Bunı esitkenler: – Quday saqlasın! – desti.
17 Biraq İysa ko'zlerin olarg'a tigip: – Olay bolsa, Muxaddes Jazıwdag'ı: «Qurılısshılar kereksiz dep taslag'an tas, U'ydin' mu'yeshinin' tiykarg'ı tası boldı» , – degen so'zler neni an'latadı?
18 Sol tasqa tu'sken ha'r bir adamnın' shıl-pa'rshesi shıg'adı. Tas kimnin' u'stine tu'sse, sonı jenship taslaydı, – dedi.
19 İysanın' bul tımsaldı o'zlerine tiygizip aytıp atırg'anın tu'singen diniy mug'allimler menen bas ruwxaniyler Onı sol waqıtta-aq qolg'a alıwg'a tırıstı, biraq xalıqtan qorqtı.
20 Olar İysanı dıqqat penen an'lıy basladı. İysanı so'zinen tutıp, Onı ha'kimnin' biyligine ha'm hu'kimine tapsırıw ushın, Og'an o'zlerin haq niyetli qılıp ko'rsetetug'ın jansızlardı jiberdi.
21 Jansızlar İysadan: – Ustaz, bizler Senin' haqıyqattı aytıp ta'lim berip atırg'anın'dı bilemiz. Hesh kimnin' bet-ju'zine qaramay, Qudaydın' jolın durıs u'yretip otırsan'.
22 Aytshı, bizlerdin' Rim patshası-Qaysarg'a salıq to'lewimiz durıs pa yamasa nadurıs pa? – dep soradı.
23 Biraq İysa olardın' hiylesin tu'sinip, olarg'a:
24 – Mag'an bir dinar ko'rsetin'ler. Bunda kimnin' su'wreti bar ha'm kimnin' atı jazılg'an? – dedi. Olar: – Qaysardın', – dep juwap berdi.
25 Sonda İysa: – Olay bolsa, Qaysardın' haqın Qaysarg'a, Qudaydın' haqın Qudayg'a berin'ler, – dedi.
26 Solay etip, olar İysanı xalıq aldında aytqan birde bir so'zinen tuta almadı. Onın' juwaplarına tan' qalısıp, lal bolıp qaldı.
27 Qayta tiriliw joq dewshi saddukeylerdin' ayırımları İysag'a kelip, Onnan:
28 – Ustaz, Muwsa bizlerge: «Eger birewdin' ag'ası balasız o'lip hayalın qaldırsa, inisi onın' hayalın alıp, o'z ag'asının' urpag'ın dawam ettirsin», – dep jazıp qaldırg'an.
29 Jeti ag'ayinli bar edi: birinshisi u'ylenip, balasız o'ldi.
30 Ekinshisi de,
31 u'shinshisi de sol hayaldı aldı. Hayaldı jetewinin' ha'mmesi de alıp, bala qaldırmay o'lip ketti.
32 En' son'ında hayaldın' o'zi de qaytıs boldı.
33 Al qayta tiriliwde ol jetewinin' ishinde qaysısının' hayalı boladı? Ol jetewine de hayal bolg'an edi-g'o, – dep soradı.
34 İysa juwap berip bılay dedi: – Bul du'nyanın' adamları u'ylenedi ha'm turmısqa shıg'adı.
35 Al kelesi du'nyag'a ha'm o'limnen qayta tiriliwge ılayıqlı bolg'anlar u'ylenbeydi de, turmısqa da shıqpaydı.
36 Olar perishteler sıyaqlı bolg'anlıqtan, endi o'lmeydi. O'limnen qayta tirilgenlikten, Qudaydın' balaları boladı.
37 Muwsa da o'lgenlerdin' qayta tiriletug'ının janıp turg'an puta haqqında ayatta ko'rsetken edi. Ol sol jerde Jaratqan İyemizdi: «İbrayımnın' Qudayı, Isaqtın' Qudayı, Yaqıptın' Qudayı» dep atag'an.
38 Quday o'lilerdin' emes, al tirilerdin' Qudayı. Sebebi Og'an tiyisli adamlardın' ha'mmesi tiri.
39 Diniy mug'allimlerdin' geybirewleri: – Ustaz, Sen durıs ayttın', – dedi.
40 Og'an ja'ne soraw beriwge hesh kimnin' batılı barmadı.
41 İysa olarg'a bılay dedi: – Nege Masixtı Dawıttın' Urpag'ı desedi?
42 Dawıttın' o'zi Zaburda: «İyem menin' İyeme ayttı:
43 „Dushpanların'dı ayag'ın'nın' astına bastırmag'anımsha, Menin' on' jag'ımda otır!“» – degen-g'o.
44 Solay etip, Dawıt Onı «İyem» dep atag'an bolsa, Ol qalayınsha onın' Urpag'ı boladı?
45 Pu'tkil xalıq tın'lap turg'anda, İysa O'z sha'kirtlerine:
46 – Diniy mug'allimlerden saq bolın'lar! Olar uzın kiyim kiyiwdi, bazar maydanlarında o'zlerine sa'lem beriliwin, ma'jilisxanalarda sıylı orında, zıyapatlarda to'rde otırıwdı jaqsı ko'redi.
47 Olar jesir hayallardın' u'ylerin jalmap jutıp, ko'zge ko'riniw ushın uzın duwa etedi. Bunday adamlar en' awır jaza aladı, – dedi.
