Luka 22 bob
1 Qutqarılıw bayramı dep atalatug'ın Ashıtqısız nan bayramı jaqınlap qalg'an edi.
2 Bas ruwxaniyler ha'm diniy mug'allimler xalıqtan qorqqanlıqtan, İysanı jasırın tu'rde o'ltiriwdin' jolın izledi.
3 Sonda on eki elshinin' biri – İsqariot dep atalg'an Yahudanın' ishine shaytan kirip aldı.
4 Yahuda barıp, bas ruwxaniyler ha'm İbadatxananın' bas qarawılları menen İysanı olarg'a qalay uslap beriwdi oylastı.
5 Olar quwanısıp, og'an aqsha beriwge kelisim berdi.
6 Yahuda wa'de berip, İysanı olarg'a xalıq joq jerde uslap beriw ushın qolaylı payıt izledi.
7 Qutqarılıw bayramının' qozısı shalınıwı kerek bolg'an Ashıtqısız nan bayramı jetip keldi.
8 İysa Petr menen Yuxandı jiberip: – Barın'lar, bizler ushın Qutqarılıw bayramının' asın tayarlan'lar, – dedi.
9 Olar: – Qay jerde tayarlawımızdı qa'leysen'? – dep soradı.
10 İysa olarg'a bılay dedi: – Qalag'a kirgenin'izde, gu'ze menen suw ko'terip kiyatırg'an adamg'a gezlesesiz. Onın' izine erip, ol kirgen u'yge kirin'ler
11 ha'm u'ydin' iyesine: «Ustazımız: „Sha'kirtlerim menen birge bayram asın jeytug'ın bo'lmem qa'ne?“ – dep sennen sorap atır», – den'ler.
12 Ol sizlerge to'sekler to'selgen joqarıdag'ı u'lken bo'lmeni ko'rsetedi. Sol jerde tayarlan'lar.
13 Olar barıp, İysanın' aytqanlarının' ha'mmesin tawıp, bayram asın tayarladı.
14 Awqatlanatug'ın waqıt bolg'anda, İysa elshileri menen birge dasturxan a'tirapına otırdı.
15 Olarg'a: – Azap shekpesimnen burın bul bayram asın sizler menen birge jewdi qattı qa'legen edim.
16 Sizlerge aytatug'ınım: bul Quday Patshalıg'ında orınlanbag'ansha, Men bul astı endi jemeymen, – dedi.
17 Son'ınan İysa qolına keseni alıp, shu'kirlik etti de: – Bunı alıp, o'z ara bo'lisip ishin'ler.
18 Sebebi Menin' sizlerge aytatug'ınım: Quday Patshalıg'ı kelmegenshe, Men endi ju'zim ishimliginen ishpeymen, – dedi.
19 Son' nandı alıp, Qudayg'a shu'kirlik etti ha'm onı sındırıp, olarg'a berdi de: – Bul – sizler ushın beriletug'ın Menin' denem. Meni eslep turıw ushın bunı islen'ler, – dedi.
20 Sol sıyaqlı, keshki awqattan son' keseni alıp: – Bul – Menin' sizler ushın to'giletug'ın qanım menen bekitiletug'ın Jan'a Kelisim.
21 Biraq qaran'lar, Meni satatug'ın adamnın' qolı Menin' qolım menen birge dasturxanda.
22 Adam Ulı Quday aldın ala belgilegendey baratır. Biraq Og'an satqınlıq qılıwshı ha'siret shegedi! – dedi.
23 Sha'kirtler bir-birinen: – Bul isti isleytug'ın qaysısımız? – dep soray basladı.
24 Sha'kirtler arasında qaysısının' en' ullı bolıp esaplanıwı kerek ekeni haqqında bir tartıs ta payda boldı.
25 İysa olarg'a bılay dedi: – Milletlerdin' patshaları o'z xalıqları u'stinen u'stemlik etedi, olarg'a biylik etiwshiler «xalıqtın' qayırqomları» dep ataladı.
26 Biraq sizler bunday bolman'lar. Kerisinshe, aran'ızda en' u'lken bolg'an en' kishidey bolsın, basshı da xızmetshidey bolsın.
27 Qaysı biri ullı: dasturxan basında otırg'an ba yamasa xızmet etip turg'an ba? Dasturxan basında otırg'an emes pe? Biraq Men sizlerdin' aran'ızda xızmetshideymen.
28 Sınawdan o'tken waqtımda sizler Menin' menen birge boldın'lar.
29 A'kem Mag'an patshalıq biyligin bergeni sıyaqlı, Men de sizlerge patshalıq biyligin beremen.
30 Solay etip, sizler Menin' Patshalıg'ımnın' dasturxanı a'tirapında iship jeysizler, taxtlarda otırıp, İzraildın' on eki urıwın hu'kim etesizler.
31 İysa Petrge: – Simon, Simon! Adamlardın' biydaydı kepshik penen jelpigeni sıyaqlı, shaytan sizlerdi sınaw ushın ruxsat sorag'an edi.
32 Biraq Men isenimin' tawsılmasın dep, sen ushın duwa ettim. Sen Mag'an qaytıp kelgenin'de, tuwısqanların'nın' isenimin bekkemle, – dedi.
33 Simon İysag'a: – İyem! Senin' menen birge qamaqqa da, o'limge de barıwg'a tayarman, – dedi.
34 Biraq İysa og'an: – Petr, sag'an aytatug'ınım: bu'gin qoraz shaqırmastan burın sen Meni tanımayman dep, Mennen u'sh ret tanasan', – dedi.
35 Son' İysa sha'kirtlerine: – Men sizlerdi shıjlansız, dorbasız, ayaq kiyimsiz jibergenimde, ne na'rseden kemshilik ko'rdin'ler? – dedi. – Hesh na'rseden, – dep juwap berdi olar.
36 Sonda İysa olarg'a: – Al endi kimnin' shıjlanı bolsa, onı alıp ju'rsin. Ja'ne dorbasın da alsın. Kimnin' qılıshı bolmasa, kiyimin satıp, qılısh alsın.
37 O'ytkeni sizlerge aytatug'ınım: Muxaddes Jazıwdag'ı: «Ol jınayatshılarg'a qosıp sanaldı» , – degen ayat Mende a'melge asıwı kerek. Awa, Men tuwralı jazılg'anlar orınlanıp atır, – dedi.
38 – İyem! Qara, bul jerde eki qılısh bar, – dedi olar. – Sol jetedi, – dedi İysa.
39 İysa shıg'ıp, O'z a'deti boyınsha Za'ytu'n tawına ketti. Sha'kirtleri de Onın' izine erdi.
40 Sol jerge kelgende, İysa olarg'a: – Azg'ırılmawın'ız ushın duwa etin'ler, – dedi.
41 O'zi olardan tas ılaqtırım jerdey awlag'ıraq barıp, dizerlep otırdı da, bılay dep duwa etti:
42 – O, A'kem, eger Sen qa'lesen', bul azap kesesin Mennen o'tkizip jiber. Biraq Menin' emes, Senin' qa'legenin' bolsın.
43 Sonda aspannan bir perishte İysag'a ko'rinip, Og'an ku'sh berdi.
44 Ol azap shegip atırıp, ja'ne de ku'shlirek duwa etti. Onın' teri jerge tamg'an qan tamshıları sıyaqlı edi.
45 İysa duwa etip bolıp, ornınan turdı da, sha'kirtlerinin' qasına keldi. Olardın' qayg'ıdan sharshap, uyıqlap atırg'anın ko'rdi.
46 Olarg'a: – Nege uyıqlap atırsızlar? Turın'lar, azg'ırılmawın'ız ushın duwa etin'ler, – dedi.
47 İysa ele so'ylep turg'anda, bir topar adamlar payda boldı. Olardın' aldında on eki sha'kirtinin' biri Yahuda kiyatır edi. Ol İysanı su'yiw ushın Og'an jaqınlastı.
48 İysa og'an: – Yahuda! Sen Adam Ulın su'yip turıp, Og'an satqınlıq isleysen' be? – dedi.
49 İysanın' qasındag'ılar ne bolajag'ın sezip: – İyem, qılıshtı iske salayıq pa? – dedi.
50 Olardın' birewi bas ruwxaniydin' qulının' on' qulag'ın shawıp tasladı.
51 Biraq İysa: – Toqtatın'lar, jeter endi! – dep quldın' qulag'ına qolın tiygizip, jazıp jiberdi.
52 Son' İysa O'zin uslawg'a kelgen bas ruwxaniylerge, İbadatxananın' bas qarawıllarına ha'm aqsaqallarg'a bılay dedi: – Meni uslaw ushın jınayatshıg'a qarsı shıqqanday bolıp, qılısh ha'm shoqmar alıp keldin'ler me?
53 Men ha'r ku'ni sizler menen birge İbadatxanada bolg'anımda, Mag'an qarsı qol ko'termedin'ler. Biraq endi zaman siziki, ha'zir qaran'g'ılıq u'stemlik etetug'ın waqıt.
54 Olar İysanı uslap, bas ruwxaniydin' u'yine alıp bardı. Al Petr uzaqtan erip keldi.
55 Ha'wlinin' ortasına ot jag'ıp, ha'mmesi birge otırg'anda, Petr de olardın' arasında otırg'an edi.
56 Bir shorı qız Petrdin' ottın' qasında otırg'anın ko'rip, og'an tigilip qaradı da: – Bul adam da Onın' menen birge edi, – dedi.
57 Biraq Petr qızg'a: – Yaq, qarındasım, men Onı tanımayman, – dep İysadan tandı.
58 Birazdan keyin basqa birew de Petrdi ko'rip: – Sen de solardın' birisen', – dedi. Biraq Petr og'an: – Yaq, ag'a, men olardan emespen, – dedi.
59 Bir saattay o'tkennen son', tag'ı birew: – Rasında da, mına adam Onın' menen birge bolg'an, sebebi ol galilalıg'o, – dedi bekkem isenim menen.
60 Biraq Petr og'an da: – Ag'a, senin' ne aytıp turg'anın'dı tu'sinbeymen, – dedi. Tap sol waqıtta, ol so'ylep turg'anda, qoraz shaqırdı.
61 İyemiz İysa burılıp, Petrge qaradı. Sonda Petr İyemizdin': «Bu'gin qoraz shaqırmastan burın sen Mennen u'sh ret tanasan'», – degen so'zin esine tu'sirdi.
62 Sırtqa shıg'ıp ketip, o'kirip jıladı.
63 İysanı uslap turg'an adamlar Onı masqaralap ura basladı.
64 Onın' ko'zlerin baylap, Onnan: – Wa'liylik etip ayt, Seni kim urdı? – dep soradı.
65 Og'an ja'ne basqa da ko'p jaman so'zler ayttı.
66 Tan' atqannan keyin, xalıq aqsaqalları, yag'nıy bas ruwxaniyler menen diniy mug'allimler birge jıynalıp ma'sla'ha'tlesti de, İysanı o'zlerinin' joqarg'ı ken'esine apardı.
67 Onnan: – Bizlerge ayt, Sen Masixpısan'? – dep soradı. İysa olarg'a: – Men sizlerge aytsam da, isenbeysizler.
68 Sizlerge soraw bersem de, juwap bermeysizler.
69 Biraq endigiden bılay, Adam Ulı qu'diretli Qudaydın' on' jag'ında otıradı, – dedi.
70 Sonda ha'mmesi: – Demek, Sen Qudaydın' Ulımısan'? – dep soradı. İysa olarg'a: – Menin' Sol ekenimdi o'zlerin'iz ayttın'ız, – dep juwap berdi.
71 Sonda olar: – Bizlerge ja'ne qanday gu'walıq kerek? O'z awzınan esittik-g'o, – desti.
