Luka 23 bob
1 Sonda jıynalg'anlardın' ha'mmesi orınlarınan turıp, İysanı Pilatqa alıp bardı da,
2 Onı bılay dep ayıplay basladı: – Bizler bul Adamnın' xalqımızdı joldan azg'ırıp ju'rgenin anıqladıq. Ol Rim patshası-Qaysarg'a salıq to'lewge qarsı shıg'ıp, O'zin Masixpan, yag'nıy Patshaman dep ataydı.
3 Pilat İysadan: – Sen Yahudiylerdin' Patshasımısan'? – dep soradı. İysa og'an: – Sol ekenimdi o'zin' ayttın', – dep juwap berdi.
4 Pilat bas ruwxaniyler menen xalıqqa: – Men bul Adamnan hesh bir ayıp tappay turman, – dedi.
5 Biraq olar aytqanınan qaytpay: – Ol Galila u'lkesinen baslap, ha'tte, usı jerge deyin pu'tkil Yahudiyada O'z ta'liymatın tarqatıp, xalıqqa qozg'alan' salıp ju'r, – desti.
6 Pilat bunı esitkende: – Bul Adam galilalı ma? – dep soradı.
7 İysanın' Hirodqa qaraslı u'lkeden ekenin bilgende, Pilat Onı Hirodqa jiberdi. Sol ku'nleri Hirodtın' o'zi de Erusalimde edi.
8 Hirod İysanı ko'rgende qattı quwandı. O'ytkeni Ol tuwralı ko'p esitkenlikten, Onı burınnan ko'rgisi keletug'ın ha'm bir ka'ramat ko'rseter dep u'mitlenetug'ın edi.
9 Ol İysag'a ko'p sorawlar berdi, biraq İysa hesh juwap bermedi.
10 Al bas ruwxaniyler menen diniy mug'allimler sol jerde turıp, İysanı qattı ayıpladı.
11 Hirod ta o'z a'skerleri menen birge Onı kemsitip masqaraladı da, Og'an patshanın' lipasın kiygizip, Pilatqa qaytarıp jiberdi.
12 Bul waqıyadan burın bir-birine dushpan bolıp kelgen Hirod penen Pilat sol ku'ni dos bolıp qaldı.
13 Pilat bas ruwxaniylerdi, basshılardı ha'm xalıqtı shaqırtıp alıp,
14 olarg'a: – Sizler mag'an bul Adamdı xalıqtı joldan azg'ırıp ju'r dep, alıp keldin'ler. Mine, men sizlerdin' ko'z aldın'ızda Onı tergesem de, sizlerdin' qoyg'an ayıpların'ızdın' birewin de Onnan tappadım.
15 Hirod ta hesh na'rse tappay, Onı bizlerge qaytarıp jiberdi. Ko'rip turg'anın'ızday, Ol o'lim jazasına ılayıq hesh na'rse islemegen.
16 Sonlıqtan Onı jazalap,
17 bosatıp jiberemen, – dedi.
18 Biraq xalıqtın' ha'mmesi bir awızdan: – Bul Adamdı joq qıl! Bizlerge Barabanı bosatıp ber! – dep baqırıstı.
19 Baraba qalada ju'z bergen qozg'alan'g'a qatnasıp, adam o'ltirgeni ushın qamalg'an edi.
20 Pilat İysanı bosatıp jibermekshi bolıp, olarg'a qarata ja'ne so'yledi.
21 Biraq olar: – Onı atanaq ag'ashqa shegelet! Shegelet! – dep baqırıstı.
22 Pilat u'shinshi ret olarg'a: – Ol qanday jamanlıq isledi, aqırı? Men Onnan o'limge ılayıqlı hesh ayıp tappadım. Solay eken, Onı jazalap, bosatıp jibereyin, – dedi.
23 Biraq olar dawıslarının' barınsha baqırıwdı dawam etip, İysanı atanaq ag'ashqa shegeletiwdi talap qıldı ha'm aqırında o'z degenlerine eristi.
24 Solay etip, Pilat olardın' talapların orınlawg'a qarar etti.
25 Olardın' sorag'an adamın, qozg'alan' ko'tergeni ha'm adam o'ltirgeni ushın qamaqta otırg'an adamdı bosatıp, İysanı olardın' erkine tapsırdı.
26 A'skerler İysanı alıp baratırg'anda, awıldan kiyatırg'an Simon degen kireneli bir adamdı uslap alıp, og'an atanaq ag'ashtı arqalatıp, İysanın' izinen ju'riwge ma'jbu'rledi.
27 İysanın' izine ju'da' ko'p xalıq erip ju'rdi. Arasında Ol ushın zarlap jılasqan hayallar da bar edi.
28 İysa olarg'a burılıp bılay dedi: – Erusalim qızları! Men ushın jılaman'lar. Biraq o'zlerin'iz ha'm balaların'ız ushın jılan'lar.
29 Sebebi: «Na'silsiz hayallar, hesh qashan tuwmag'an qursaqlar ha'm bala emizbegen ko'kirekler baxıtlı!» – dep aytatug'ın ku'nler keledi.
30 Sonda tawlarg'a: «U'stimizge qulan'lar!», to'beshiklerge: «Bizlerdi bastırın'lar!» – desedi.
31 O'ytkeni jap-jasıl ag'ashqa usılay islese, quwrag'an ag'ashqa ne qıladı eken?
32 İysa menen birge eki jınayatshını da o'limge alıp bardı.
33 «Bas su'yegi» degen jerge kelgende, olar İysanı eki jınayatshı menen birge atanaq ag'ashqa shegeledi. Jınayatshılardın' birewi Onın' on' ta'repinde, ekinshisi shep ta'repinde edi.
34 İysa: – A'ke, olardı keshire go'r! Olar ne islep atırg'anın bilmeydi, – dedi. A'skerler shek taslasıp, İysanın' kiyimlerin bo'listi.
35 Xalıq sol jerde qarap turdı. Al basshılar İysanın' u'stinen ku'lip: – Ol basqalardı qutqarg'an edi-g'o. Eger Ol Qudaydın' jibergen Masixı, Qudaydın' Tan'lag'anı bolsa, O'zin O'zi qutqarsın, – dedi.
36 A'skerler de Og'an jaqınlasıp, Onı masqaraladı ha'm sirke suwın berip:
37 – Eger Sen Yahudiylerdin' Patshası bolsan', O'zin'di O'zin' qutqar, – desti.
38 İysanın' bas betinde: «BUL – YAHUDİYLERDİN' PATSHASI» degen jazıw bar edi.
39 Atanaq ag'ashqa shegelengen jınayatshılardın' biri: – Sen Masix emessen' be? Qa'ne, onda O'zin'di de, bizlerdi de qutqar, – dep mazaq etti.
40 Al ekinshisi og'an keyip: – O'zin' de birdey jazag'a hu'kim etilip turıp, Qudaydan qorqpaysan' ba?
41 Bizler islerimizge ılayıq a'dil jaza aldıq. Al Ol hesh qanday jamanlıq qılg'an joq-g'o, – dedi.
42 Son' İysag'a: – İysa, O'z Patshalıg'ın'a kelgenin'de, meni esin'e al! – dedi.
43 İysa og'an: – Sag'an shının aytaman: sen bu'gin Menin' menen birge ja'nnette bolasan', – dedi.
44 Tu'ski saat on ekiler shamasında ku'n jaqtısın tu'sirmey,
45 saat u'shlerge deyin pu'tkil jerdi qaran'g'ılıq qaplap turdı. İbadatxanadag'ı Muxaddesxananın' perdesi ortasınan ekige bo'linip, jırtılıp ketti.
46 İysa ba'lent dawıs penen baqırıp: – A'ke! Ruwxımdı Senin' qolın'a tapsıraman, – dedi. Usını aytıp boldı da, jan tapsırdı.
47 Bolg'an waqıyalardı ko'rgen ju'zbası Qudaydı alg'ıslap: – Haqıyqattan da, bul haq Adam eken, – dedi.
48 Tamashag'a jıynalg'an pu'tkil xalıq bolg'an waqıyalardı ko'rip, ju'rekbawırları ezilip, izlerine qayttı.
49 Biraq İysanı bilgenlerdin' ha'mmesi ha'm Galiladan Onın' izine erip kelgen hayallar bularg'a uzaqtan qarap turdı.
50 Ken'estin' qararı menen isinde qatnaspag'an, ken'es ag'zası bolg'an Yusup atlı jaqsı ha'm haq bir adam bar edi. Ol Yahudiyanın' Arimatiya qalasınan bolıp,
51 Quday Patshalıg'ın ku'tip ju'rgen edi.
52 Yusup Pilatqa barıp, İysanın' denesin soradı.
53 Onı atanaq ag'ashtan tu'sirip alıp, kepinlik tawarg'a oradı ha'm ele hesh kim qoyılmag'an jartasta oyılg'an bir qa'birge qoydı.
54 Bul yahudiylerdin' tayarlıq ku'ni bolıp, dem alıs ku'ni kirip kiyatırg'an edi.
55 İysa menen birge Galiladan kelgen hayallar da Yusupke erip barıp, qa'birdi ha'm İysanın' denesinin' qalay qoyılg'anın ko'rdi.
56 Olar u'ylerine qaytıp kelip, xosh iyisli maylar ha'm a'tirler tayarlap qoydı. Al dem alıs ku'ni Qudaydın' buyrıg'ı boyınsha dem aldı.
