Luka 3 bob
1 Rim patshası Tiberius saltanatının' on besinshi jılında Yahudiya u'lkesinde Pontiy Pilat ha'kimlik qıldı. Galilanı Hirod, İtureya ha'm Traxonit u'lkelerin onın' inisi Filip, Abilena u'lkesin Lisaniyas basqardı.
2 Al Xanna menen Kayafa bas ruwxaniy edi. Sonda sho'l dalada jasap atırg'an Zekeriyanın' ulı Yaqıyag'a Qudaydın' so'zi tu'sti.
3 Yaqıya İordan a'tirapındag'ı barlıq u'lkelerdi aralap, adamlarg'a gu'nalarının' keshiriliwi ushın ta'wbege keliwdi ha'm suwg'a shomıldırılıwdı ja'riyalap ju'rdi.
4 Bul İyshaya payg'ambardın' kitabında jazılg'ang'a tuwrı keledi: «Sho'l dalada baqırg'an birewdin' dawısı shıg'adı: İyemizge jol tayarlan'lar, Onın' ju'retug'ın jolların du'zetin'ler!
5 Barlıq oypatlıqlar toltırılsın, Taw-to'beler pa'ske sho'ksin, Qıysıq jollar du'zetilsin, Budır jerler tegislensin.
6 Sonda pu'tkil adamzat Qudaydın' qutqaratug'ının ko'redi»
7 Yaqıya shomıldırılıwg'a kelgen alamang'a bılay dedi: – Ha'y, uwlı jılanlardın' tuqımları! Keleshektegi qa'ha'rli jazadan qutılıwdı sizlerge kim u'yretti.
8 Eger sizler ta'wbe etken bolsan'lar, bug'an ılayıq jemis berin'ler! Ja'ne: «Ata tegimiz İbrayım ata-g'o», – dep ishlerin'izden oylaman'lar. Sizlerge aytatug'ınım: Quday İbrayımg'a mına taslardan da urpaq jasap bere aladı.
9 Ag'ashlardın' tamırında ha'zirdin' o'zinde-aq balta jatır. Jaqsı miywe bermeytug'ın ha'r bir terek shabılıp, otqa taslanadı.
10 Sonda xalıq onnan: – Olay bolsa, bizler ne islewimiz kerek? – dep soradı.
11 Yaqıya olarg'a: – Kimnin' eki kiyimi bolsa, birewin kiyimi joqqa bersin. Kimnin' awqatı bolsa, ol da solay islesin, – dep juwap berdi.
12 Salıqshılar da shomıldırılıw ushın kelip, Yaqıyadan: – Ustaz, bizler ne islewimiz kerek? – dep soradı.
13 Yaqıya olarg'a: – Belgilengeninen artıq talap etpen'ler, – dedi.
14 A'skerler de onnan: – Al bizler ne islewimiz kerek? – dep soradı. Yaqıya olarg'a: – Hesh kimdi tonaman'lar, hesh kimge jala jappan'lar, o'z is haqın'ızg'a qanaat etin'ler, – dedi.
15 U'mit etip ku'tip turg'an xalıqtın' ha'mmesi Yaqıya tuwralı ishlerinen: – Bul Masix emes pe eken? – dep oyladı
16 Yaqıya ha'mmesine juwap berip: – Men sizlerdi suw menen shomıldıraman, biraq mennen keyin qu'diretli Birew kiyatır. Men Onın' ayaq kiyiminin' bawın sheshiwge de ılayıqlı emespen. Ol sizlerdi Muxaddes Ruwx ha'm ot penen shomıldıradı.
17 Onın' jabası qolında. Ol O'z qırmanın tazalap, biydayın g'a'llexanasına jıynaydı, al sabanın so'nbes otqa jandıradı, – dedi.
18 Yaqıya xalıqqa basqa da ko'p na'siyat aytıp, Xosh Xabardı ja'riyalap ju'rdi.
19 U'lke hu'kimdarı Hirod o'z inisinin' hayalı Hirodiya sebepli ha'm basqa da barlıq jaman isleri ushın, Yaqıya ta'repinen a'shkara etilgen edi.
20 Hirod burıng'ı islegen jamanlıqlarına qosa Yaqıyanı qamatıp tasladı.
21 Pu'tkil xalıq shomıldırılg'anda, İysa da shomıldırıldı. Ol duwa etkende aspan ashılıp,
22 Muxaddes Ruwx kepter pishinde Onın' u'stine tu'sti. Sonda aspannan: – Sen – Menin' su'yikli Ulımsan', Men Sag'an ırzaman, – degen saza esitildi.
23 İysa O'z xızmetin baslag'anda otızlar shamasında edi. Adamlar Onı Yusuptın' ulı sıpatında tanıytug'ın edi. Al Yusup Eli ulı,
24 Eli Mattat ulı, Mattat Lebiy ulı, Lebiy Malkiy ulı, Malkiy Yanay ulı, Yanay Yusup ulı,
25 Yusup Mattatiya ulı, Mattatiya Amos ulı, Amos Naxum ulı, Naxum Hesli ulı, Hesli Nagay ulı, Nagay
26 Maxat ulı, Maxat Mattatiya ulı, Mattatiya Shimiy ulı, Shimiy Yusex ulı, Yusex Yuda ulı,
27 Yuda Yuxanan ulı, Yuxanan Resha ulı, Resha Zerubabel ulı, Zerubabel Shaltiel ulı, Shaltiel Neriy ulı,
28 Neriy Malkiy ulı, Malkiy Addiy ulı, Addiy Qosam ulı, Qosam Elmadam ulı, Elmadam Er ulı,
29 Er Eshu ulı, Eshu Eliezer ulı, Eliezer İorım ulı, İorım Mattat ulı, Mattat Lebiy ulı,
30 Lebiy Shimon ulı, Shimon Yahuda ulı, Yahuda Yusup ulı, Yusup İonam ulı, İonam Eliakim ulı,
31 Eliakim Mala ulı, Mala Menna ulı, Menna Mattata ulı, Mattata Natan ulı, Natan Dawıt ulı,
32 Dawıt İshay ulı, İshay Obid ulı, Obid Boaz ulı, Boaz Salmon ulı, Salmon Nahshon ulı,
33 Nahshon Aminadab ulı, Aminadab Ram ulı, Ram Hesron ulı, Hesron Pares ulı, Pares Yahuda ulı,
34 Yahuda Yaqıp ulı, Yaqıp Isaq ulı, Isaq İbrayım ulı, İbrayım Terax ulı, Terax Naxor ulı,
35 Naxor Seruk ulı, Seruk Reu ulı, Reu Pelek ulı, Pelek Eber ulı, Eber Shalah ulı,
36 Shalah Kenan ulı, Kenan Arpakshat ulı, Arpakshat Sam ulı, Sam Nux ulı, Nux Lamek ulı,
37 Lamek Metushelax ulı, Metushelax Enok ulı, Enok Yaret ulı, Yaret Maxalalel ulı, Maxalalel Kenan ulı,
38 Kenan Enosh ulı, Enosh Shit ulı, Shit Adam-ata ulı, al Adam-ata Quday ulı.
