Luka 6 bob
1 Bir dem alıs ku'ni İysa biyday atızının' arası menen o'tip baratırg'anda, Onın' sha'kirtleri biyday masaqların u'zip alıp, alaqanları menen uwqalap jey basladı.
2 Geypara pariseyler olarg'a: – Sizler nege dem alıs ku'ninde islewge bolmaytug'ın isti islep atırsızlar? – dedi.
3 İysa olarg'a juwap berip: – O'zi de, qasındag'ılar da ash bolg'anda Dawıttın' ne islegenin sizler oqımag'ansızlar ma?
4 Ol Qudaydın' U'yine kirip, tek ruwxaniylerge g'ana jewge bolatug'ın Qudayg'a arnalg'an nanlardı o'zi de jep, qasındag'ılarg'a da bergen emes pe? – dedi.
5 Ja'ne olarg'a: – Adam Ulı dem alıs ku'ninin' de iyesi, – dedi.
6 İysa basqa bir dem alıs ku'ni ma'jilisxanag'a kirip, ta'lim bere basladı. Sol jerde on' qolı la'n' bir adam bar edi.
7 Diniy mug'allimler menen pariseyler İysadan ayıp tabıw ushın, dem alıs ku'ni awırıwlarg'a shıpa bermes pe eken dep, Onı an'lıdı.
8 Biraq İysa olardın' usı oyın bilip, qolı la'n' adamg'a: – Ornın'nan turıp, ortag'a shıq, – dedi. Ol ornınan turıp, ortag'a shıqtı.
9 Sonda İysa olarg'a: – Sizlerge bir soraw bereyin: nızam boyınsha dem alıs ku'ni ne islegen durıs: jaqsılıq pa yamasa jamanlıq pa? Adamnın' janın qutqarıw ma yamasa nabıt qılıw ma? – dedi.
10 İysa a'tirapındag'ılardın' ha'mmesine qarap shıqtı da, qolı la'n' adamg'a: – Qolın'dı soz, – dedi. Ol solay islegende, qolı burıng'ıday sap-saw bolıp qaldı.
11 Sonda olar qattı ashıwg'a minip, İysag'a ne islew kerek ekenin o'z ara ken'ese basladı.
12 Sol ku'nleri İysa duwa etiw ushın tawg'a shıqtı ha'm tu'ndi Qudayg'a duwa etiw menen o'tkizdi.
13 Tan' atqanda, O'z sha'kirtlerin janına shaqırıp alıp, arasınan on ekisin tan'lap aldı da, olardı «elshiler» dep atadı.
14 Olar: İysa Petr dep atag'an Simon ha'm onın' inisi Andrey, Yaqıp penen Yuxan, Filip penen Bartolomey,
15 Matta menen Tomas, Alpeydin' ulı Yaqıp penen watansu'yer dep atalg'an Simon,
16 Yaqıptın' ulı Yahuda ha'm keyin İysag'a satqınlıq islegen Yahuda İsqariot.
17 İysa olar menen birge tawdan to'men tu'sip, bir tegislik jerge kelip turdı. Sol jerde Onın' ko'plegen sha'kirtleri, pu'tkil Yahudiya ha'm Erusalimnen, Tir ha'm Sidondag'ı u'lken ten'iz jag'asınan kelgen ko'p xalıq bar edi.
18 Olar İysanı tın'lawg'a ha'm o'z keselliklerine shıpa tabıwg'a kelgen edi. Jawız ruwxlardan azap shekken adamlar da kelip, shıpa taptı.
19 Pu'tkil xalıq İysag'a qol tiygiziwge tırısatug'ın edi. Sebebi Onnan ku'sh shıg'ıp, ha'mmege shıpa beretug'ın edi.
20 İysa sha'kirtlerine qarap bılay dedi: – Jarlı bolg'anlar, sizler baxıtlısızlar! Sebebi Qudaydın' Patshalıg'ı sizlerdiki.
21 Ha'zir ash bolıp ju'rgenler, sizler baxıtlısızlar! Sebebi toq bolasızlar. Ha'zir jılap ju'rgenler, sizler baxıtlısızlar! Sebebi ku'lesizler.
22 Adamlar sizlerdi Adam Ulı ushın jek ko'rse, aralarınan shetletse, xorlap, atların'ızg'a daq tu'sirse, sizler baxıtlısızlar!
23 Sol ku'ni quwanıp, shadlıqqa bo'lenin'ler! O'ytkeni sizlerdin' aspandag'ı sıylıg'ın'ız u'lken. Olardın' ata-babaları da payg'ambarlarg'a usılay islegen.
24 Biraq, ha'y baylar, sizler ha'siret shegesizler! Sebebi sizler o'z ha'zligin'izdi a'lle qashan alıp boldın'lar.
25 Ha'zir toq bolg'anlar, sizler ha'siret shegesizler! Sebebi sizler ash qalasızlar. Ha'zir ku'lip atırg'anlar, sizler ha'siret shegesizler! Sebebi sizler o'kirip jılaysızlar.
26 Ha'mme sizlerdi maqtasa, sizler ha'siret shegesizler! Sebebi olardın' ata-babaları jalg'an payg'ambarlarg'a usılay islegen.
27 – Biraq, Meni tın'lap otırg'an sizlerge aytatug'ınım: Dushpanların'ızdı su'yin'ler, o'zlerin'izdi jek ko'retug'ınlarg'a jaqsılıq islen'ler.
28 Sizlerdi g'arg'aytug'ınlarg'a jaqsı tilek tilen'ler, qapa qılatug'ınlar ushın duwa etin'ler
29 Betin'nin' bir jag'ına urg'ang'a ekinshi betin'di de tut. Shapanın'dı tartıp alg'ang'a ko'ylegin'di de alıwg'a ruxsat et!
30 Sennen sorag'an ha'r bir adamg'a ber, senikin alg'annan qaytarıp beriwdi talap qılma!
31 Adamlardın' sizlerge ne islegenin qa'lesen'ler, sizler de olarg'a sonı islen'ler!
32 Eger sizler o'zlerin'izdi su'ygenlerdi g'ana su'ysen'ler, bul ushın qanday alg'ıs alasızlar? Gu'nakarlar da o'zlerin su'ygenlerdi su'yedi-g'o.
33 Eger o'zlerin'izge jaqsılıq islegenlerge g'ana jaqsılıq islesen'ler, bul ushın qanday alg'ıs alasızlar? Gu'nakarlar da usılay isleydi-g'o.
34 Eger sizler qaytarıp alıwdan u'mit etip, qarız bersen'ler, bul ushın qanday alg'ıs alasızlar? Gu'nakarlar da qansha qarız berse, sonsha qaytarıp alıw ushın, gu'nakarlarg'a qarız beredi-g'o.
35 Biraq sizler dushpanların'ızdı su'yin'ler. Jaqsılıq qılıp, hesh na'rse da'metpey, qarız berin'ler. Sonda sizler u'lken sıylıq alıp, qu'diretli Qudaydın' balaları bolasızlar. O'ytkeni Ol jaqsılıqtı bilmeytug'ınlarg'a da, jaman adamlarg'a da miyrimli.
36 Solay etip, A'ken'iz miyrim-sha'pa'a'tli bolg'anı sıyaqlı, sizler de miyrim-sha'pa'a'tli bolın'lar.
37 – Basqalardı hu'kim etpen'ler, sonda sizler de hu'kim etilmeysiz. Ayıplaman'lar, sonda sizler de ayıplanbaysız. Keshirin'ler, sonda sizler de keshirilesiz.
38 Berin'ler, sonda sizlerge de beriledi. Basıp, silkitip toltırılg'an, tasıp to'gilgen mo'lsher menen eteklerin'izge salıp beriledi. Sizler qanday o'lshem menen o'lshep bersen'ler, Quday da sizlerge sonday o'lshem menen o'lshep beredi.
39 İysa olarg'a ja'ne bir tımsal ayttı: – Soqırdı soqır jetelep ju're ala ma? Ekewi de bir shuqırg'a qulap tu'spey me?
40 Sha'kirt ustazınan ullı emes. Biraq ha'r bir adam bilimin jetilistirgennen keyin, o'z ustazınday boladı.
41 Sen nege tuwısqanın'nın' ko'zindegi sho'pti ko'rip turıp, o'z ko'zin'degi qadanı sezbeysen'?
42 O'z ko'zin'degi qadanı ko'rmey turıp, qalay: «Tuwısqanım, qa'ne, ko'zin'degi sho'pti shıg'arıp alayın», – dep tuwısqanın'a ayta alasan'? Ha'y, eki ju'zli! Da'slep o'z ko'zin'degi qadanı shıg'ar, sonda anıq ko'rip, tuwısqanın'nın' ko'zindegi sho'pti shıg'ara alasan'.
43 – Jaman miywe beretug'ın jaqsı terek ha'm jaqsı miywe beretug'ın jaman terek joq.
44 Ha'r bir terek miywesinen bilinedi: hesh kim shen'gelden a'njir jıynamaydı, tikenlikten ju'zim termeydi.
45 Jaqsı adam kewlindegi jaqsı g'a'ziynesinen jaqsılıq shıg'aradı, al jaman adam kewlindegi jaman g'a'ziynesinen jamanlıq shıg'aradı. Adamnın' kewli nege tolıp tassa, awzınan sol shıg'adı-g'o.
46 Nege sizler Meni: «İyem, İyem» dep shaqırıp, aytqanlarımdı qılmaysızlar?
47 Mag'an kelip, so'zlerimdi tın'lap, olardı orınlaytug'ın adamnın' kimge uqsaytug'ının sizlerge aytayın:
48 ol – jerdi teren' etip qazıp, tiykarın jar tas u'stine qalap, u'y salg'an adamg'a uqsaydı. Sel tasıp, sol u'ydi soqqılag'anda, u'y bekkem salıng'anlıg'ı sebepli, onı qozg'alta almaydı.
49 Biraq so'zlerimdi esitse de, onı orınlamaytug'ın adam u'yin jer u'stine tiykarsız salg'an adamg'a uqsaydı. Suwlar tasıp, bul u'ydi soqqılag'anda, ol sol waqıtta-aq qulap, qattı qıyralıp qaladı.
